Identifikohen viktimat e aksidentit të autobusit nga Kosova

Gjashtë kosovarë kanë humbur jetën të hënën ndërsa tridhjetë e gjashtë të tjerë janë lënduar në aksidentin e trafikut, që ndodhi mbrëmë afër Vjenës. Autobusi, i cili ishte nisur nga Kosova për në Mynih, u përplas me dy kamionë në një autostradë rreth njëzet kilometra në afërsi të Vjenës.
Të vdekurit, sipas burimeve të Koha.net janë: dy nga tre shoferë shoferët e autobusit, Dragan Mihajloviq nga Komuna e Kamenicës si dhe Ismajl Pajaziti (1963), shofer dhe pronar i agjencisë turistike “Fatoni Reisen”, nga Ferizaj. Ndërsa vazhdon të kurohet në spital shoferi nga fshati Mushnikovë, Komuna e Prizrenit, Ramdan Veliu, i cili gjatë aksidentit ishte duke e vozitur autobusin. Përveç këtyre në aksidentin e së hënës kanë humbur jetën edhe Sadik Dellova (1943), Mehmet Shkodra dhe Bashkim Bytyçi (1974).
Emri i viktimës së gjashtë ende nuk bëhet i ditur.
Me rastin e kësaj tragjedie të rëndë, presidenti, Fatmir Sejdiu, dhe kryeministri i Kosovës, Hashim Thaçi u dërguan ngushëllimeve familjeve të të viktimave, kurse të lënduarve u dëshiruan shërim sa më të shpejtë
Në ngushëllimin e Presidentit Sejdiu ndër të tjera thuhet: “Në këto çaste pikëllimi, ne shprehim solidaritetin tonë të plotë me ju dhe lutemi për shpirtin e bashkëqytetarëve tanë, të cilët pësuan në këtë fatkeqësi të rëndë.
Gjithashtu, ne lusim Zotin që të lënduarit të shërohen sa më parë dhe t’u
kthehen familjeve të tyre”, kurse kryeministri Thaçi në telegramin e tij pasi u shprehi ngushëllimet, në emër të Qeverisë së Republikës së Kosovës dhe në emrin e vet, familjeve që humbën të dashurit e tyre, thekson se “Qeveria e Republikës së Kosovës është në kontakte të vazhdueshme me autoritetet e shtetit të Austrisë për t'iu dalë në ndihmë të aksidentuarve dhe për të zbardhur në tërësi shkakun e aksidentit”