Shqiperi

Shqiperi



Ketu te gjitha lajmet rreth Shqiperis

Partia Socialiste e Shqipërisë zgjedh kryetarin e ri

Vota e socialistëve sot ndahet ne 3 alternativa. Ata qe rizgjedhin Edi Ramën, kryetar partie, votuesit e Maqo Lakrorit dhe bojkotuesit, mbështetës të Ben Blushit. Gjatë momenteve kur hodhi votën e tij, kandidati per kryetar Edi Rama nuk dukej i përfshirë nga ethet e një gare emocionuese që do të përcaktojë udhëheqësin e socialistëve në 4 vitet e ardhshme. Përkundrazi, në një ditë të veçanë për të gjithë socialistët, Edi Rama i lejoi vetes edhe ndonjë detaj ekstravagant në veshje.
Gara eshte reale tha ai pasi votoi, duke premtuar të ndalë në të ardhmen projektin e përbashkët të treshes Berisha-Meta-Nano. "Ky është një proces i natyrshëm dhe njëkohësisht real, dhe për kete arsye ka qenë një proces që ka pasur vështiresite e veta, ashtu sikundër ka qene nje proces të cilin Sali Berisha, Ilir Meta, Fatos Nano, kompania e tyre, altopolantet e tyre kanë bërë çmos që ta përbaltin, qe ta cënojnë, qe ta zhvleftësojnë, sepse është një proces i bukur, real që tregon që në fakt PS-ja është vërtetë forca më e madhe dhe më demokratike në Shqipëri", deklaroi Edi Rama, kryetar në detyrë i Partise Socialiste.
Dritero Agolli, shkrimtar dhe anëtar i PS-së, nuk e bojkotoi votimin e kryetarit socialist. Sidoqoftë, duke parë gjendjen e lidershipit ai ka dashur të këshillojë Edi Ramen, që në këtë mandat të dytë, të bëjë dallimin mes administrimit të Bashkisë dhe udhëheqjes së Partisë. "Partia duhet të ketë një drejtim dhe tjetër lloj nga ekzekutivi, nga organet shtetërore. Duhet që kryetari i partisë të jetë më i afert me njerëzit, më kokëulur, të shprehë dashurinë ndaj të gjithëve", tha Dritëro Agolli.
Maqo Lakrori ka votuar që në orët e para të mëngjesit në njësine ku ishte regjistruar. Gjate ditës ai ka pasur ankesa për persona që e kanë kartën e anëtarësisë së Partisë Socialiste, por nuk figurojnë në regjistra."Uroj që procesi të vazhdojë normalisht dhe në kohën e duhur do të bejme dhe vlerësimin e këtij procesi", tha Maqo Lakrori, kandidat për kryetar i PS-së.
Ben Blushi dhe katër deputetet që nuk e quajnë të denjë këtë proces votimi kanë bojkotuar së bashku me votimin edhe deklaratat publike.


26 09 2009

Berisha: Enciklopedia maqedonase, sulm racist ndaj shqiptarëve

Kryeministri shqiptar Sali Berisha komentoi botimin e Enciklopedisë maqedonase, të cilën e quajti një sulm racist ndaj shqiptarëve. Ai tha se në Nju Jork bisedoi për këtë çështje me presidentin Ivanov, i cili u angazhua për ta korrigjuar këtë botim të Akademisë. “Ishte një shpërthim racist ndaj shqiptarëve duke dëshmuar se ai institucion ka mbetur në stadin e Çubrolloviçit. Shqiptarët nuk kanë pse të inpresionohen nga asnjë ndërhyrje e atyre që kanë probleme me identitetin e tyre. E gjitha doktrina raciste, anti-shqiptare, e vjetër e fqinjve tanë është e bazuar në përpjekjet e kërkimit të identitetit sepse ata që falsifikojnë historinë dëshmojnë se janë në kërkim të identitetit. Shqiptarët nuk janë” tha Berisha.
Por gazetarët e pyeten kryeministrin edhe per shtrembërimet ne tekstin e historise se Shqipërisë së klasës së 12-të, botim për të cilin tha se do kerkojë të korrigjohet. “E kam ndjekur debatin, por nuk kam lexuar tekstin. Historia do shqyrtohet dhe rishkruhet dhe këtu nuk heq asnjë presje, por do shqyrtohet dhe rishkruhet me objektivitet, ndershmëri. Sidoqoftë ministria e Arsimit do ta shqyrtojë çështjen. Pavarësisht nga notat politizuese, që janë shprehje edhe këto të një primitivizmi” tha Berisha.
Këto komente kreu i qeverisë Berisha i bëri pak orë pas mbërritjes nga Asambleja e Përgjithshme e OKB në Nju Jork. Ai me këtë rast i ka rilëshuar rivalit të tij politik Rama, ftesën për t’u kthyer në kuvend. Për kreun e ekzekutivit kjo është dhe sfidë për kryesocialistin që të vërtetojë që nuk është kundër ingrimit në BE dhe liberalizimit të vizave.

Elbasan, vidhen zyrat e Myftinisë së qytetit


Elbasan - Persona ende të paidentifikuar kanë vjedhur gjatë orëve të para të mëngjesit të sotëm, zyrat e Myftinisë së Elbasanit, të cilat ndodhen në lagjen "Aqif Pasha ", të këtij qyteti.
Burime zyrtare të policisë bënë të ditur se “autorët kanë hapur me mjete të forta derën kryesore të zyrave të Myftinisë e më pas kanë marrë kompjuterat dhe pajisje të ndryshme që ndodheshin në këto zyra”.

Sipas Myftiut, Agim Duka autorët kanë mundur të vjedhin gjithashtu edhe disa lekë që ndodheshin në një nga sirtarët e hapur të tavolinave të kësaj Myftinie.Në vendin e ngjarjes ndodhet grupi hetimor që paraprakisht konstaton se autorët kanë patur si qëllim vjedhjen e parave në kasafortën e Myftinisë, por nuk ja kanë arritur dot. Zyrat e Myftinisë së Elbasanit ndodhen në vendin e quajtur “Rruga e Blinave” përgjatë universitetit “ Aleksandër Xhuvani”. Kjo zyrë është zhvendosur në një pallat 10 katësh para dy vjetësh.

Më parë Myftinia i kishte zyrat e saj në xhaminë në qendër të qytetit të Elbasanit. Myftinia e Elbasanit shërben për adiministrimin e të gjitha xhamive që ndodhen në këtë rajon. Vjedhja e zyrave të Myftinisë shënon dhe vjedhjen e parë në vitin e ri 2010, në qarkun e Elbasanit.

Vlorë, grabitet kasaforta e pikës së karburantit

Dy persona ende të paidentifikuar nga policia kanë grabitur mesnatën e të dielës një pikë karburanti në qytetin e Vlorës, ndërsa hetuesit pohojnë se kanë pistat e tyre për këtë ngjarje.
Ngjarja ka ndodhur rreth orës 2:30-3:00 të mëngjesit në një pikë karburanti ne daljë të Vlorës përgjatë rrugës drejt Babicës. Autorët kanë hyrë në pikën e karburantit dhe pasi i kanë kërkuar rojes të mos levizë, kanë marrë me vete kasafortën ku mbaheshin lekët e xhiros ditore.

Policia tha se grabitësit kanë vjedhur rreth 12 milion lekë. Ata i kanë marrë paratë nën kërcënimin e armëve, por pa e lënduar rojen. Ky i fundit ka dëshmuar në drejtorinë e policisë, duke thënë edhe dyshimet e tij. Sipas deshmisë së dhënë nga i moshuari, njëri nga grabitësit i ka ngjarë si person i njohur.

Topi në Lezhë: Situata po tejkalohet


Presidenti i Republikës, Bamir Topi, ka vizituar sot
zonat e përmbytura në zonën e Lezhës. Nga Ishull Shëngjin, kreu i
shtetit ka theksuar se situata po tejkalohet me sukses ndërsa ka
theksuar gjendja është në monitorim të plotë nga ana e shtetit.



“Populli shqiptar ka ditur të përballojë katastrofat natyrore me sukses”, u shpreh Topi.
Presidenti i vendit u ka premtuar banorëve se do të përllogariten
dëmet dhe se do të dëmshpërblehen. “Pushteti vendori do të marrë me
seriozitet dhe do të dëmshpërblehen të gjitha dëmet e shkaktuara”,
vijoi Topi.
Për sa i përket masave mbrojtëse, kreu i shtetit ka deklaruar se për
argjinaturat projekt më i qëndrueshëm. Gjithashtu, presidenti Topi ka
falënderuar forcat e ushtrisë dhe ato të policisë për ndihmën dhe punën
e tyre për të përballuar situatën e krijuar nga reshjet. /gazeta start/

Berisha: Banorët të evakuohen, të shmanget katastrofa


“Jemi para një situate emergjente reale. Potencialisht
katastrofa qëndron si Shpatë e Demokleut. Detyra jonë është të
parandalojmë katastrofën, por kërkoj që zona e Nenshkodrës dhe e Dajçit
të evakuohen. Duhet të përgatitemi për të gjitha situatat”.



Kështu deklaroi në një mbledhje urgjente qeverie kryeministri Sali
Berisha, i cili njoftoi ngritjen e Komitetit të Emergjencës Civile, që
do të koordinojë me autoritetet vendore të gjithë procesin e evakuimit
nga zonat e përmbytyra.
“Banorët duhet të tregohen të matur dhe të marrin vendim për t’u
larguar, pasi qoftë edhe një jetë e humbur është shumë e rëndë për
vendin. Trimëri është të gjesh rrugën për ta përballur me mençuri këtë
situate”, u shpreh kryeministri.
Duke ndare detyrat për ministrat e kabinetit, Berisha kërkoi
impenjim maksimal të Forcave të Armatosura, të drejtuesve të
energjetikës, shëndetësisë, të rrugëve, ndërkohë kërkoi nga vetë
banorët që të japin kontributin e tyre në shpëtimin e gjesë së gjallë,
duke siguruar se strehimi i të evakuuarve do të jetë në kushte optimale.
“Të evakuohet patjetër Nënshkodra, Dajçi, si dhe të merret në
konsideratë Velipoja, Ana e Malit dhe rrethinat”, u shpreh Berisha.
/TCH/

Përmbytjet në Shkodër, nis verifikimi i dëmeve



Një
grup prej 180 specialistësh, të shtunën do të nisë vlerësimin e dëmeve
që u shkaktuan në Qarkun e Shkodrës nga përmbytja më e madhe e shënuar
në dekadat e fundit. Janari i këtij viti nisi "mbrapsht" për
kryeqendrën e veriut, duke zhytur nën ujë mbi 11 mijë hektarë tokë e
përmbytur 2649 banesa. Do jetë Këshilli i Qarkut të
Shkodrës, që do të menaxhojë të gjithë procesin e vlerësimit të dëmeve.
Komisioni Ndërministror, pas një mbledhje disaorëshe në ambientet e
Prefekturës të Shkodrës pasditen e së premtes, përcaktoi dhe planin e
punës për ditët në vazhdim.
Ministri i Brendshëm, Lulzim Basha bëri me dije në një konferencë
për shtyp, tri vendimet kryesore të marra në këtë takim. Sipas tij,
është përcaktuar grupi i punës për vlerësimin e dëmeve, në të cilin
bëjnë pjesë specialistë nga të gjitha institucionet: Pushteti vendor,
ALUIZNI, Ministria e Bujqësisë, Enti Kombëtar i Banesave etj.
Në mbledhje u përcaktuan masat që do të merren në këtë fazë të dytë
të situatës. "Janë përcaktuar qartë detyrat e të gjitha ministrive të
linjave dhe drejtorive përkatëse. Janë përcaktuar masat për ujin e
pijshëm, furnizimin me ushqime për njerëzit dhe bagëtitë. Është
vendosur se për gjënë e gjallë duhet të sigurohet baza ushqimore deri
në mars", ka sqaruar Basha.
Pika e tretë për të cilën është diskutuar në takimin e Komisionit
Ndër-ministror ka qenë paraqitja e projekteve nga njësitë vendore që
kjo situatë përmbytjesh të mos ndodhë më.
"Ne u kemi kërkuar pushteteve vendore që të përgatisin sa më shpejt
projektet që ndihmojnë zonën, duke filluar nga transformatorët,
argjinaturat deri tek by-pass i Shkodrës, i cili do të shpëtojë qytetin
nga përmbytjet", ka thënë Basha.
Ai pohoi se këto projekte do paraqiten në një takim me përfaqësues të BB-së dhe donatorë të tjerë. /Balkanweb/

Shqipëri, 5.600 divorce në vitin 2009



Në
sekretaritë e gjykatave të shkallës së parë në Shqipëri regjistrohen
çdo ditë mesatarisht 15 padi për zgjidhje martese. Viti 2009 konfirmoi
rritje të numrit të divorceve me rreth 7 për qind krahasuar me vitin
2008.
Arsyet e divorcit janë të shumta, ato fillojnë nga
dhuna, vështirësitë ekonomike, abuzimi me pijet ose drogat, duke
vazhduar me lidhjet jashtëmartesore, konfliktet për çështje pronësore,
shkaqet shëndetësore etj.
Kosova gjithashtu ka prirje për rritje të numrit të divorceve.
Ndarja e bashkëshorteve dhe vënia në pikëpyetje e të ardhmes së
fëmijëve, s'është më pengese sa ishte dikur. /gazeta start/