Kosovë

Kosovë
Këtu të gjitha lajmet rreth Kosovës

Arrestohen 4 serbë për krime lufte
Policia e EULEX-it, e mbështetur nga policia e Kosovës dhe KFOR-i, arrestoi 4 serbë të Kosovës, nën dyshimin për krime lufte.

Misioni i Bashkimit Evropian për Sundim të Ligjit në Kosovë (EULEX) njoftoi se ka arrestuar sot në mëngjes katër qytetarë serbë të Kosovës, nën dyshimin se kanë kryer krime kundër shqiptarëve, gjatë luftës së vitit 1999 në Kosovë.

"Në një operacion të zhvilluar sot në mëngjes në zonën e Gjilanit, Policia e EULEX-it, e mbështetur nga policia e Kosovës dhe KFOR-i, arrestoi 4 serbë të Kosovës, nën dyshimin për krime lufte. Arrestimi i tyre u urdhërua nga një prokuror i EULEX-it, nën autoritetit e të cilit po vazhdon hetimi", ka njoftuar Karin Limdal, zëdhënëse e EULEX-it për polici, nëpërmes një komunikate për shtyp.

Zëdhënësi i Policisë së Kosovës, Baki Kelani, saktësoi për Express se të arrestuarit janë nga komuna e Novobërdës. "Arrestimi është bërë sot në mëngjes nga Policia e Kosovës, në bashkëpunim me EULEX-in", shtoi ai.

Sipas tij, aksioni ishte duke vazhduar ende në orët e paradites. Informacione më të detajuara për aksionin, identitetin e të arrestuarve dhe akuzat me të cilat ngarkohen ata, do të jepen më vonë gjatë ditës.

Kurse agjencitë serbe të lajmeve, kanë njoftuar se gjatë operacionit janë arrestuar pesë persona: Svetlana Stojanovic nga fshati Bostan, Dobrivoje Trajkovic, Slobodan i Srecko Martinovic nga fshati Plavicë dhe Srdan Filic nga Jasenoviku.

Por njëri prej tyre thuhet se është arrestuar për shkak të përpjekjeve për të penguar operacionin e sotëm.

Agjencia serbe e lajmeve, Tanjug raporton se aksioni është ndërmarrë në orën 6:30 dhe se në të nuk kanë marrë pjesë policët e Kosovës, por vetëm ata të EULEX-it.

Pasdite, serbët lokalë kanë organizuar një protestë kundër arrestimeve të sotme. "Sot ne orën 14, në fshatin Bostan, në afërsi të kishës, është mbajtur një protestë e qetë e qytetarëve serbë, për shkak të arrestimeve që janë bërë nga ana e EULEX-it. Protesta ka kaluar pa asnjë incident. Patrullat policore kanë qenë në afërsi të vendit ku është mbajtur protesta", tha Ismet Hashani, zëdhënës i Policisë së Kosovës për rajonin e Gjilanit.

Komisioni Evropian ndanë 103.6 mln euro për Kosovën
Kryeministri Hashim Thaçi dhe shefi i Zyrës Ndërlidhëse të KE-së, Renzo Daviddi nënshkruan të premten një marrëveshje financimi prej 103.6 milionë euro për zhvillimin socio-ekonomik dhe institucional, sipas Instrumentit të Paraanëtarësimit, programi vjetor për 2009.

Davidi me këtë rast tha se, kjo përkrahje është e dedikuar për të përmirësuar jetën e përditshme të popullit të Kosovës. Ai tha se Komisioni llogaritë tek autoritetet e Kosovës që ata do të ofrojnë menaxhimin e duhur ekonomik, disiplinën e vazhdueshme fiskale dhe koordinimin efektiv me donatorët për të bërë këtë dedikim një sukses të vërtetë.

Kryeministri Hashim Thaçi ndërkaq, tha se këto projekte të financuara nga ana e Komisionit Evropian përputhen plotësisht me prioritetet e Qeverisë së Republikës së Kosovës. Si rrjedhojë edhe investimet – sipas tij – do të jenë në fushën e sundimit të ligjit, administratës publike, transportit, energjisë, arsimit dhe shëndetësisë.

Me nënshkrimin e kësaj marrëveshjeje, Komisioni Evropian ka përmbushur 80 përqind të zotimit të bërë në Konferencën e donatorëve në korrik të vitit të kaluar ndaj Kosovës. Pjesa e mbetur e zotimit do të ofrohet me kornizën e programit të Instrumentit të Para-Anëtarësimit –IPA2010, i cili do të startojë pas publikimit të Raportit të Progresit dhe Studimit në tetor të këtij viti.

1.000 policë e braktisin punën
Rreth 1.000 pjesëtarë të Policisë së Kosovës deri më tash e kanë lënë punën si pasojë e kushteve jo të mira që iu ofron ky institucion. Megjithatë, disa prej tyre edhe pse e kanë lënën punën, janë rikthyer përsëri në detyrën zyrtare, sepse këtë ua mundëson një rregullore e brendshme e Policisë së Kosovës.
Arbër Beka, zëdhënës i Policisë së Kosovës, ka deklaruar për të përditshmen “Infopress” se, arsyeja e braktisjes së punës nga ana e policëve është çështja ekonomike.

Policinë e Kosovës, përveç që e braktisin oficerët e thjeshtë, atë e lënë edhe zyrtarë të graduar. Madje ka raste kur punën në polici e lanë lënë edhe policë me gradën kapiten dhe ekspertë të tjerë të lëmive të caktuara.

Sidoqoftë, një rregullore e brendshme e Policisë së Kosovës, mundëson që pjesëtari i PK-së të kthehet në detyrë, nëse i bije pishman për veprimin që e ka ndërmarrë.

“Nëse polici shpreh dëshirë të rikthehet në detyrë akoma pa i mbushur një vit prej ditës kur e ka lënë punën, i njëjti kthehet në pozitën e njëjtë që ka qenë, mirëpo nëse kalon më shumë se një vit, atëherë duhet t’u nënshtrohet procedurave të rregullta testuese, për të ardhur deri në pozitën që ka qenë”, bëjnë të ditur zyrtarët për informim në PK.

Numri i policëve që e kanë braktisur punën brenda një dekade është jashtëzakonisht i lartë, mirëpo zyrtarët policorë shpresojnë se në të ardhmen do të këtë kushte më të mira të punës për të gjithë punonjësit në polici.

Walker në El Salvador për ta zhbllokuar njohjen e Kosovës
Ish-shefi i misionit verifikues të OSBE-së në Kosovë, William Walker, është nisur të dielën drejt El-Salvadorit për të zhbllokuar procesin e njohjes së Kosovës.
Ky vend qysh në prill të këtij viti kishte deklaruar se do ta njihte pavarësinë e Kosovës, sapo të bëhej inaugurimi i presidentit të ri më 1 qershor, po ky vendim është bllokuar për shkak të protestimit nga Serbia.

“Një delegacion i Serbisë ka shkuar në El Salvador menjëherë të nesërmen kur unë dhe zoti Behgjet Pacolli e kemi përfunduar turneun lotues në këtë vend. Ata kanë bërë presion te Qeveria salvadoriane që të mos e njohë Kosovën, megjithatë unë do të shkoj dhe do ta zhbllokoj këtë punë’, ka thënë Walker për të përditshmen “Lajm” para nisjes drejt këtij shteti.

Kosovën, që nga 17 shkurti i vitit 2008, kur vendi ynë shpalli pavarësinë, e kanë njohur 62 vende anëtare të OKB-së. Megjithatë, në kohën e fundit, procesi i njohjeve ka ngecur.

Jo njohje por bashkëpunim me Kosovën
Askush nuk kërkon nga Serbia të njohë Kosovën, por nevojitet një bashkëpunim rajonal, ka vlerësuar ambasadori gjerman në Beograd, Wolfram Maas i pyetur nëse në rrugën e asociimit të Serbisë drejt BE-së kusht do të jetë edhe njohja e Kosovës.
"Nga Serbia si dhe nga çdo vend i cili synon t’i bashkohet BE-së, pritet që të bashkëpunojë në rajon në mënyrë konstruktive, me të gjithë e fqinjët, por kjo nuk do të thotë se do të kërkohet edhe njohja e Kosovës", ka thënë Maas për gazetën "Dnevnik".

Krimi rrezikon stabilitetin dhe integrimin e Ballkanit
Zv/presidenti i Komisionit Evropian, Jacques Barrot ka deklaruar se krimi i organizuar nuk është çështje që ka të bëjë vetëm me Ballkanin, por ka shtuar se në Evropën Juglindore ai ka peshë të veçantë, sepse vë në pikëpyetje stabilitetin e kësaj pjese të Evropës dhe procesin e integrimi të saj në BE.
Barrot, i cili po merr pjesë në konferencën “Përballja me sfidat e krimit të organizuar dhe veprat e rënda penale në territorin e Ballkanit Perëndimor“, që ka filluar të hënën në Beograd, ka thënë po ashtu se, përmes territorit të Ballkanit çdo vit kontrabandohen rreth 100 tonë të heroinës, në vlerë prej 416 milionë eurosh.

Andaj, sipas tij, testi i vërtetë i efikasitetit të një shteti në luftën kundër mafies, do të jetë forcimi i gjyqësisë dhe konfiskimi i pasurisë së kriminelëve.

Sikurse është paralajmëruar, në këtë konferencë po marrin pjesë përfaqësuesit e lartë të policive, gjyqësive dhe prokurorive të 16 vendeve të rajonit dhe me gjerë, por jo edhe Shqipëria e Kosova.

Kosova, hapa pozitivë për harmonizimin e ligjeve
Kosova ka bërë hapa pozitivë sa i përket adaptimit të ligjeve për turizmin dhe mbrojtjen e ambientit me ato të BE-së, megjithatë, mbetet punë për t’u bërë.
Në një debat të organizuar nga Instituti për Studime të Shkencave Organizative-Aplikative “Pjetër Budi”, me temë “Politikat dhe legjislacioni i mjedisit dhe perspektivat e zhvillimit të turizmit në Kosovë”, të pranishmit kanë dhënë informacionet për punën që është bërë, por edhe për problemet e mëdha që përballet vendi sa i përket mbrojtjes së ambientit.

Zyrtarët nga Departamenti i Turizmit në Ministrinë e Tregtisë dhe Industrisë ka thënë se janë duke bërë përpjekje për të vendosur në çdo pikë kufitare softëera për të verifikuar numrin e turistëve që vijnë në Kosovë.

Ky debat është organizuar në kuadër të Ditës Botërore të Turizmit. /ktv/

BB vlerëson lart MSH-në për angazhimet për gripin A-H1N1
Ministri i Shëndetësisë, Alush Gashi, ka pritur të hënën një delegacion të Bankës Botërore, i cili po qëndron në Kosovë për disa ditë për të mbikëqyrë situatën rreth kontrollit të Gripit A H1N1 dhe përgjigjen ndaj pandemisë.
Misioni është duke u udhëhequr nga Ibrahim Haçkaj dhe në përbërje të tij janë edhe Nedim Jaganjac, specialist i lartë shëndetësor, Dionisis Panagiatatos, spacialist i lartë për shëndetin veterinar, Silvia Mauri, zyrtare për projekte, Edon Vrenezi zyrtar i operacioneve, Arben Maho, specialist i prokurimeve dhe Ida Muhoho, analiste e menaxhimit financiar.

Gjatë këtij takimi është biseduar për përgjigjen që kanë dhënë institucionet shëndetësore të Kosovës ndaj pandemisë së Gripit A H1N1, masave të ndërmarra preventive, sigurimin e medikamenteve dhe procedurave për porosinë e vaksinës.

Delegacioni i BB-së, sisç thuhet në një komunikatë të kësaj ministrie, e ka çmuar lart MSH-në për angazhimin për menaxhimin e situatës së gripit në Kosovë si për masat e ndërmarra në kufi, informim të opinionit, sigurim të Tamiflusë dhe përgatitjet në tri nivelet e sistemit shëndetësor.

Ministri Gashi e ka informuar delegacionin e Bankës Botërore për të gjitha masat e ndërmarra, ekskluzivisht sipas rekomandimeve të OBSH-së. Përveç sigurimit të medikamentit Tamiflu, masave preventive dhe komunikimit me publikun, ministri ka theksuar se të premten Kosova do të startojë edhe me laborator për analizën e mostrave të dyshuara për Gripin A H1N1 dhe ka theksuar se fokusi i institucioneve kosovare nuk është vetëm krijimi i këtij laboratori, por që ky laborator të jetë referent për vendet e rajonit dhe i certifikuar.

Gashi po ashtu ka thënë se, MSH do të vazhdojë bashkëpunimin me OBSH-në, Bankën Botërore dhe organizata të tjera, derisa zyrtarët e BB-së, kanë ofruar mundësinë e bashkëpunimit në lehtësimin e procedurave të ndryshme në sigurimin e vaksinave dhe çështjet të tjera që kanë të bëjnë me Gripin e derrave.

Policia e hapur, Prokuroria e mbyllur
Lëvizja FOL, Nisma e të Rinjve për të Drejtat e Njeriut (YIHR) dhe Qendra për Politika dhe Avokim (QPA), të hënën, me rastin e Ditës Ndërkombëtare të së Drejtës për të Ditur, kanë shpallur institucionin më të hapur dhe institucionin më të mbyllur në Kosovë.
Përderisa mirënjohja për institucionin më të hapur i takoi Policisë së Kosovës, e cila i është dorëzuar zëdhënësit të PK-së, institucioni më i mbyllur është shpallur Prokuroria Publike e Kosovës, mirëpo aktivistët e kësaj nisme nuk janë arritur që certifikatën t’ia dorëzonin kryeprokurorit Hilmi Zhitia, ngase – sipas tyre - nuk kanë arritur të gjejnë adresën e tij.

Dita Ndërkombëtare të së Drejtës për të Ditur shënohet në vende të ndryshme të botës dhe paraqet një veprim kolektiv të shoqërisë civile për të fuqizuar kërkesat për qasje në informacion zyrtar. Ky është viti i dytë që praktika e shpalljes së institucionit më të hapur edhe atij më të mbyllur, që është një karakteristikë e kësaj ditë, po bëhet edhe në Kosovë.

Thaçi i kënaqur nga lobimi për Kosovën në Nju Jork

Kryeministri i Kosovës, Hashim Thaçi përshëndeti aktivitetin lobues për më shumë njohje të pavarësisë së Kosovës që e kanë bërë presidenti Fatmir Sejdiu dhe ministri i Jashtëm, Skënder Hyseni gjatë javës së kaluar në Nju Jork. Ai u shpreh se pret që angazhimet e lidershipit kosovar gjatë takimeve në margjina të punimeve të Asamblesë së Përgjithshme të OKB-së, do të rezultojnë në shtimin e numrit të njohjeve ndërkombëtare për Kosovën.
“Ka qenë një lobim shumë i fuqishëm shtetëror nga Presidenti dhe Ministri i jashtëm dhe unë dua të besoj se qëndrimet të cilat i ka prezantuar Presidenti nga takimet që ka pasur me lidershipin botëror nga Presidenti Obama dhe liderët tjerë botërorë, kanë qenë takime që do të kontribuojnë drejtpërdrejt në avancimin e procesit të njohjeve të pavarësisë së Kosovës”, deklaroi Hashim Thaçi, kryeministër i Kosovës.
I ndodhur në inspektimin e punimeve të autostradës Prishtinë- Mitrovicë, shefi i qeverisë së Kosovës u shpreh se, megjithatë, lobimi më i mirë për pavarësinë janë ato që ai i quajti punë të mira që po në Kosovë.
“Njohjet më të mëdha për Kosovën ndodhin pikërisht duke u nisur nga suksesi që kemi në Kosovë, nga kjo punë e cila është duke u bërë anekënd Kosovës, nga puna e mirë, nga qeverisja e mirë, sundimi i ligjit, lufta kundër korrupsionit, kundër krimit të organizuar, respektimi i minoriteteve”, theksoi Thaçi.
Sapo është kthyer nga Nju Jorku, Presidenti Sejdiu qe shprehur se pret rezultate të shpejta pozitive për njohjen e Kosovës nga ana e shteteve Malavi, Pakistani, Katari e Kuvajti.
Procesi i njohjeve është ngadalësuar për shkak se shtetet që nuk e kanë bërë ende këtë po presin opinionin këshillëdhënës nga Gjykata Ndërkombëtare e Drejtësisë rreth ligjshmërisë së shpalljes së shpalljes së saj. Deri më tani pavarësinë e Kosovës e kanë njohur 62 shtete.

"Serbia të njohë Kosovën para se të hyjë në BE"
Partitë partnere të koalicionit qeverisës gjerman kanë mendime të ndryshme për marrëdhëniet me Kosovën dhe Serbinë.
E hënë, 28 Shtator 2009 14:29


Kur bëhet fjalë për marrëdhëniet me Kosovën dhe Serbinë, dy partitë e ardhshme qeverisëse gjermane kanë mendime të ndryshme. Liberalët gjermanë kanë mirëkuptim, meqenëse shkëputja e Kosovës për Serbinë është një pikë e dhimbshme. Ndërkaq, demokristianët thonë shprehimisht: "Nëse Serbia dëshiron të bëhet anëtare e Bashkimit Evropian, paraprakisht patjetër duhet të njohë Kosovën. Ky është parakusht", thotë deputeti i bllokut konservator Klaus Peter Vilsh.

Njohja e aktit të pavarësisë së dikujt për Serbinë është një pjesë e detyrës në rrugën drejt komunitetit demokratik të popujve, konsideron Vilsh.

"Para Serbisë gjendet një rrugë e vështirë, sepse lufta në Ballkan, të cilën e nisin Millosheviqi, nuk ka përfunduar aq moti. Bashkimi Evropian është i gatshëm për normalizimin e marrëdhënieve, por tema e Kosovës është një test për Serbinë. Nuk shoh mënyrë tjetër", hotë Vilsh.

Liberalët porosisin qeverinë e Serbisë që temën e Kosovën nuk duhet vënë në qendër të politikës së tyre. Serbia është në vend rëndësishëm për tërë rajonin, por veç potencialeve të mëdha, ka edhe një sërë problemesh, të cilat në rrugën e saj drejt BE-së duhet zgjidhur. Serbia meriton avancim dhe një zhvillim të mëtejmë, konsideron deputeti liberal në Parlamentin gjerman dhe njohës i rrethanave në Ballkan, Rajner Shtiner. Sikur t'ia dilnim që Kosovën dhe Serbinë në të njëjtën kohë t'i afrojmë me BE-së dhe sikur Serbia dhe Kosova të dakordoheshin se janë pjesë të BE-së, kjo do të ishte një zgjidhje më e arsyeshme. BE nuk do të bëjë më të njëjtin gabim që e bëri me pranimin e Qipros në BE, andaj edhe sot lufton me pasojat", shpjegon Shtiner.

"BE më nuk do ta pranojë asnjë vend në të cilin nuk janë zgjidhur konfliktet ndërrajonale. Ky është një kriter formal i BE-së dhe ai nuk është i drejtuar kundër Serbisë. Pra, para se Serbia të pranohet në anëtërasi, e ky akt, siç duken tani gjërat, ende nuk është para dyerve, konfikti me Kosovën duhet të zgjidhet në cilëndo mënyrë", nënvizon Shtiner

Stinner: Kosova duhet t’i afrohet Evropës
Politikani liberal dhe eksperti për Ballkanin, Rainer Stinner – nuk pret ndonjë ndryshim në politikën e jashtme gjermane kur bëhet fjalë për Ballkanin, respektivisht Kosovën. Stinner, nga partia e të cilit pritet emërimi i ministrit të ri Punëve të Jashtme të Gjermanisë, ka thënë se për politikën e jashtme ekziston një konsensus i madh tek të gjitha grupet parlamentare.
“Nuk llogarisim me ndonjë ndryshim thelbësor as në politikën e zgjerimit të Bashkimit Evropian e as në atë kundrejt Ballkanit”, ka thënë ai në një intervistë për Radion Deutsche Welle.

I pyetur ndërkaq për qëndrimin e liberalëve gjermanë, në kohën kur Kosova është i vetmi vend i Ballkanit Perëndimor, që nuk përmendet në deklaratat e zgjerimit, ndërkohë që Serbia është më afër anëtarësimit në BE, Stinner ka thënë: “Ne tani jemi një ditë pas zgjedhjeve dhe nuk e kemi gati programin e qeverisë. Por Kosova duhet t’i afrohet Evropës, ne e mbështesim atë”.

Serbia, sipas tij, është rrugës për në Evropë. “Ne këtë sigurisht që e mbështesim por edhe ngulim këmbë që Serbia t’i përmbushë të gjitha kriteret dhe kur ta ketë bërë këtë do të përpiqemi ta fusim të gjithë rajonin në Evropë”.

Thaçi: Lobimi është në nivel
Kryeministri i Kosovës, Hashim Thaçi, ka lavdëruar aktivitetin diplomatik lobues për Kosovën në New York, të zhvilluar nga presidenti Fatmir Sejdiu dhe ministri i Jashtëm, Skënder Hyseni. Mirëpo, opozita kritikon institucionet për diplomaci pasive...
Thaçi, siç transmeton Radio Evropa e Lirë, ka thënë se, presidenti dhe ministri i Jashtëm kanë prezantuar Kosovën me sukses dhe si rezultat i këtij lobimi janë premtuar edhe njohje të reja. “Mendoj se presidenti e tha shumë qartë. Ka qenë një lobim shumë i fuqishëm nga presidenti dhe ministri i Jashtëm”, ka thënë Thaçi.

"Unë dua të besoj në qëndrimet, të cilat i ka prezantuar presidenti nga takimet që ka pasur me lidershipin botëror, nga presidenti Obama dhe liderët tjerë botërorë - kanë qenë takime që do të kontribuojnë drejtpërdrejt në avancimin e procesit të njohjes së pavarësisë së Kosovës”, është shprehur ai.

Në anën tjetër, anëtari i Kryesisë së Aleancës për Ardhmërinë e Kosovës, Avni Arifi, ka deklaruar se qeveria dhe presidenti, në vend të aktiviteteve ditore diplomatike, kanë zgjedhur një diplomaci më pasive, duke pritur takime apo forume ndërkombëtare, të cilat, ndonëse konsiderohen të rëndësishme, sipas Arifit, nuk i përmbushin kërkesat e Kosovës, e cila ka nevojë për numër më të madh njohjesh.

Sipas Arifit, Qeveria e Kosovës dhe i tërë aktiviteti lobues kryesisht mbështeten në aktivitetin e miqve tanë ndërkombëtarë.

“Nuk ka punë sistematike të lobimit, nuk ka sistem lobues. Qeveria e Kosovës dhe i tërë aktiviteti lobues kryesisht mbështeten në aktivitetin e miqve tanë ndërkombëtarë. Kundërshtarët e pavarësisë nuk janë aq të ligë dhe përderisa ata janë aktivë në baza ditore, aktiviteti ynë kryesisht është i përqendruar në konferenca të llojit siç është Asambleja e Përgjithshme e Kombeve të Bashkuara”, tha Arifi.

Ndërkohë, kryeministri Thaçi ka thënë se puna e Qeverisë dhe institucioneve në zhvillimin ekonomik dhe rritjen e shkallës së demokracisë në vend, do të jetë lobimi më i mirë për Kosovën.

Sidoqoftë, parti politike, por edhe analistë i kanë sugjeruar në vazhdimësi qeverisë që të shtojë lobimin për njohje të reja, duke angazhuar edhe figura politike nga jashtë, që njihen si përkrahës dhe miq të Kosovës.

Deri tani, një aktivitet të pavarur diplomatik ka zhvilluar edhe kryetari i Aleancës Kosova e Re, Behxhet Pacolli, kurse shumë diplomatë ndërkombëtarë gjatë vizitave të tyre në Kosovë nuk e kanë fshehur se kanë qenë të angazhuar në mbështetje diplomatike për Kosovën, por me nismat e tyre dhe jo të Prishtinës zyrtare.

AAK-ja akuzon Thaçin për ndërhyrje ndaj mediave
Partia opozitare, Aleanca për Ardhmërinë e Kosovës, akuzoi sot kryeministrin Hashim Thaçi, për ndërhyrje në media dhe për kufizim të fjalës së lirë.
Në emër të AAK-së, akuzat i adresoi Donika Kada-Bujupi, deputete në Kuvendin e Kosovës. Në një konferencë për media, ajo tha se në tre muajt e fundit, kanë arritur një mori reagimesh nga personalitete të shquara në adresë të Qeverisë pas kërcënimeve që i bëhen gazetarëve të Kosovës. “... brenda tre muajve, për shkeljen e kësaj të drejte fundamentale në Kosovë, shqetësime në adresë të Qeverisë kanë ngritur edhe mbi 55 organizata vendore dhe ndërkombëtare”, tha Kada-Bujupi, duke përmendur Amnesty International, Freedom of House, Reporteret pa Kufij.

Ndërsa, sipas saj, vetëm këtë vit Asociacioni i Gazetarëve Profesionist të Kosovës ka marrë 11 ankesa nga më të ndryshmet, duke filluar nga censura e lajmeve, kërcënime dhe dhuna ndaj gazetarëve. Ajo ka thënë se “gjendja e rëndë e krijuar në Kosovë, e që rrezikon demokracinë është edhe rasti i fundit më eklatant, kur Qeveria ndërhyn në mediumin publikë – RTK”. /RTK/

Hyseni takoi homologët e tij të Jemenit, Omanit dhe Egjiptit
Edhe gjatë ditës së sotme, ministri i Punëve të Jashtme i Republikës së Kosovës, Skender Hyseni, ka vijuar aktivitetin e ngjeshur diplomatik në New York, në takime me homologë të tij, respektivisht ministra të jashtëm të vendeve që ende nuk e kanë njohur Kosovën.
Kështu, ministri Hyseni pati një takim të veçantë, me ministrin e Punёve tё Jashtme tё Jemenit, Abu Bakr al-Qirbi, në të cilin ministri Hyseni i ka kёrkuar homologut tё tij shqyrtimin e njohjes sё shtetit tё Kosovёs nga Jemeni.

Nga ana e tij, Ministri al-Qirbi e ka falёnderuar Ministrin Hyseni pёr informimin e rregullt rreth zhvillimeve nё Kosovё dhe e ka siguruar atë se Jemeni shumё shpejt do tё vendosё pёr njohjen e pavarësisë së Kosovës, duke theksuar se Kosova e meriton vendin e saj nё organizata tё ndryshme ndёrkombёtare, pёrfshirё Organizatёn e Kombeve tё Bashkuara.

Hyseni ka takuar edhe homologun e tij nga Omani, Yusuf Bin Alaëai Bin Abdullah, në një takim ku ministri Hyseni i ka bёrё thirrje ministrit Bin Abdullah qё sa mё parё tё vendosin pёr njohjen e Kosovёs, shtet të pavarur dhe sovran.

Ministri i Omanit e ka siguruar ministrin Hyseni se, Omani nё kohёn e duhur do tё vendosё marrёdhёniet diplomatike me Republikёn e Kosovёs, pasi nё praktikёn e vet, Omani nuk bёn deklarata formale tё njohjes.

Gjatё qёndrimit nё Nju Jork, Misnistri Hyseni ka takuar edhe Ministrin e Punёve tё Jashtme tё Egjiptit, Ahmed Aboul Gheit.

Berisha pritet të shpallet Qytetar nderi i Prizrenit
Me kërkesë të kryeministrit të vendit, Hashim Thaçi, të mërkurën, Kuvendi Komunal i Prizrenit pritet të propozojë shpalljen e Sali Berishës, kryeministrit të Shqipërisë, Qytetar nderi të kësaj komune.
Siç bën të ditur e përditshmja Koha Ditore, Komiteti për Politikë dhe Financa ka miratuar këtë kërkesë dhe është proceduar që të jetë në rend dite në mbledhjen e KK-së të mërkurën.

Ndërsa Kuvendi i Komunës së Prizrenit pritet të mblidhet në një seancë të veçantë më 5 ose 6 tetor ku do të shpallë Qytetar nderi i Komunës së Prizrenit, kryeministrin e Shqipërisë, Sali Berisha.

Gjatë kësaj kohe është paralajmëruar një vizitë e kryeministrit të Shqipërisë në Kosovë me kërkesë të kryeministrit të vendit, Hashim Thaçi.

Arrestohet një serb për kërcënim të dëshmitarëve
Në lidhje me rastin e blerjes së dëshmive të rreme për transplant organesh gjatë luftës në Kosovë, një serb i Kosovës, Gligor Joçinac, është arrestuar të shtunën në Shtërpcë, ndërsa të hënën Gjykata i caktoi masën e paraburgimit në kohëzgjatje prej 30 ditësh.
Në aktvendimin e gjyqtarit të procedurës hetimore thuhet se ekziston dyshimi i bazuar se i pandehuri ka kërcënuar dëshmitarët e rastit penal. I caktuar sipas detyrës zyrtare avokati mbrojtës Asdren Hoxha ka paralajmëruar ankesë ndaj vendimit të gjykatës.

Sipas mediave elektronike, në shkresat e lëndës thuhet se dy të njohurit e dëshmitarit, i koduar me shifrën B, janë paraqitur te shtëpia e tij dhe i kanë tërhequr vërejtjen se i pandehuri Joçinac iu ka treguar atyre planin për frikësimin e dëshmitarit B, me kërcënim për vrasje lidhur me statusin e tij si dëshmitar kundër vëllait të tij.

Dëshmitari B, sipas shkresave të lëndës, ka raportuar të ketë pranuar një telefonatë nga një person, i cili e identifikonte veten si përfaqësues i Qeverisë serbe, duke ofruar një shumë prej 100 mijë eurosh po që se ai tërheqë fjalët për të dyshuarin e këtij rasti, i cili në fakt është vëllai i të pandehurit, Igor Joqinac.

Policia e Kosovës në qershor të këtij viti kishte arrestuar Igor Juçinac, serb kosovar, Millutin Radanoviq dhe Predrag Zhelkoviq me dyshimet se të njëjtit kishin ofruar shuma të mëdha parash dhe të mira të tjera për dëshmitarët, të cilët rrejshëm do të deklaronin se janë viktima të transplantimit të organeve. /QIK/

Njohjet e reja varen shumë nga vendimi i GJND-së
Në një intervistë dhënë për Radio Kosovën, Erhard Busek, president i Forumit Alpbach tha se kërkesa e Serbisë për bisedime të reja për statusin është jo realiste dhe po bëhet nga zyrtarët serbë për nevoja politike të brendshme.
Ish-nënkancelari austriak në vitet 1991-1995 dhe drejtues shumëvjeçar i Paktit të Stabilitetit tha po ashtu se ndikim vendimtar për njohjet e reja të Kosovës, sidomos të pesë vendeve të Bashkimit Evropian, do të ketë vendimi i Gjykatës Ndërkombëtare të Drejtësisë.

“Kjo varet nga vendimi i Gjykatës Ndërkombëtare të Drejtësisë. Për shumicën e këtyre vendeve arsyeja e mosnjohjes së pavarësisë së Kosovës lidhet me problemet e brendshme që kanë dhe aspak drejtpërdrejt me Kosovën”, ka thënë Busek.

Megjithatë, Busek është i bindur se çfarëdo qoftë vendimi i GJND-së, Serbia nuk do ta ndryshojë qëndrimin ndaj pavarësisë së Kosovës. “Plotësisht jam i bindur për këtë ashtu siç besoj se çfarëdo vendimi i Gjykatës së Drejtësisë nuk do ta ndryshojë qëndrimin e Serbisë për Kosovën. Para pak ditësh isha në Beograd dhe qeveritarët serbë ma thanë hapur se ‘çfarëdo vendimi që të sjellë Gjykata e Drejtësisë në Hagë, qoftë ai edhe pozitiv për Kosovën, ne mbesim të pa lëkundur në qëndrimin tonë’”.

Demaçi: Krenohemi me UÇK-në
Veprimtari i shquar, Adem Demaçi, ka porositur Malin e Zi që të kujdeset për raportet me Kosovën – të cilat, sipas tij, janë në interes të shtetit malazez. Ndërkaq, vendosja e marrëdhënieve diplomatike mes Kosovës dhe Malit të Zi, sipas Demaçit, janë çështje formaliteti.
I dënuari më i famshëm në ish-Jugosllavi, siç e përshkruan e përditshmja e Podgoricës Vijesti veprimtarin Demaçi, ka thënë për këtë gazetë se, përkundër presioneve të forta të Beogradit, marrëdhëniet e Kosovës me Malin e Zi po zhvillohet normalisht dhe në frymën e fqinjësisë së mirë.

Demaçi shpreson se presionet e Beogradit nuk do të pengojnë Podgoricën të vendosë marrëdhëniet diplomatike me Prishtinën. “Sigurisht, Mali i Zi ka interes të madh t’i zhvillojë raportet me fqinjin e saj Serbinë, por gjithashtu, ka interes jo të vogël për marrëdhënie të mira edhe me Republikën e Kosovës”, ka thënë Demaçi për të shtuar se, “nuk është fshehtësi se për këtë gjë janë të interesuar shumë edhe SHBA-të dhe shumica e shteteve të Evropës Perëndimore”.

Demaçi ka thënë po ashtu se në Kosovë ekziston gatishmëria që të plotësohen kërkesat e Podgoricës rreth përfshirjes së pakicës malazeze në Kushtetutën e Kosovës dhe për kthimin e personave të zhvendosur.

Ndërkaq i pyetur rreth akuzave që po bëhen ndaj luftëtarëve të UÇK-së për gjoja krime të luftës dhe tregti me organe njerëzore, Demaçi, i cili ka qenë zëdhënës i UÇK-së, ka thënë se, opinioni i Kosovës me neveri i hedhë poshtë këto akuza, shpifje dhe trillime që i plasohen opinionit të painformuar botëror nga kuzhina çetnike e Beogradit.

“UÇK-ja ishte ushtri kryengritëse dhe çlirimtare me moral të lartë, që ka respektuar konventat ndërkombëtare për luftën dhe sjelljet në luftë. Mu për këtë populli unë krenohet me ushtrinë e vet heroike çlirimtare”, ka thënë ai.

Kryeministri Thaçi uron kancelaren Merkel
Kryeministri i Republikës së Kosovës, Hashim Thaçi i ka dërguar një telegram urimi homologes së tij, kancelares gjermane Angela Merkel, me rastin e fitores së Unionit Kristiandemokrat dhe Kristiansocial (CDU/CSU) dhe Partisë Liberale (FDP) në zgjedhjet parlamentare në Gjermani.
Në telegramin e urimit thuhet: “Me rastin e fitores në zgjedhjet parlamentare në Republikën e Gjermanisë, më lejoni që në emër të Qeverisë së Republikës së Kosovës dhe në emër të qytetarëve të vendit tim t’u përcjell përgëzimet më të sinqerta. Shpreh bindjen se nën drejtimin tuaj, Gjermania, si një ndër shtetet më të fuqishme të Bashkimit Evropian do të arrijë rezultate edhe më të mëdha në të gjitha sferat”.

Thaçi po ashtu thekson se, Qeveria e Republikës së Kosovës dhe të gjitha institucionet kosovare shprehin vullnetin dhe gatishmërinë për thellimin e mëtejmë të bashkëpunimit me qeverinë e drejtuar nga ju. “Qeveria dhe populli i Kosovës vlerëson lartë mbështetjen e shtetit gjerman për Kosovën, në të gjitha periudhat, posaçërisht mbështetjen që Gjermania është duke i dhënë Kosovës në rrugën e integrimeve euroatlantike”, përfundon telegrami.

USAID-i mbështet sistemin e drejtësisë në Kosovë
Agjencia për Zhvillim Ndërkombëtar e Shteteve të Bashkuara të Amerikës, ka lansuar Doracakun për hartime ligjore për Kosovë përmes Programit të saj për mbështetjen e drejtësisë në Kosovë.
Më këtë rast zëvendëskryeministri, Hajredin Kuçi ka thënë se Kosova ka nevojë për një sistem të drejtë juridik, i cili duhet të jetë i përafërt me ato të shteteve të BE-së por jo jashtë kornizave ë gjyqësorit kosovarë.

Sipas tij për të pasur informata në drejtësi duhet të ketë ligje të mira e për të hartuar këto ligje nevojiten profesionist.

Për këtë arsye USAID-i ka organizuar këtë program i cili do të fokusohet në zhvillimin aftësive praktike të hartimit të legjislacionit në përputhje me standardet ndërkombëtare. /KTV/

Serbia ta trajtojë kufirin me Kosovën, si kufi shtetëror
Komisioni Evropian do ta vizitojë kufirin Kosovë-Serbi në mënyrë që të bindet edhe vet se autoritetet e Beogradit e trajtojnë këtë kufi, si secilin kufi shtetëror, bën të ditur RTK.
Këtë gjë e kanë konfirmuar zyrtarët e Komisionit Evropian duke precizuar se vizita do ndodhë në mesin e muajit tetor dhe ka për qëllim të vërtetohet se ne ç’masë po implementohet protokolli i nënshkruar në mes EULEX-it dhe Serbisë.

Kjo u tha gjatë një debati për vizat në Parlamentin Evropian, kur shumica e deputetëve kërkoi që edhe me Kosovën të nisë procesi i dialogut për liberalizim, duke precizuar se ky proces në asnjë mënyrë nuk paragjykon të drejtën e atyre vendeve të BE-së që mos ta njohin pavarësinë.

Pos deputetëve spanjollë, të gjithë të tjerët insistuan se nuk duhet përzier çështjen e njohjes së një shteti me çështjen e mundësisë së lëvizjes së lirë të qytetarëve të të njëjtit.

Raportuesja për Kosovën në Parlamentin Evropian, Ulrike Lunachek, përshëndeti vendimin e Qeverisë së Kosovës që në mënyrë të njëanshme të nisë implementimin e udhërrëfyesit për vizat, dhe insistoi që procesi i liberalizimit duhet të nisë edhe me këtë vend, sepse vetëm ne këtë mënyrë vërtetohet agjenda e Selanikut, kur të gjitha vendet e Ballkanit Perëndimor patën marrë premtimin e perspektives evropiane.

UNDP mbështet luftën kundër korrupsionit në Kosovë
Drejtori i Agjencisë Kundër Korrupsionit, Hasan Preteni, përfaqësuesi i Ambasadës së Japonisë, Tatsuhiko Ichihara, dhe drejtori i UNDP-së në Kosovë, Parviz Fartash, do të nënshkruajnë të mërkurën projekt dokumentin “Partneriteti kosovar për anti-korrupsion”.
Nënshkrimi i këtij dokumenti do të shënojë fuqizimin e bashkëpunimit për arritjen e suksesit të këtij projekti të rëndësishëm, thuhet në një komunikatë të UNDP-së.

Projekti ka për qëllim të rrisë kapacitetet dhe njohuritë e të gjitha institucioneve anti-korrupsion në Kosovë, derisa, në të njëjtën kohë, të përkrahë krijimin e rrjetit anti-korrupsion për të mundësuar shpërndarjen e informatave dhe përvojave që janë specifike për pjesën më të gjerë të Ballkanit.

UNDP, që është e përfshirë në mënyrë aktive në fushën e transparencës dhe llogaridhënies gjatë viteve, do të vazhdojë me ofrimin e përkrahjes në këtë fushë me interes. Projekti është mundësuar me kontribut bujar të qeverisë japoneze në vlerë prej 300,000 dollarësh, qeveri kjo që ka mbështetë fuqishëm zhvillimin e Kosovës që nga viti 1999.

Për ngritjen e FSK-së duhet pritur nga 2 deri në 5 vjet
Udhëheqësit e lartë të NATO-s e kanë hedhur poshtë mundësinë që mospërkrahja e pavarësisë së Kosovës nga ana e disa vendeve të NATO-s, mund të reflektojë në misionin ushtarak në Kosovë. Ata po ashtu kanë mohuar se ka pasur bisedime për ndërtimin e një baze në Kosovë për lëshimin e raketave...
NATO-ja do të mbetet e përkushtuar në Kosovë, tha të martën në Prishtinë admirali Giampaolo di Paola, i cili ka kryesuar një delegacion i Komitetit Ushtarak të NATO-s, gjatë qëndrimit në Prishtinë.

Përfaqësues të këtij komiteti thanë se boshllëku që do krijohet me zvogëlimin e trupave të KFOR-it, do plotësohet nga strukturat vendore e ndërkombëtare të sigurisë.

“Përderisa zvogëlohet prania e KFOR-it në Kosovë, duhet të ketë diçka që e plotëson këtë boshllëk të sigurisë. Policia e Kosovës ka bërë përparime të mëdha dhe ajo e plotëson këtë boshllëk në një masë”, ka thënë ndërkaq, admirali Fitzgerald.

“Ndërsa, Forca e Sigurisë së Kosovës, që është një forcë për mbrojtje civile, plotëson një pjesë tjetër të sektorit të sigurisë dhe natyrisht EULEX-i plotëson një pjesë tjetër të kësaj fushe. Pra, me zvogëlimin e KFOR-it, të gjitha këto struktura do të ndihmojnë për një mjedis të qetë dhe të sigurt”, u shpreh Fitzgerald.

Ndërkaq, komandanti i KFOR-it, gjenerali gjerman, Markus Bentler, tha se FSK-ja tash ka plotësuar vetëm kapacitetet fillestare, kështu që deri në ngritjen e plotë të kësaj force, ai tha se ka shumë punë dhe duhet pritur nga 2 deri në 5 vjet. “Tani fillon puna e rëndë që do të zgjasë nga 2 deri në 5 vjet, në mënyrë që kjo organizatë të ngrihet në këmbët e veta”, tha Bentler.

Admirali Di Paola tha se si misioni ushtarak, ashtu edhe ai i ngritjes së FSK-së, e kanë mbështetjen e të gjitha vendeve aleate. Ai po ashtu mohoi se ka pasur bisedime për ndërtimin e një baze në Kosovë për lëshimin e raketave. “Absolutisht jo”, tha admirali Di Paola, duke iu përgjigjur pyetjes së gazetarëve se a ka pasur bisedime që në Kosovë të ndërtohet një bazë për lëshimin e raketave.

Komiteti Ushtarak i NATO-s realizon vizita të kohëpaskohshme në Kosovë. Kësaj radhe, kjo vizitë realizohet në kohën kur NATO-ja ka paralajmëruar se deri në fund të janarit të vitit 2010, në Kosovë do të mbesin rreth 10 mijë pjesëtarë të KFOR-it.

Njëherësh, gjatë kësaj vizite, ky delegacion do të mund të shohë nga afër edhe të arriturat dhe mangësitë eventuale në procesin e ngritjes së FSK-së, e cila është nën përkujdesjen dhe mbikëqyrjen e NATO-s.