Kosovë

Reagon Sindikata e RTK-së
Sindikata e Pavarur e Punëtorëve të Radio Televizionit të Kosovës, në mbledhjen e saj të mbajtur të martën, ka shprehur brengosjen për shkak të zgjatjes së krizës në mediumin e vetëm publik në Kosovë, RTK, dhe ka kërkuar që institucionet kompetente të Kosovës sa më parë të zgjedhin organet e reja udhëheqëse të RTK-së, si pikënisje për një kthesë më të suksesshme të punës së këtij mediumi.
“SPPRTK-ja shpreh zhgënjimin e thellë ndaj vonesave nga ana e Kuvendit të Kosovës për të përzgjedhur Bordin e ri të RTK-së, të cilit i ka skaduar mandati për gati tre vjet, gjë që ka ngadalësuar rritën e RTK-së, ka ndikuar në krijimin e situatave të vështira dhe ka sfiduar punën e stafit të saj”, thuhet në reagim.

Një nga bazamentet e një shoqërie demokratike janë mediat e lira, prandaj - potencojnë sindikalistët e RTK-së – “mbesim të bindur se institucionet e Republikës së Kosovës dhe ato ndërkombëtare janë të gatshme të përkrahin kërkesat tona tejet të arsyeshme, e ato janë”:

-sa më shpejtë të zgjidhet Bordi i RTK-së,
-së këndejmi edhe menaxhmenti i ri i RTK-së dhe
-të fillojë seriozisht përpjekja për të siguruar qëndrueshmërinë financiare të RTK-së dhe të spastrohen deri në fund të gjitha dilemat rreth rrugës financiare të këtij institucioni.

“Shprehemi thellë të bindur se punëtorët e RTK-së janë të vetëdijshëm se me vështirësi është arritur deri në këtë shkallë të profesionalizmit dhe nuk do të lejojnë që ajo të shkatërrohet apo të nëpërkëmbet për shkak të ndonjë interesi të ngushtë”, thuhet në komunikatën e Sindikatës.

Presidenti Sejdiu uroi kancelaren Merkel
Presidenti i Republikës së Kosovës, Fatmir Sejdiu i ka dërguar një telegram urimi zonjës Angela Merkel, me rastin e rizgjedhjes së saj Kancelare e Gjermanisë.
“Në emër të popullit dhe institucioneve të Republikës së Kosovës, po Ju shkruaj për t’Jua uruar ngrohtësisht fitoren e Juaj në zgjedhjet nacionale dhe rizgjedhjen e Juaj Kancelare e Republikës Federale të Gjermanisë”, shkruan presidenti Sejdiu në fillim të urimit të tij.

“Dua ta shfrytëzoj këtë rast që t’Jua shpreh, edhe njëherë, mirënjohjen tonë të thellë për angazhimin afatgjatë të Gjermanisë, i cili popullit të Kosovës i ka sjellë paqe dhe prosperitet. Gjersa ne vazhdojmë ta zhvillojmë më tej vendin tonë të ri dhe të pavarur, roli dhe mbështetja që Ju na e keni ofruar do të mbesin përherë tejet të vlefshme për ne”.

Republika e Kosovës, sipas presidentit Sejdiu, është plotësisht e përkushtuar që ta ndërtojë një vend përparimtar, demokratik dhe shumetnik që kujdeset për mirëqenien e të gjithë qytetarëve të tij. “Njashtu, Kosova është e vendosur që ta vazhdojë rrugën e saj drejt integrimit në Bashkimin Evropian dhe në NATO, ndërsa unë mbes i bindur se Gjermania do të vazhdojë të jetë partneri ynë në përmbushjen e këtij misioni”, thekson presidenti në mesazhin e tij të urimit.

Finlanda rikonfirmon mbështetjen për Kosovën
Qeveria, Parlamenti dhe populli i Finlandës, që kanë mbështetur fuqimisht pavarësinë e Kosovës, edhe në të ardhmen do të mbështesin institucionet e Kosovës në ndërtimin e shtetit demokratik sipas standardeve evropiane. Kjo u rikonfrmua në takimet që pati delegacioni i Kuvendit të Republikës së Kosovës, i udhëhequr nga kryetari Jakup Krasniqi me kryeministrin e Finlandës, Matti Vanhanen dhe me zëvendëskryetarin e Parlamentit, Seppo Keriainen.
Gjatë takimit me ta, Krasniqi informoi lidhur me zhvillimet aktuale në vend dhe falënderoi për mbështetjen e deritashme të parezervë të Finlandës gjatë procesit për jetësimin e pavarësisë së Kosovës dhe në ndërtimin e shtetit më të ri demokratik në botë. Në këtë kuadër, Krasniqi potencoi mirënjohjen për kontributin e shquar, pa ekuivoke, të politikanit, diplomatit dhe humanistit, Martti Ahtisaari.

Meqë Kosova tanimë është anëtarësuar në Fondin Monetar Ndërkombëtar dhe në Bankën Botërore, Jakup Krasniqi, kërkoi nga kryeministri finlandez që të ndihmojë vendin tonë për t’u anëtarësuar edhe në Bankën Evropiane për Zhvillim dhe Rindërtim. Po ashtu ai kërkoi mbështetjen e mëtejshme të Qeverisw dhe institucioneve finlandeze në fushën diplomatike, për të realizuar mbështetjen për njohje të reja të pavarësisë së Kosovës edhe nga vendet e tjera, por në mënyrë të veçantë kërkoi përkrahje për të lobuar ndaj shteteve anëtare te BE-se, të cilat ende nuk e kanë njohur Kosovën.

Edhe kryeministri Vanhanen vlerësoi pozitivisht të gjitha arritjet e deritashme të institucioneve dhe të popullit të vendit tonë në përpjekjet për t’u integruar në familjen evropiane. Ai shprehu gatishmërinë për të mbështetur kërkesat e kryeparlamentarit Krasniqi për bashkëpunim të ngushte në të gjitha fushat, sidomos për të nxitur investimet finlandeze në Kosovë.

Delegacioni nga Kosova u takua edhe me zëvendëskryetarin e parë të Parlamentit te Finlandës, Seppo Kääriäinen. Seppo, shprehu gatishmërinë për zgjerimin e mëtejmë të bashkëpunimit midis dy vendeve e dy parlamenteve tona.
Gjatë qëndrimit në Helsinki, Jakup Krasniqi me bashkëpunëtorë do të kenë edhe shumë takime të tjera zyrtare. Të enjten, ata do të takohen me ish-presidentin finlandez e udhëheqës i ekipit negociator ndërkombëtar për statusin politik të Kosovës, Martti Ahtisaarin dhe me kryetarin e Parlamentit të këtij vendi mik, Sauli Ninisto.

Aeroplani ulet dhunshëm për shkak të sulmit nga zogjtë
Një aeroplan i linjës Dyseldorf – Prishtinë është detyruar të ulet dhunshëm pak minuta pas nisjes nga qyteti gjerman, për shkak të një sulmi nga zogjtë.
Boeing 737-700 i kompanisë “Germania Airlines” kishte 80 pasagjerë në bord, por nuk raportohet për të lënduar. Sulmi i zogjve prishi njërin motor. Zogjtë peshonin 75 gramë dhe ishin 20 cm të gjatë.

Zëdhënësi i Unionit të Pilotëve tha se ishte një situatë kritike, porse Boeing-u mund të fluturojë edhe me vetëm një motor. Pas sulmit të zogjve, piloti kishte bërë vendimin e duhur duke e kthyer aeroplanin në Aeroportin e Dyseldorfit.

Kompania do të aranzhojë një fluturim tjetër për pasagjerët kosovarë. /ktv/

Shkupi reagon për djegien e flamurit
Ministria e Jashtme e Maqedonisë ka reaguar pas djegies së flamurit maqedonas disa ditë më parë nga tifozët në Prishtinë, gjatë ndeshjes ndërmjet Prishtinës dhe Vllazënimit.
Në reagimin e MPJ të Maqedonisë mes tjerash thuhet se “në këto momente të ndjeshme çdo hap që ndërmerret duhet të jetë në drejtim të uljes së tensioneve ndëretnike e jo të nxitjes së mëtejshme të tyre”.

Nga ana tjetër, Zyra për komunikim e Maqedonisë në Prishtinë ka kërkuar nga zyrtarët e Kosovës që të ndërmarrin të gjitha masat ligjore ndaj autorëve të veprës penale.

“Besimi i ndërsjellët dhe respekti ndërtohen në afat të gjatë dhe çdo palë duhet të kontribuojë në këtë drejtim. Nga Kosova, si shtet më i ri në rajon pritet që në situata të tilla të demonstrojë kapacitet dhe aftësi, që të veprojë në mënyrë adekuate në drejtim të ndërtimit të marrëdhënieve ndër fqinjësore dhe zhvillimit të stabilitetit rajonal”, thuhet në komunikatën e ministrisë së Jashtme të Maqedonisë.

Parlamentarët evropianë kërkojnë heqjen e vizave edhe për Kosovën
Parlamenti Evropian është duke rritur presionin ndaj Komisionit dhe Këshillit të BE-së që të gjendet mënyra për përfshirjen e Kosovës në procesin e liberalizimit të vizave, njësoj sikurse është duke u bërë edhe për vendet e tjera të rajonit.
Propozimit të raportueses Tanja Fajon nga Komiteti për liri, drejtësi dhe punë të brendshme për përfshirjen e Kosovës në procesin e liberalizimit të vizave i është shtuar edhe raportuesja në Komitetin e politikës së jashtme që Kosovës t’i jepet një “road map”.

Këtë dje në debat në Komitetin e politikës së jashtme e ka propozuar deputetja britanike, Sarah Lutford. Propozimet e deputetëve Fajon nga Sllovenia dhe Lutford nga Britania e Madhe, raportuese përkatëse në dy komitetet e Parlamentit Evropian, përputhen në masë të madhe sa i përket Kosovës.

Në të dyja rastet, ndonëse në mënyra të formuluara ndryshe, thuhet se Kosova duhet të përfshihet në këtë proces pa paragjykuar statusin e Kosovës, ose pa paragjykuar kompetencat e vendeve anëtare rreth njohjes së pavarësisë së Kosovës.

“Kosova nuk duhet të përjashtohet nga procesi i cili përfitojnë shtetet e tjera të Ballkanit Perëndimor dhe komisioni do të duhej menjëherë të niste një dialog për liberalizimin e vizave me Kosovës dhe të caktojë një udhërrëfyes”, shprehet Kontesha Ludford. Në raportin e saj propozohet për Kosovën ky amendament.

“Me qëllim të avancimit të implementimit të agjendës së Selanikut, komisioni duhet të nisë një dialog për liberalizimin e vizave me Kosovën dhe të caktojë një udhërrëfyes (road map) të ngjashëm me ato për shtetet e tjera të Ballkanit Perëndimor. Kjo është pa paragjykim ndaj kompetencave të shteteve anëtare sa i përket njohjes së Kosovës si shtet të pavarur”.

Po ashtu ajo, sikur edhe Fajon, kërkojnë që pos vendimit për heqjen e vizave për Maqedoninë, Malin e Zi dhe Serbinë të merret që tashti vendimi edhe për Shqipërinë dhe Bosnjë e Hercegovinën, i cili do të hynte në fuqi kur këto shtete t’i përmbushin kriteret e nevojshme dhe kur kjo të vërtetohet nga Komisioni Evropian.

Në një debat në Komitetin për politikë të jashtme është mbështetur fuqishëm ideja që edhe Kosova të përfshihet në liberalizimin e vizave në mënyrë që populli i Kosovës të mos mbetet viktimë e ndasive mes shteteve anëtare të BE-së rreth statusit të Kosovës.

Vetëm disa deputetë nga Spanja kanë kundërshtuar përmendjen e Kosovës në çfarëdo mënyre. Por atyre u është përgjigjur deputeti demokristian gjerman Bernd Poselt, i cili ka thënë se “vullneti i shumicës, mbi 75 %, të Parlamentit Evropian kishte mbështetur raportin e deputetit të atëhershëm Joosst Langedijk me të cilin Parlamenti mbështet sovranitetin e Kosovës”.

Hyseni vazhdon lobimin për njohje
Ministri i Punëve të Jashtme i Republikës së Kosovës, Skender Hyseni, ka vazhduar serine e takimeve me homologë të tij, nga vende që nuk e kanë njohur ende Kosovën.
Qëllimi i këtyre takimeve ka qenë lobimi për pavarësinë e Kosovës, ndërsa temë kryesore ka qenë procesi i njohjeve, rëndësia e tij si dhe kërkesa e ripërsëritur e Qeverisë së Kosovës për njohjen e pavarësisë së Kosovës.

Kështu, nё takime tё veçanta, ministri Hyseni ёshtё takuar me ministrin e Punëve tё Jashtme tё Irakut, Hoshyar Zabari dhe me ministren e Punëve tё Jashtme tё Mauritanisё, Naha Mint Mouknass.

Në këto takime, ministri Hyseni homologëve të tij ua ka ripёrsёritur thirrjen pёr njohjen e shtetit tё Kosovёs, ndërsa nga ata ka marrë siguri për përcjellje të kërkesës drejt qeverive të tyre.

Dedaj takohet me Berishën
Kryetari i PLK-së dhe zëvendësministri Punës dhe Mirëqenies Sociale, Gjergj Dedaj, po qëndron për një vizitë pune në Tiranë ku është pritur nga kryeministri i Shqipërisë, Sali Berisha, të cilin e njoftoi për aktivitetin e liberalëve në këtë periudhë të rëndësishme të konsolidimit ekonomik dhe demokratik të shtetit të Kosovës.
Në këtë takim, kryeministri Berisha rikonfirmoi mbështetjen e vazhdueshme të Tiranës zyrtare për Kosovën dhe bashkëpunimin me institucionet e Kosovës, si mbështetje të paqes dhe stabilitetit në rajon.

Në Tiranë, Dedaj u prit edhe nga Presidenti i Shqipërisë, Bamir Topi, dhe ministri i PSHB-së i Shqipërisë, Spira Ksera, të ciline ftoi për një vizitë në Kosovë.

Suksesi i Kosovës, faktor stabiliteti në rajon
Zv/ndihmës sekretari amerikan i Shtetit, Stuart Jones, ka vlerësuar se rajoni i Ballkanit Perëndimor ka ecur përpara, ku të gjitha vendet kanë kaluar nëpër tranzicione dramatike politike, ekonomike dhe shoqërore.
Jones ka theksuar se suksesi i Kosovës si një shtet demokratik, i pavarur, tolerant e shumetnik vazhdon të jetë një faktor i rëndësishëm kritik për stabilitetin në rajon, duke nënvizuar se pavarësia e Kosovës është e pakthyeshme.

Këto komente zyrtari i lartë amerikan i bëri gjatë një senace të Komisionit Amerikan të Helsinkit mbi sfidat, me të cilat përballen vendet e Ballkanit Perëndimor.

Lidhur me zgjedhjet e 28 qershorit në Shqipëri, Jones tha se ato treguan se është bërë përparim i dukshëm krahasuar me zgjedhjet e mëparshme, duke përfshirë përmirësimet në regjistrimin e votuesve, kartat e identifikimit dhe në kornizën ligjore.

Sipas vlerësimeve të ODHIR it, zgjedhjet e 28 qershorit përmbushën shumicën e standardeve, megjithatë nuk arritën të përmbushnin standardet më të larta të zgjedhjeve demokratike, tha Jones.

Bashkimi Evropian, me synimin e tij për t’u zgjeruar e integruar, ka marrë kohët e fundit përgjegjësi më të mëdha për rimëkëmbjen dhe reformimin e Ballkanit. Sfidat e reja në Bosnje Hercegovinë, Kosovë e gjetkë kanë nxitur debate lidhur me rolin e Shteteve të Bashkuara në Ballkan. /VoA/

Gjyqtarët e EULEX-it e mirëpresin punën e KGjK-së
Gjyqtarët e EULEX-it kanë mirëpritur themelimin e Këshillit Gjyqësor të Republikës së Kosovës të cilin e konsiderojnë të jetë një zhvillim i rëndësishëm drejt garantimit të pavarësisë, paanshmërisë dhe profesionalizmit të Gjyqësorit të Kosovës.
Në seancën e parë të mbajtur pas themelimit të Këshillit Gjyqësor të Kosovës, Asambleja e Gjykatësve të EULEX-it miratoi një porosi drejtuar anëtarëve të KGjK-së: “Gjyqtarët e EULEX-it dëshirojnë t’i përgëzojnë anëtarët e KGjK-së për emërimin e tyre dhe ju dëshirojnë shumë suksese në kryerjen e rolit të tyre jetik që e kanë në udhëheqjen dhe administrimin e pushtetit të gjyqësorit të Kosovës”.

“Gjyqtarët e EULEX-it shprehin mbështetjen e tyre të plotë dhe të pakushtëzuar për punën e KGjK-së, dhe gatishmërinë për bashkëpunim me anëtarët e KGjK-së në arritjen e synimeve të përbashkëta të Gjyqtarëve të EULEX-it dhe të KGjK-së – të përmirësojnë dhe forcojnë e Gjyqësorin e Kosovës dhe ta bëjnë atë shumë-etnik, të paanshëm dhe të lirë nga ndërhyrjet politike”, thuhet në porosi.

Asambleja e Gjykatësve të EULEX-it është një trup i pavarur i cili është përgjegjës për menaxhimin e të gjitha çështjeve të lidhura me administrimin dhe punën e gjyqtarëve të EULEX-it, sipas modaliteteve të themeluara nga EULEX-i në Kosovë.

Meta-Pacollit: Koordinim për njohjet e reja të Kosovës
Zëvendëskryeministri dhe ministri i Punëve të Jashtme të Shqipërisë, Ilir Meta ka pritur të martën në një takim të veçantë Behgjet Pacollin, kryetar i Partisë Aleanca për Kosovën e Re, takim i cili u përqendrua në shkëmbimin e mendimeve lidhur me zhvillimet në Kosovë dhe lobingun për njohje të reja të pavarësisë së Kosovës.
“Rikonfirmoj rëndësinë e madhe që ka forcimi i bashkëpunimit të të gjithë institucioneve të Kosovës dhe të politikës në Kosovë me BE dhe SHBA, me qëllim që krahas kësaj përpjekjeje të jashtëzakonshme që po bëhet për forcimin e institucioneve të reja demokratike të këtij shteti të ri, njëkohësisht dhe paralelisht po punohet edhe për përqasjen sa më të shpejtë drejt standardeve evropiane të të gjithë këtyre institucioneve të reja. Kosova është një rast unik ku është krijuar një shtet i ri i cili, njëkohësisht po përgatitet edhe për t’u integruar në BE”, tha Meta pas takimit.

Duke shprehur optimizmin e tij për procesin e pandalshëm të zhvillimeve në Kosovë dhe njohjen e mëtejshme ndërkombëtare të saj, Meta konfirmoi angazhimin për të koordinuar hapat me institucionet e Kosovës dhe faktorë të tjerë relevantë për vazhdimin e lobingut. Po ashtu, shprehu bindjen se pavarësia e Kosovës është e pakthyeshme, i ka kontribuar paqes dhe stabilitetit në gjithë rajonin tonë, dhe se Kosova ecën e sigurt përpara drejt konsolidimit të shtetit, zhvillimit ekonomik dhe integrimit ne strukturat evropiane e euroatlantike.

Pacolli, nga ana e tij, falënderoi Metën, për ndihmën dhe mbështetjen e fuqishme të Shqipërisë për Kosovën, në konsolidimin e shtetit të pavarur e sovran, si dhe të njohjes së saj ndërkombëtare.

“Unë e konsideroj punën e z. Meta si madhështore, kryesisht me vizitën e tij në Kombet e Bashkuara me diplomacinë ndërkombëtare që shkon drejtpërsëdrejti në interes të njohjeve të reja për Kosovën. E di se 80 përqind e punës së kryeministrit dhe ministrit të Punëve të Jashtme të Shqipërisë ka qenë e koncentruar ekskluzivisht për Kosovën për njohjet e reja për Kosovën. Ne duhet të punojmë më shumë me ministrinë e Punëve të Jashtme të Shqipërisë dhe me institucionet shqiptare, të gjejmë mënyrën më të lehtë për të pasur njohje edhe më të mëdha, pasi duhet ta shohim Kosovën shumë shpejt të radhitur me kombet e gjithë botës në Organizatën e Kombeve të Bashkuara”, deklaroi Pacolli. /gazeta start/

Helmimi i nxënësve, Qeveria kërkon përmbajtje
Qeveria e Republikës së Kosovës nëpërmjet një komunikate për media ka bërë të ditur se po përcjell me kujdes rastet e sëmurjes së papritur të rreth 50 nxënësve të shkollës së mesme “Hivzi Sylejmani” dhe shkollës fillore “Selman Riza” të Fushë Kosovës, gjendja e të cilëve konfirmohet se është stabile.
“Ftojmë të gjithë që të përmbahen nga përfundimet e ngutura që mund të sjellin konfuzion dhe panik në opinion. Në të njëjtën kohë, sigurojmë qytetarët që organet kompetente janë duke hulumtuar të gjitha shkaqet e sëmurjes së këtyre nxënësve dhe gjendja është nën kontroll të plotë”, thuhet në deklaratën e Qeverisë.

“Qeveria e Republikës së Kosovës iu dëshiron shërim dhe kthim të shpejtë në bankat shkollore të gjithë nxënësve që janë prekur nga kjo gjendje shëndetësore”, përfundon deklarata. /Telegrafi/

UNMIK: Nuk ndërpritet rasti Balaj-Xheladini
Procesi gjyqësor për rastin e vrasjes së Mon Balajt dhe Arben Xheladinit gjatë protestës së Lëvizjes Vetëvendosje, më 10 shkurt 2007, nuk do të përfundojë me kompensimin, të cilin Zyra Qendrore e OKB-së është e gatshme t’ua ofrojë familjeve të viktimave.
Kështu thonë përfaqësues të administratës së Kombeve të Bashkuara në Kosovë, të cilët theksojnë se, përveç ofrimit të kompensimit, do të vazhdojë dhe procesi penal. Zëdhënësi i UNMIK-ut, Russell Geekie, shpjegoi: “Ka gjithashtu një proces penal. Kjo është ajo që Zyra e prokurorit ia ka vënë Gjykatës së Lartë të Rumanisë për Drejtësi, e cila aktualisht po heton këtë rast”, tha Geekie, për të shtuar se UNMIK-u i ka ofruar mbështetjen e plotë shtetit rumun.

“Natyrisht se UNMIK-u i ka vënë në dispozicion kopjet e të gjitha dokumenteve që ka pasur për këtë rast. Këto u janë dhënë prokurorëve në Rumani”, theksoi Geekie. Ai tha se vetë fakti që OKB-ja ka pranuar t’u ofrojë kompensim familjeve Balaj dhe Xheladini, dëshmon se kjo organizatë është e gatshme të marrë përgjegjësinë për rastin.

Mirëpo, organizatat për mbrojtjen e të drejtave të njeriut kanë shprehur shqetësimin e tyre në lidhje me ofertën për kompensim të OKB-së. Po ashtu edhe Lëvizja Vetëvendosje, atëherë organizatore e protestës, e cilësoi ofertën për kompensim me të holla te familjarët e viktimave si të pritshme, për shkak të, siç thuhet, natyrës së misionit të UNMIK-ut.

Aktivisti i Lëvizjes Vetëvendosje, Glauk Konjufca, tha se kjo administratë po bën përpjekje për ta mbyllur rastin, duke e reduktuar problemin në një problem material. “Ajo çka ka bërë UNMIK-u në këtë rast, është përsëritje e krimit të parë, për shkak se, në vend se të realizohet kërkesa e familjarëve, e ‘Vetëvendosjes’ dhe e gjithë shoqërisë kosovare, që të gjenden ata që kanë kryer krimin e të marrin dënimin e merituar edhe politik, por edhe penal, ata kanë reduktuar problemin në çështje materiale”, u shpreh Konjufca.

Në protestën e 10 shkurtit të 2007-ës, përveç dy viktimave të vrara, ishin lënduar dhe dhjetëra protestues të tjerë. Organizata vendore dhe ndërkombëtare, kohë më parë, kishin kërkuar dënimin e fajtorëve për vrasjen e dy të rinjve shqiptarë, derisa autoritetet kosovare i kishin kritikuar për shkak se nuk kanë bërë një hetim të pavarur për këtë ngjarje. /Radio Evropa e Lirë/Telegrafi/

Kërkojnë nga UNMIK-u që ta pranojë përgjegjësinë
Në një deklaratë për media familjet e Arben Xheladinit dhe Mon Balajt thonë se UNMIK-u ka pranuar verbalisht dhe joformalisht përgjegjësi për vrasjen e Arben Xheladinit dhe Mon Balajt dhe plagosjen e 80 demonstruesve tjerë më 10 shkurt, si dhe “kanë ofruar kompensim për humbjet që na i kanë shkaktuar”.
“Mbi të gjitha ata i kanë kushtëzuar këto duke kërkuar nga ne që të nënshkruajmë një dokument ku heqim dorë nga çfarëdo kërkimi përgjegjësie në të ardhmen për rastin. UNMIK u po e pranon fajin vetëm me kusht që të mos ndiqen për të”, thuhet në këtë deklaratë Familja Xheladini dhe Balaj thonë se një kushtëzimi i tillë është ofendim për to dhe "i prek thellë ndjenjat familjare, dhe që na e rëndon edhe më humbjen e më të dashurve tanë".

Sipas tyre, pranimi i përgjegjësisë duhet të materializohet dhe se pranimi vetëm verbal i fajit nga UNMIK u nuk është i mjaftueshëm.

"Materializimi i këtij pranimi të përgjegjësisë duhet të bëhet duke e dërguar një letër zyrtare në të cilën shprehimisht pranohet përgjegjësia institucionale dhe individuale nga UNMIK u për vrasjen e paprovokuar të Arben Xheladinit dhe Mon Balajt, dhe plagosjen e 80 demonstruesve tjerë. Duke ia hequr imunitetin të gjithë të dyshuarve për këtë rast, përfshirë policët rumun dhe Stiven Kurtisin, komisionerin e atëhershëm të policisë, dhe duke iniciuar procedurë penale kundër tyre", thonë familjet Xheladini dhe Balaj. /QIK/

Seindikata e PK-së së shpejti në EuroCOP
Anëtarësimi i plotë i Sindikatës së Policisë së Kosovës në Konfederatën Evropiane të Policisë – EuroCOP, do të bëhet së shpejti. Kjo u bë e ditur gjatë një konference për media në Prishtinë nga presidenti i këtij institucioni policor, Heinz Kiefer, i cili theksoi se do t’i mbështesë përfaqësuesit e Sindikatës në arritjen e synimeve të tyre.
“Anëtarësimi i Policisë së Kosovës, përkatësisht i Sindikatës në EuroCOP, nuk është ndonjë problematikë, kjo mund të bëhet menjëherë. Ndërsa, anëtarësimi në organizatat e tjera policore, si Interpoli apo Europoli, mund të ketë kritere, të cilat duhet të plotësohen nga Policia e Kosovës. Por, kjo lidhet shumë ngushtë me anëtarësimin e Kosovës në mekanizmat evropianë” ka thënë Kiefer, gjatë një konference për media, të enjten në Prishtinë.

“Duke u nisur nga kjo që unë po e shoh dhe sa funksionale është Policia e Kosovës, Kosova nuk është shumë larg anëtarësimit në këto organizata policore”, tha Kiefer.

Për të qenë pjesë e Bashkimit Evropian, presidenti i Eurocop-it, Kiefer kërkoi nga Qeveria e Kosovës që të krijojë kushte më të mira për Policinë e Kosovës. Ai theksoi se Qeveria kosovare duhet t’i respektojë marrëveshjet e bëra me Sindikatën e Policisë, për një mirëqenie më të mirë për policët.

Aktualisht, është UNMIK-u ai që shkëmben informacione me Interpolin në emër të Kosovës. Ndërkohë, Qeveria e Kosovës është duke përgatitur infrastrukturën e brendshme dhe po lobon për të siguruar votat e nevojshme për anëtarësim në Interpol dhe Europol. /RADIO Evropa e Lirë/Telegrafi/

Jo regjim pa viza pa plotësuar kushtet
Një zyrtar i lartë i presidencës suedeze të Bashkimit Evropian thotë për BBC-në se nuk do të ketë liberalizim të vizave me BE-në pa u plotësuar më parë kushtet e nevojshme.
Ministri suedez i Migrimit dhe Politikave të Azilit të Suedisë, Tobias Billstrom, i tha BBC-së se presidenca suedeze e inkurajon Shqipërinë dhe Bosnjë-Hercegovinën që të përshpejtojnë reformat e domosdoshme me qëllim që kërkesat për vizat të hiqen sa më shpejt të jetë e mundur edhe për qytetarët e tyre.

Duke folur pas një propozimi nga Parlamenti Evropian për përshpejtimin e procedurave ligjore për përfshirjen e të dy vendeve ballkanike në regjimit pa viza të BE-së, zyrtari suedez tha se thelbësore është përqendrimi tek udhërrëfyesi duke vënë në dukje se të gjithë duhet të kenë trajtim të barabartë.

Ai tha se çështja e lehtësimit të vizave për Kosovën, varet nga përgatitjet e saj për të hyrë në këtë proces dhe mbi të gjitha edhe nga vetë BE-ja dhe pesë vendet anëtare të saj që nuk e kanë njohur pavarësinë e Kosovës.

Billstrom tha se Kosova nuk ende ka një marrëveshje për lehtësimin e vizave sepse ajo asnjëherë nuk ka qenë e përfshirë në këtë proces, por shfaqi shpresën e tij se ajo do të mund të hyjë së shpejti në këtë rrugë. /BBC/

Feith fton serbët e Kosovës të dalin në zgjedhje
Përfaqësuesi i Bashkimit Evropian, Pieter Feith në fjalimin e tij në Vjenë të Austrisë në konferencën “Pavarësia e Kosovës dhe Bashkimi Evropian u ka bërë thirrje serbëve të dalin në zgjedhjet e 15 nëntorit.
Feith daljen e serbëve lokalë në zgjedhje e ka cilësuar si një shans për forcimin e multienicitetit në Kosovë.

Feith ka kërkuar që në Kosovë të luftohet më shumë korrupsioni dhe krimi i organizuar.

Ndërkaq, ministri i Financave të Kosovës Ahemt Shala ka kërkuar që bashkësia ndërkombëtare t'i lejojë Kosovës më shumë përgjegjësi për të ardhmen, ndërsa nga BE ka kërkuar liberalizimin e vizave.

Nga ana e tij, drejtori politik në Ministrinë e Punëve të Jashtme të Austrisë, Stefan Lehne ka thënë se sulmet kudër Bashkimit Evropian në Kosovë janë kundërproduktive dhe e dëmtojnë vendin. /rtk/

Organizatat e UÇK-së reagojnë ndaj dënimit të “Grupit të Llapit”
Organizatat e dala nga lufta e UÇK-së kanë reaguar të premten ndaj dënimit me 13 vjet burg për të ashtuquajturit pjesëtarët e “Grupit të Llapit”. Organizatat, siç thuhet në reagim, shprehin shqetësimin e tyre, për vazhdimin e praktikave të UNMIK-ut në Kosovë, nga ana e EULEX-it.
“Për një dekadë me radhë, administrata ndërkombëtare, përmes mekanizmave të ‘drejtësisë’, vazhdimisht ka organizuar komplote kundër luftës çlirimtare të UÇK-së dhe sakrificës së kombit shqiptar për liri”, thuhet në reagimin e këtyre organizatave.

“Dënimin e bashkëluftëtarëve tanë Rrustem Mustafa, Latif Gashi dhe Nazif Mehmeti, e konsiderojmë si akt politik, i cili pos tjerash bazohet edhe në deklarata të rrejshme. Aty ku politika ndikohet, apo gjykatat janë nën trysninë e saj nuk kemi të bëjmë në asnjë mënyrë me zbatimin e normave ligjore – por me krijimin e precedentit juridik që është jo vetëm anakronizëm i zbatimit të drejtësisë dhe ligjeve por kjo krijon një praktikë tepër të fortë të dukurisë së arbitrarizmit dhe subjektivitetit të gjyqësorit”, theksohet më tej në reagim.
Të gjykohen dhe dënohen në emër të popullit, ata që luftuan për lirinë e tij; të gjykohen dhe dënohen me direktiva dhe dosje të përpiluara nga pushtuesi, ata që luftuan atë dhe krimin e organizuar nga ai – sipas këtyre organizatave - është absurde. Një presedan i tillë, sipas tyre, ndodhë vetëm në Kosovë.

“Ne, kërkojmë që këto praktika të marrin fund dhe në Kosovë të vendoset një sistem i drejtësisë i cili do të ndjekë dhe dënoj kriminelët, e jo të ndjekë ata që sakrifikuan për lirinë e vendit tonë”, përfundon reagimi.

Në Gjykatën e Qarkut në Prishtinë, një trup gjykues i përzier, i përbërë prej një gjykatësi kosovar dhe dy gjykatësve të EULEX-it në gjykimin për krime të luftës të lëndës së ashtuquajtur “Grupi i Llapit”, shqiptoi të premten 6 vjet burg për Latif Gashin, 3 vjet burg për Nazif Mehmetin dhe 4 vjet burg për Rrustem Mustafën, të njohur me nofkën Komandant Remi. /Telegrafi/

Gjendja e nxënësve të sëmurë, është e mirë
Situata e nxënësve të sëmurë në Fushë Kosovë, është stabilizuar. Zyrtarë të Qendrës Klinike Universitare të Kosovës njoftojnë se në trajtim mjekësor janë vetëm 2 nxënës, nga 123 që kanë kërkuar ndihmë mjekësore.
Zëdhënësi i Qendrës Klinike Universitare, Shpend Fazliu, tha se gjendja është e qetë dhe se nuk ka pasur ndonjë rast të ri të paraqitur në QKUK. “Edhe këto 2 raste, në bazë të ekspertëve të infektologjisë, janë jashtë rrezikut për jetë, kanë simptomalogji të lehtë dhe pritet të lirohen. Nuk ka arsye për shqetësim në mesin e qytetarëve”, tha Fazliu.

Islam Shabani, drejtori komunal për arsim në Fushë Kosovë, bëri të ditur se mësimi në shkollën fillore dhe atë të mesme të këtij qyteti nuk është duke u zhvilluar sot. Ndërsa, shefi i Zyrës për marrëdhënie me publikun në Policinë e Kosovës, Baki Kelani, theksoi se patrullimet e policisë në hapësirat në afërsi të shkollave janë duke vazhduar.

Sa u përket mostrave, zëdhënësi i Qendrës Klinike Universitare, Shpend Fazliu, tha se janë marrë analizat biokimike te një numër i konsiderueshëm i rasteve dhe se kanë rezultuar në vlera normale. Ndërkaq, sa u përket analizave toksikologjike, ai tha se ato do të dërgohen jashtë vendit. /REL/

Ndarja e ICR-së dhe EUSR-së, spekulim
Zyra e Përfaqësuesit Civil Ndërkombëtar ka hedhur poshtë pohimet se kinse është marrë një vendim për ndarjen e posteve të ICR-së dhe EUSR-së, duke i cilësuar ato si spekulime.
Nëpërmjet një deklarate për media zëdhënësi i ICO-së, Andy McGuffie, ka përgënjeshtruar “raportimet e medias, të cilat sugjerojnë se është marrë një vendim për të ndarë pozitat e ICR-së dhe EUSR-së”, duke i quajtur ato, “plotësisht të pavërteta”.

“Ekzistojnë parashikime të njohura për rishikimin apo renovimin e mandateve individuale. Aranzhimet e tanishme do të vazhdojnë nëse nuk vendoset ndryshe. Në këtë moment nuk ka arsye për spekulime”, përfundon deklarata. /Telegrafi/

Gjini: Deputetët janë shndërruar në makina votimi
Shefi i Grupit Parlamentar të AAK-së, Ardian Gjini ka akuzuar Qeverinë se po dikton agjendën e Kuvendit të Kosovës. Akuzat u bënë, pas heqjes nga rendi i ditës të disa çështjeve në Kuvend dhe ndërprerjes së seancës së parafundit, për shkak të mungesës së kuorumit.
Gjini ka reaguar ndaj mungesës së ministrave dhe zyrtarëve të tjerë qeveritarë në seancat e parlamentit gjatë kësaj jave. Sipas tij, kjo ka ndikuar që të shtyhen seancat parlamentare dhe të pamundësohet shqyrtimi i shumë çështjeve të rëndësishme, siç është debati për korrupsionin apo tërheqja e disa ligjeve.

Gjini, duke marrë për bazë zhvillimet e fundit në kuvend tha se Parlamenti po vazhdon të dominohet nga qeveria. “Në këtë mënyrë ne shohim si një zënie peng të sistemit të shtetit në Kosovë. Demokracitë parlamentare nuk funksionojnë nëse qeveria e mbisundon kuvendin e Kosovës, siç është përmendur edhe nga zyrtarë të lartë ndërkombëtarë. Ne mendojmë se duhet të ketë edhe reagim të shoqërisë kosovare, përpos partive në opozitë. Duhet të ketë reagim të mungesës se kuorumit në momente kyçe”, ka ai.

Deri te kjo situatë ka ardhur, siç tha Gjini, për shkak se koalicioni Qeverisës i ka shndërruar deputetët në makina votimi. “Partitë në pushtet i kanë shndërruar deputetët e vet në makina votimi dhe nuk ndiejnë nevojë që në kuvend të debatohen çështjet dhe të jenë përgjegjës, sepse i kanë shndërruar deputetët në makina votimi dhe nuk ndiejnë rrezik se ata deputetë do t’i marrin ndonjëherë në përgjegjësi”, ka theksuar Gjini. /RTK/Telegrafi/

Meta kërkon nga Egjipti dhe Siria të njohin Kosovën
Zëvendëskryeministri njëkohësisht dhe ministër i Punëve të Jashtme, Ilir Meta, ka pritur të premten në takime të ndara, ambasadoren e Egjiptit në Shqipëri, Amina Imam Gomaa dhe ambasadoren e Republikës Arabe të Sirisë në Shqipëri me rezidencë në Athinë, Houda Al Houmsi.
Marrëdhëniet miqësore, zgjerimi i mëtejshëm i tyre dhe njohja e Kosovës ishin çështjet kryesore që u diskutuan gjatë këtyre takimeve.

Meta vlerësoi lidhjet historike mes Shqipërisë dhe Egjiptit, rolin e Egjiptit në botën arabe duke theksuar marrëdhëniet shumë të mira mes dy vendeve dhe shprehu gatishmërinë për t’i zgjeruar ato më tej, në të gjitha fushat e bashkëpunimit.

Gjithashtu, Meta i shprehu Ambasadores Gomaa, dëshirën për të parë Egjiptin të rreshtuar në anën e shteteve që kanë njohur pavarësinë e Kosovës, që do i shërbejë stabilitetit të rajonit.

Nga ana e saj, Ambasadorja Gomaa falënderoi u shpreh se “qeveria egjiptiane po i ndjek me vëmendje zhvillimet në rajonin tonë, veçanërisht në Kosovë si dhe qëndrimet e shteteve të ndryshme ndaj njohjes së pavarësisë së saj”.

Po të premten Meta u takua dhe me Ambasadoren e Republikës Arabe të Sirisë në Shqipëri me rezidencë në Athinë, Houda Al Houmsi. Meta i kërkoi Ambasadores Al Houmsi që emri i Sirisë të jetë pjesë e listës shteteve që njohin pavarësinë e Kosovës.

Ambasadorja Al Houmsi, tha se “Siria do të jetë shumë e gatshme për të bashkëpunuar me qeverinë e re shqiptare dhe do të përshpejtojë përfundimin e procedurave ligjore të marrëveshjeve që janë në proces”. /NOA/Telegrafi/

UP-ja hap edhe një konkurs për pranimin e studentëve
Universiteti i Prishtinës ka hapur edhe një afat të ri për pranim të studentëve në shumicën e njësive akademike të tij. Sipas drejtuesve të këtij institucioni ky vendim është marrë për arsye se në shumë fakultet kanë mbetur vende të lira.
Me këtë konkurs i treti me radhë për këtë vit do të pranohen 3 mijë e 748 studentë, prej të cilëve 3 mijë e 411 të rregullt dhe 337 me korrespodencë. Gjithashtu në këtë afat do të pranohen edhe 359 studentë të jashtëm dhe 15 nga minoritetet në Kosovë.

Konkursi mbetet i hapur nga dita e sotme e deri më 9 të këtij muaji. /ktv/

Hyseni paralajmëron njohje të reja
Ministri i Punëve të Jashtme, Skënder Hyseni, ka deklaruar pas kthimit nga New Yorku, se ka shenja për njohjen e Kosovës edhe nga 4-5 shtete të reja, por nuk ka përmendur emra konkretë dhe as kohën se kur mund të ndodhë një gjë e tillë.
Në një konferencë për media, ministri Hyseni ka thënë se gjatë qëndrimit në New York ka zhvilluar takime të shumta me përfaqësues të shteteve të ndryshme, të cilët i ka njohur me zhvillimet në Kosovë, si dhe ka kërkuar njohjen e menjëhershme të Kosovës.

Ai ka thënë se ministri i Jashtëm i Irakut ka deklaruar se njohja e Kosovës nga ana e Irakut nuk ka të bëjë me Kosovën, por me çështje të brendshme të këtij shteti.

Ndërkaq paralajmërimet e shefit të diplomacisë serbe, Vuk Jeremiqit, për 30 njohje të reja të Kosovës, i ka quajtur si pjesë të lojës së Serbisë për të thënë më vonë se Beogradi zyrtar i ka parandaluar këto njohje.

Hyseni ka përkujtuar se që nga shpallja e pavarësisë asnjëherë nuk ka pasur njohje masive, por vetëm njohje individuale të pavarësisë së Kosovës. /rtv21/

Remi: Nuk jemi fajtorë
Pjesëtarët e të ashtuquajturit “Grupi i Llapit”, në mesin e të cilëve është edhe deputeti i Kuvendit të Kosovës, Rrustem Mustafa, e cilësuan si të padrejtë, të papritur dhe të influencuar vendimin e Gjykatës së Qarkut, e cila, nën akuzat për krime lufte, dënoi Rrustem Mustafën me 4 vjet burg, Latif Gashin me 6 vjet burg dhe Nazif Mehmetin me 3 vjet burg.
Në një konferencë për media, në të cilën, përveç Gashit, ishin të pranishëm dy të dënuarit e tjerë dhe avokati mbrojtës i tyre, deputeti Mustafa tha se ndihet i pafajshëm dhe shprehu bindjen se në vendimin e trupit gjykues ka pasur ndërhyrje nga jashtë - ndërhyrje këto të cilat ai nuk deshi t’i precizojë.

“Sot, mendoj se ka qenë një ndërhyrje e gabueshme në drejtësi. Është një ndërhyrje nga jashtë. Ka qenë një ndërhyrje që s’e kemi pritur. Është një ndërhyrje e padrejtë. As unë, as zoti Latif Gashi, i cili sot veç shkon në vuajtje të dënimit, dhe as Nazif Mehmeti nuk e ndjejmë veten fajtorë”, tha Mustafa.

“Nuk jemi pjesë e asaj që shkruan sot në aktgjykim“, shtoi ai, duke shprehur bindjen se vendimi final i Gjykatës Supreme për këtë çështje do të shkojë në favor të tij dhe dy të dënuarve të tjerë, Latif Gashi e Nazif Mehmeti.

Deputeti i Kuvendit të Kosovës nga radhët e Partisë Demokratike të Kosovës, Rrustem Mustafa, beri të ditur se do të vazhdojë punën e tij si deputet në legjislativin kosovar.

“Lidhja ime me Parlamentin e Kosovës është ajo që ka qenë. Unë jam deputet i Kuvendit të Republikës së Kosovës. Ju e dini se në cilën fazë jemi - jemi në fazën e një vendimi, i cili nuk është i plotfuqishëm. Është dhe një shkallë tjetër. Ne sot kemi filluar t’i bëjmë ankesat e nevojshme dhe do të shfrytëzojmë rrugët ligjore, për të cilat kemi luftuar dhe i kemi sjellë deri këtu”, tha ai. /Radio Evropa e Lirë/Telegrafi/

Koordinimi EULEX-Serbi fillon më 7 tetor
Policia e EULEX-it planifikon që në fillim të tetorit ta mbajë një takim me policinë e Serbisë për t’u pajtuar lidhur me mënyrat e zbatimit të marrëveshjes teknike për bashkëpunim policor, e cila kohë më parë është nënshkruar mes EULEX-it dhe Ministrisë së Brendshme të Serbisë.
Karin Limdal, zëdhënëse e Komponentit të Policisë të EULEX-it, ka shpjeguar natyrën e këtyre takimeve: “Siç kemi njoftuar më herët, policia e EULEX-it planifikon që në fillim të tetorit ta mbajë një takim me policinë e Serbisë për t’u pajtuar lidhur me mënyrat e zbatimit të marrëveshjes teknike. Ky takim është konfirmuar për datën 7 tetor në Beograd në të cilin do të diskutohen anët praktike të marrëveshjes teknike”.

Kjo marrëveshje teknike, sipas saj, do ta përmirësojë bashkëpunimin rajonal për luftimin e krimit, si dhe për përmirësimin e komunikimit.

Limdal ka shtuar po ashtu se, Qeveria e Kosovës është e informuar lidhur me këtë takim.
“EULEX-i konsultohet nga afër me Qeverinë e Kosovës për të gjitha çështjet që janë të lidhura me mandatin e tij, e që kanë për qëllim të sigurojnë përfitime konkrete për gjendjen e sundimit të ligjit në Kosovë”, ka thënë ajo. /Telegrafi/