Botë

Bin Laden u kërcënohet evropianëve
Osama bin Laden u bënë thirrje vendeve evropiane që t'i tërheqin trupat e tyre nga Afganistani.
E premte, 25 Shtator 2009 23:35
Reklam

Në një audio mesazh, që pretendohet të jetë i kreut të Al Kaidës, Osama bin Laden, u bëhet thirrje vendeve evropiane që t'i tërheqin trupat e tyre nga Afganistani.

Mesazhi që u shfaq sot në faqet e internetit, thotë se Evropa e mbart përgjegjësinë për bombardimet e NATO-s ndaj civilëve në Afganistan, dhe se Al Kaida do të punojë kundër "shtypësve në emër të të shtypurve".

Publikimi i këtij mesazhi të ri u bë vetëm dy ditë para zgjedhjeve në Gjermani.

Javën e kaluar, Al Kaida postoi tre mesazhe në gjermanishte, duke i paralajmëruar votuesit gjermanë që ta ndryshojnë qeverinë e tyre dhe t'i tërheqin trupat nga Afganistani

Filipine: 40 të vdekur nga vërshimet
Zyrtarët thanë se të paktën 40 njerëz e kanë humbur jetën pasi stuhia tropikale Ketsana për 12 orë solli mbi 40 centimetra shi në një metër katror në kryeqytetin e Filipineve, Manila.
Një zyrtar lokal tha se ujërat e rrëmbyera dhe rrëshqitja e dheut kanë shkaktuar vdekjen e 35 njerëzve në provincën e afërt Rizal, ndërsa viktimat tjera janë regjistruar në Manila.

Ekspertët thanë se sasia e madhe e shiut e ka tejkaluar mesataren e shiut që bie gjatë tërë muajit shtator. /REL/

Izraeli kërkon sanksione të forta ndaj Iranit
Izraeli ka bërë thirrje për reagim të qartë nga perëndimi pas bërjes ditur të faktit se Irani po ndërtonte një uzinë të dytë bërthamore.
Ministri i Jashtëm izraelit, Avigdor Lieberman, tha se kjo tregonte se Irani donte të zhvillonte armë bërthamore. Ai tha se Izareli gjithmonë nuk ka besuar pretendimin iranian se ata kanë vetëm një program bërthamor paqësor.

Izraeli tani po kërkon për sanksione të forta ndërkombëtare duke shpresuar se edhe Rusia dhe Kina mund të bien dakord pas njoftimit për uzinën sekrete.

Dhe nëse sanksionet nuk kane efekt, autoritetet izraelite vënë në dukje fjalimin e kryeministrit, Benjamin Netanyahu në OKB këtë javë. Ai foli për rrezikun më të madh që i kanosej qënis njerëzore që është, siç u shpreh ai, martesa e fundamentalizmit fetar me armë të shkatërrimit në masë.

Irani thotë se nuk kërkon armë bërthamore dhe shtoi se uzina e re pranë Qom-it po prodhon energji elektrike. /bbc/

Obama: Jam i hapur për dialog thelbësor me Iranin
Presidenti amerikan, Barack Obama tha se ai është i hapur për një dialog thelbësor me Iranin, pavarësisht asaj që ai e cilësoi si “prirje shqetësuese mashtrimesh nga Irani” për programin bërthamor.
Të premten presidenti amerikan dhe udhëheqësit francezë e britanikë thanë se Teherani kishte disa vjet që po ndërtonte fshehurazi një impiant të dytë bërthamor.

Të shtunën në fjalimin e tij të përjavshëm në radio, Obama tha se Irani duhet të bashkëpunojë plotësisht me Agjencinë Ndërkombëtare për Energjinë Atomike dhe të provojë se impianti i dytë që po ndërton ka synime paqësore.

Presidenti amerikan tha se gjithë vendet anëtare të Këshillit të Sigurimit e kanë bërë të qartë se Irani duhet të përmbushë plotësisht përgjegjësitë e tij, ose përndryshe do të përballet me sanksione dhe izolim të mëtejshëm.

Obama tha se impianti i ri bërthamor i bën edhe më urgjente bisedimet ndërkombëtare me Iranin të planifikuara për të filluar më 1 tetor. /VoA/

Mbahen zgjedhjet parlamentare në Gjermani
Rreth 62 milionë qytetarë janë thirrur këtë të diel në Gjermani të zgjedhin parlamentin e ri të vendit.
Kancelarja dhe Kryetarja e CDU-së Angela Merkel përpiqet që t`i japë fund koalicionit të madh me socialdemokratët dhe në vend të saj të krijojë një aleancë qeverisëse me liberalët.

Kandidati socialdemokrat për kancelar Frank -Walter Steinmeier foli i bindur se do të mund ta bëjë të dështojë një koalicion të tillë mes kristiandemokratëve dhe liberalëve.

Për rreth 600 vende deputetësh në parlament konkurrojnë më shumë se 3500 kandidatë nga 28 parti, ndërsa rezultatet paraprake zyrtare pritet të jepen pas mesnatës /dw/telegrafi/

Ahmadinejad Goditje për Perëndimin
Lajmin për ndërtimin e një impianti të dytë bërthamor, presidenti i Iranit, Mahmoud Ahmadinejad, e ka komentuar si një “goditje e rëndë për Perëndimin”.
“Situata po merr një kthesë të tillë sa ata po pendohen për ato çfarë kanë thënë”, është shprehur presidenti iranian, duke u kthyer në vendin e tij pas udhëtimit në OKB.

“Mund të vazhdojnë të përdorin këtë çështje kundër Iranit nëpërmjet mediave, por ishte një goditje e fortë për arrogancën e tyre”, shtoi lideri iranian. /tch/telegrafi/

Irani teston raketën me rreze të gjatë veprimi
Irani thotë se të hënën do të zhvillojë testimin të raketës, për të cilën analistët e mbrojtjes thonë se është e aftë, që t’i arrijë bazat izraelite dhe ato të Shteteve të Bashkuara në rajonin e Gjirit.
Radioja shtetërore iraniane, njoftoi se raketat tokë-tokë, Shahab 3, do të testohen nga Garda Revolucionare.

Sot më herët gjatë ditës, Irani ka lansuar dy raketa me rreze të shkurtër veprimi, në kuadër të ushtrimeve ushtarake.

Këto lansime u bënë në periudhën e rritjes së tensioneve ndërmjet Iranit dhe Perëndimit, pasi Teherani, në fillim të kësaj jave, shpalli se po e ndërtonte edhe centralin e dytë për pasurimin e uraniumit. /rel/telegrafi/

OSBE/ODIHR kritikon zgjedhjet e BE-së
OSBE/ODIHR ka publikuar raportin përfundimtar mbi zgjedhjet evropiane që u zhvilluan në 27 vende anëtare të BE-se nga data 4 deri më 7 qershor 2009.
Në raport vlerësohet se në tërësi, në vendet e Bashkimit Evropian ka mungesë të harmonizimit të kritereve për kandidatët. Disa shtete evropiane, nga ana tjetër, kanë mangësi për masat që lejojnë pjesëmarrjen e kandidatëve të veçantë në zgjedhjet evropiane. Raporti tregon se nuk është respektuar e drejta për të votuar nga të burgosurit dhe rezidentët e BE-së që nuk kanë shtetësi të ndonjë vendi anëtar.

Angazhimet e OSBE-së nuk janë përmbushur sa i takon masave për garantimin e aksesit të duhur e bashkëpunues për vëzhguesit e huaj apo vendas. Në raportin për zgjedhjet evropiane shprehet shqetësimi dhe për mungesën e mundësisë për të apeluar në një gjykatë vendimin që lidhet me rezultatin zgjedhor në disa prej shteteve anëtare.

Presidenca suedeze e Bashkimit Evropian në emër të 27 vendeve anëtare ka përshëndetur raportin e vëzhguesve dhe angazhohet për përmirësime të nevojshme në përputhje me rekomandimet e bëra në raport nga OSBE/ODIHR. /tch/telegrafi/

Filipinet kërkojnë ndihmë pas tajfunit
Filipinet kanë bërë apel për ndihmë ndërkombëtare pasi kryeqyteti Manila përjetoi disa nga përmbytjet më të rënda për 40 vjet të shkaktuar nga tajfuni Ketsana, ku thuhet se kanë humbur jetën të paktën 72 njerëz.
Qeveria thotë se më shumë se katër mijë vetë janë shpëtuar deri më tani dhe një çerek milioni tjetër janë zhvendosur nga përmbytjet dhe rrëshqitjet e tokës.

Filipinet kanë kërkuar ndihmë nga SHBA dhe agjencitë e ndihmave të OKB-së që po dërgojnë ushqime, ujë dhe veshje. /bbc/telegrafi/.

Unioni dhe liberalët fitojnë në Gjermani
Unioni kristiandemokrat dhe kristiansocial (CDU/CSU) dhe Partia liberale (FDP), kanë fituar shumicën e mjaftueshme për krijimin e një koalicioni të ri qeveritar në Gjermani.
Unioni CDU/CSU ka fituar rreth 34 % të votave që është rezultati më i dobët në 60 vitet e fundit. Liberalët me rreth 15 % kanë shënuar një prej rezultateve më të mira dhe i siguruan kancelares Angela Merkel mbetjen në postin e tanishëm.

Kryetarja e CDU-së, Angela Merkel, dhe lideri i liberalëve Guido Westerwelle, deklaruan se janë të gatshëm për krijimin e koalicionit të ri qeveritar. Sipas llogaritjeve të deritanishme, këto parti do të kenë 331 mandate në Bundestag.

Partia socialdemokrate (SPD) ka shënuar rezultatin më të dobët në historinë e zgjedhjeve parlamentare në Gjermani. Socialdemokratët e kandidatit për kancelar Frank - Walter Steinmeier kanë fituar rreth 23 % të votave.

E Majta doli partia e katërt në Bundestag me rreth 12 %, ndërsa ekologjistët janë partia e pestë për nga numri i votave me mbi 10 %.

Të gjitha këto parti së bashku do të kenë 291 mandate. Pjesëmarrja në zgjedhje ishte në nivelin më të ulët që prej themelimit të Republikës Federale të Gjermanisë (në vitin 1949), me vetëm 72 %. /dw/

Portugali: Socialistët humbasin shumicën absolute
Në zgjedhjet parlamentare në Portugali socialistët në pushtet kanë humbur shumicën absolute, por vazhdojnë të mbeten forca më e fuqishme politike në vend.
Pas numërimit të pothuajse të gjitha votave, Partia Socialiste e kryeministrit Jose Socrates ka fituar 36,5 % të votave që do të thotë 8,5 % më pak se në zgjedhjet e kaluara.

Koordinatori i fushatës elektorale të socialistëve dhe njëkohësisht ministër i punës, Jose Vieira da Silva deklaroi se: "Fitorja e Partisë Socialiste është një fitore e qartë. Në debatin demokratik nuk do të duhej në asnjë mënyrë që kësaj fitore t'i ulet rëndësia. Portugezët ishin thirru të zgjedhin dhe ata dhanë votën e tyre", tha da Silva.

Socialdemokratët me orientim konservativ nuk arritën të përmirësojnë rezultatin e tyre dhe fituan vetëm 29 % të votave. Dy aleanca të majta fituan përkatësisht 10% dhe 8 % të votave të përgjithshme. /DW/

Përleshje mes policisë izraelite dhe palestinezëve
Policia izraelite u përlesh me palestinezët të dielën pasi përpiqej të qetësonte një tjetër përplasje në një vend të shenjtë në Qytetin e Vjetër të Jerusalemit.
Dëshmitarët thonë se policia përdori granata me efekte paralizuese për të shpërndarë rreth 150 palestinezë që gjuanin me gurë turistët dhe policinë.

Përleshjet filluan pasi një grup turistësh francezë hynë në një vend të shenjtë si për hebrenjtë ashtu edhe për myslimanët.

Policia tha se 9 policë dhe 13 palestinezë u plagosën lehtë. Tetë veta u arrestuan.

Policia izraelite tha se dhuna ishte përpjekje për të prishur qetësinë para Jom Kipurit, dita më e shenjtë e kalendarit hebraik.

Ushtria tha se për shkak të arsyeve të sigurisë, po bllokon kufirin e Izraelit me Bregun Perëndimor deri nesër në darkë. /VoA/

Ngrohja globale po ndodh më shpejt
Një studim i ri për ndryshimet klimatike thotë se një rritje katastrofike prej katër gradësh në temperaturat globale ka gjasa të ndodh gjatës jetës së shumë njerëzve.
Studimi është hartuar nga një prej organizmave kryesorë që monitoron ndryshimin e klimës, Qendra Hadley në Britani.

Ky parashikim i fundit e sjell perspektivën e ndryshimeve shkatërruese edhe më pranë.

Një rritje e temperaturës mesatare deri në 2050 do të sjell një rritje prej 10 gradësh celsius, apo më shumë në disa zona si Arktiku dhe Afrika.

Kjo do të thotë një rënie e thellë e shirave në disa zona, përmbytje në zona të tjera dhe shfarosje të gati mbi gjysmës së specieve dhe bimëve të botës.

Një arsye për këtë rritje të shpejtë është prova e re përsa i takon pasojave të cikleve reaguese. Teksa rriten temperatuarat, lëshohet më shumë dioksid karboni nga toka dhe oqeanet, ndaj edhe rritet efekti serë.

Shkencëtarët pas këtij studimi, theksojnë se skenari i tyre për katastrofën nuk është i pashmangshëm, për sa kohë zvogëlohen emetimet që shkaktojnë efektin serë dhe që janë të shkaktuara nga njerëzit. /bbc/

Gates hedh poshtë thirrjet për një afat tërheqjeje nga Afganistani
Sekretari amerikan i Mbrojtjes, Robert Gates hodhi poshtë thirrjet për një afat tërheqjeje dhe një strategji largimi të forcave amerikane nga Afganistani.
Gjatë një interviste, Gates tha se do të ishte gabim strategjik të vendosej afat për përfundimin e misionit ushtarak amerikan në Afganistan.

Gates tha se dështimi në Afganistan do të ishte një hap i madh pas për Shtetet e Bashkuara. Ai tha gjithashtu se humbja në Afganistan do të kishte pasoja katastrofike për sa i përket rimëkëmbjes së ekstremistëve islamikë dhe rekrutimit nga ana e al-Qaidas si dhe operacioneve të tyre.

Gjatë një programi tjetër, Gates tha se nuk ka fërkime mes presidentit Obama dhe komandantëve ushtarakë amerikanë, ndërkohë që Obama rishqyrton strategjinë për Afganistanin para se të vendosë nëse do të dërgojë trupa shtesë atje.

Kryekomandanti amerikan në Afganistan, gjenerali Stenley McCrystal, ka kërkuar forca shtesë, por sekretari Gates tha se gjenerali është dakord me rishikimin e strategjisë që po bëhet tani. /VoA/

Hondurasi kërcënon Brazilin
Qeveria e përkohshme e Hondurasit ka bërë kërcënime të reja kundër Brazilit, që është duke strehuar në ambasadën e tij, presidentin e rrëzuar, Manuel Zelaya.
Qeveria tha se brenda 10 ditësh do të revokoheshin kredencialet diplomatike të Brazilit, nëse nuk qartësohej statusi i Zelaya-s.

Brazili hodhi poshtë një ultimatum nga ata që i cilësoi si komplotuesit e grushtit të shtetit.

Presidenti Lula da Silva i Brazilit, i kërkoi qeverisë së Hondurasit që të kërkonte falje për siç u shpreh, "uzurpimin e pushtetit".

"Së pari, qeveria braziliane nuk i bindet një ultimatumi nga njerëz që kryejnë grushte shteti. Unë madje as që nuk e njoh këtë qeveri. Nuk e kuptoj përse përdoret termi qeveri e përkohshme, kur fjala korrekte është grusht-shteti, uzurpues pushteti. Qeveria braziliane nuk negocion me ta, ndaj edhe për mua çështja është e mbyllur".

"Brazili nuk ka përse të bisedojë me këta njerëz. Nëse OKB-ja, Këshilli i Sigurimit apo Organizata e Shteteve Amerikane i kërkon Brazilit të bisedojë, ne duhet t'u bindemi, por jo këtyre njerëzve", tha presidenti da Silva.

Në një tjetër zhvillim, qeveria e përkohshme u refuzoi hyrjen në vend, katër diplomatëve të Organizatës së Shteteve Amerikane që mbërritën në aeroport në përpjekje për të organizuar bisedime.

Qeveria ka lëshuar edhe një dekret që ndalon protestat dhe mbyll organizatat e mediave.

Zelaya u ka bërë thirrje mbështetësve të fillojë të fillojnë ofensivën përfundimtare për rikthimin e tij në pushtet. /bbc/

Liderët botërorë i urojnë fitoren kancelares Merkel
Liderët botërorë e kanë mirëpritur fitoren e kancelares gjermane Angela Merkel në zgjedhjet e djeshme parlamentare.
Demokristianët e Merkelit fituan afro 34 përqind të votave, përballë afro 23 përqind sa morën rivalët Socialdemokratë.

Presidenti i Shteteve të Bashkuara Barack Obama tha se pret të vazhdojë bashkëpunimin e ngushtë me Merkel.

Presidenti i Francës Nicolas Sarkozy tha se rikonfirmimi i fitores është rezultat i besimit të opinionit që ajo ka marrë në katër vitet e fundit.

Kryeministri italian, Silvio Berlusconi i telefonoi kancelares Merkel për ta nënvizuar “vizionin e përbashkët” të tyre për një Evropë të fuqishme.

Blloku i Merkelit tash duket i gatshëm të formojë aleancën e qendrës së djathtë me Demokratët e Lirë, liberalët të cilët fituan afro 15 përqind të votave. /REL/

Merkel: Qeveria e re do të formohet deri më 9 nëntor
Qeveria e re gjermane do të formohet brenda gjashtë javëve të ardhshme. Kancelarja Merkel sqaroi se dëshiron të përshëndes në kryeqytet me një kabinet të ri kryeministrat dhe mysafirët e tjerë të huaj më 9 nëntor, në 20 vjetorin e rënies së murit të Berlinit.
Pas fitores në zgjedhje të Unionit CDU/CSU dhe FDP-së, kancelarja gjermane Angela Merkel njoftoi negociata të shpejta për një koalicion mes forcave politike fituese.

Kancelarja premtoi, se edhe në qeveri me liberalët do t'i kushtojë vëmendje ekuilibrit social në ekonominë e tregut. Merkel tha, se do të vazhdojë të mbrojë marrëveshjet për pagën minimale dhe fondin për shëndetësinë, të kritikuara nga liberalët.

Kancelarja Merkel ritheksoi, se do të ndërmerren uljet e planifikuara të tatimeve, por i la të hapura afatet për këtë. Zgjatja e afatit të funksionimit të centraleve bërthamore është ende për t'u diskutuar, tha Merkel.

Kryetari i liberalëve Guido Westerwelle përsëriti kërkesën për reduktim të barrës fiskale. Si ministër i mundshëm i Jashtëm në qeverinë e ardhshme, Westerwelle foli edhe për bisedime të shpejta për tërheqjen e armëve të fundit bërthamore të SHBA-së nga Gjermania. /DW/

Irak: 18 të vdekur
Së paku 18 persona, nga të cilët 10 anëtarë të forcës irakiane të sigurisë, kanë vdekur nga sulmet me bomba në Irak.
Incidenti më i përgjakshëm gjatë 24 orëve të fundit ndodhi pranë qytetit të Ramadit, në rrugën që lidh Irakun me Sirinë dhe Jordaninë. /REL/

Hamas dhe Fatah “afër marrëveshjes”
Udhëheqësi i Hamasit, Khaled Meshaal, ka thënë se ai dhe rivalët e tij palestinezë të Fatahut, janë pranë arritjes së një marrëveshje për pajtim.
Meshaal e bëri këtë deklaratë pas bisedimeve që u zhvilluan në Kajro rreth propozimeve të Egjiptit për t'i dhënë fund mosmarrëveshjeve dy vjeçare mes Fatahut dhe Hamasit.

Ai tha se iniciativa egjiptiane ishte pozitive, edhe pse Hamasi ka bërë disa sugjerime për ndryshime të cilat i pret të pasqyrohen në versionin përfundimtar të saj.

Mes të tjerave, në planin egjiptian parashikohet që grupimet të koordinojnë veprimet para zgjedhjeve të përgjithshme palestineze që mund të mbahen në qershorin e vitit të ardhshëm.

Fraksionet megjithatë kanë thënë se do të rikthehen nga fundi i tetorit në Kajro për të rënë dakord për versionin përfundimtar të marrëveshjes dhe nënshkrimin e saj. /bbc/

75 persona pritet të lirohen nga Guantanamo
Një zëdhënës ushtarak amerikan thotë se një grup pune vendosi lirimin e 75 prej 223 të burgosurve në Guantanamo, si pjesë e përpjekjes për mbylljen e kësaj qendre ndalimi.
Zëdhënësi ushtarak Bruk De Walt tha se emrat e personave që do të lirohen janë publikuar në qendrën e ndalimit në Guantanamo. Njoftimet e shtypit vëne në dukje se mes tyre ndodhet një jemenas që është kthyer në atdhe dhe dy uzbekes që janë vendosur në Irlandë.

Grupi i punës ka marrë në shqyrtim një nga një çështjet e të burgosurve në Guantanamo për të vendosur se kush do të dalë në gjyq dhe kush do të lirohet.

Presidenti Barak Obama ka caktuar 22 janarin e vitit tjetër si afatin e mbylljes së burgut të Guantanamos ku mbahen persona të dyshuar për terrorizëm. /VoA/

Manila: 240 të vdekur, 1.9 milionë të pastrehë
Ka shkuar në 240 numri i vdekjeve të konfirmuara nga përmbytjet në Filipine. Shtëpitë e 1.9 milionë njerëzve në Manila dhe në zonat përreth janë përmbytur. 380 mijë njerëz kanë kërkuar strehim në qendrat e emergjencës.
Të shtunën e kaluar stuhia tropikale Ketsana shkaktoi sasi rreshjesh të barasvlefshme me ato të një muaji. 12 orët e rreshjeve kanë shkaktuar përmbytjet më të rënda në 40 vitet e fundit për Filipinet. /REL/

Kreu i NATO-s kërkon mbështetjen e SHBA-ve
Sekretari i ri i përgjithshëm i NATO-s, Anders Fogh Rasmussen, ka thënë se amerikanët nuk duhet ta vënë në dyshim përkushtimin e anëtarëve të tjerë të NATO-s në luftën në Afganistan.
Në fjalimin e parë si kreu i Aleancës në Uashington, Rasmussen tha në institutin Këshilli Atlantik, se fushata në Afganistan bëhej nga nevoja. NATO, shtoi ai, nuk kishte rrugëzgjidhje tjetër, por ta vazhdonte atë që ka nisur atje.

"Duhet të bëjmë durim, do të na nevojiten burime të tjera dhe fatkeqësisht, do të humbasim ushtarë të tjerë në sulmet terroriste të talibanëve", tha Rasmussen.

Por ai shtoi se ishte "plotësisht dakord me presidentin Obama kur ai thotë se kjo luftë nuk bëhet nga dëshira, por nga nevoja".

Kreu i NATO-s u përpoq të siguronte audiencën se në këtë çështje kishte solidaritet mes të 28 vendeve anëtare. Ai përmendi faktin se 40 përqind e trupave të NATO-s në Afganistan janë nga vendet e tjera dhe se në Afganistan kanë humbur jetën ushtarë nga mbi 20 vende të ndryshme janë vrarë atje.

Gjatë qëndrimit në Washington, Rasmussen do të takohet me presidentin Obama dhe me zyrtarë të tjerë të lartë. Korrespondenti i BBC-së në Uashington thotë se vizita e kreut të NATO-s në Amerikë bëhet në një kohë kur amerikanët po debatojnë me zjarr për të dërguar dhjetëra mijëra trupa të reja shtesë në Afganistan. /bbc/

160 viktima si pasojë e dhunës policore në Guine
Në Guine të Afrikës Perëndimore, gjatë shpërndarjes me dhunë të një mitingu të opozitës, u vranë rreth 160 njerëz. Qindra persona të tjerë janë plagosur.
Më shumë se 50.000 përkrahës të opozitës ishin mbledhur të hënën në stadiumin e kryeqytetit Conakry, për të protestuar kundër juntës ushtarake dhe kandidimit të kryetarit të saj, Musa Dadis Kamara, në zgjedhjet presidenciale të janarit.

Pjesëtarë të armatosur të forcave të sigurimit u futën në stadium dhe sipas të dhënave të dëshmitarëve okularë, qëlluan pa dallim mbi masën e njerëzve. Njoftohet edhe për plagosjen e dy liderëve të opozitës dhe arrestimin e tyre.

Sekretari i Përgjithshëm i Kombeve të Bashkuara, Ban Ki Moon, dhe qeveria amerikane shprehën shqetësimin e tyre për dhunën në Guine. /DW/

Vietnam: 22 të vdekur nga tajfuni
Tajfuni i njëjtë, që ka goditur Filipinet, tashmë është shtrirë në Vietnam, ku ka mbytur të paktën 22 persona dhe ka shtyrë të evakuohen 170 mijë të tjerë.
Tajfuni Ketsana, që i është afruar bregdetit të provincës qendrore Quang Nam, ka shkaktuar vërshime, ndalje të energjisë elektrike dhe evakuim.

Stuhia me erë prej 144 kilometra për orë, ka përmbytur qytetin Hue, dikur kryeqytet dhe zonë nën mbrojtje të UNESCO-s si trashëgimi botërore.

I njëjti tajfun ka mbytur të paktën 240 persona dhe ka lënë pa shtëpi rreth 400 mijë në Filipine, gjatë fundjavës. /REL/

Irani nuk do të bëjë kompromis
Irani ka thënë se nuk dëshiron të diskutojë për ato që quan të drejtat e tij bërthamore, gjatë bisedimeve për programin bërthamore që zhvillohen ditën e enjte në Gjenevë. Dy ditë përpara këtyre bisedimeve vendimtare, Irani përsëri ndjek një linjë të ashpër.
Shefi iranian për çështjet bërthamore, Ali Akbar Salehi tha se Teherani nuk dëshironte të diskutonte ato që i cilësoi si të drejta bërthamore.

Ai përsëri përjashtoi mundësinë e pezullimit të pasurimit të uraniumit, siç është kërkuar nga rezolutat e Këshillit të Sigurimit të Kombeve të Bashkuara.

Zyrtarë, emrat e të cilëve nuk bëhen me dije, citohet të kenë thënë se Irani nuk do të lejojë diskutimin e reaktorit të sapozbuluar në Kom.

Megjithatë Irani ka thënë se do të njoftojë së shpejti një program kohor për inspektimet.

Irani edhe para takimit, duket se po përjashton çdo ndryshim në qëndrimit të tij që nuk bën kompromis.

Nuk është ende e qartë se çfarë do të gjejnë për të diskutuar diplomatët në Gjenevë. /BBC/

Afganistan: 30 të vrarë nga një bombë në anë të rrugës
Ministria e Brendshme afgane thotë se një autobus pasagjerësh ndeshi në një bombë në anë të rrugës në Afganistanin jugor duke shkaktuar vdekjen e 30 vetave dhe plagosjen e 39 të tjerëve.
Zyrtarët thonë se bomba shpërtheu në një autostradë të provincës Kandahar të martën në mëngjes. Ata thanë se mes viktimave kishte edhe gra dhe fëmijë.

Zyrtarët qeveritarë fajësuan militantët talebanë për vënien e lëndëve plasëse. Kryengritja talebane përdor kryesisht bombat në anë të rrugës dhe sulme vetëvrasëse në luftën kundër forcave të huaja dhe trupave afgane.

Një raport i OKB-së i publikuar javën e kaluar tha se dhuna në Afganistan u ka marrë jetën më shumë se një mijë e 500 civilëve këtë vit, dy të tretat e të cilëve janë shkaktuar nga sulmet e militantëve. /VOA/

Odierno: 4 mijë trupa largohen nga Iraku
Komandanti i forcave amerikane në Afganistan tha se Shtetet e Bashkuara planifikojnë të tërheqin rreth 4 mijë trupa amerikane nga Iraku deri në fund të tetorit, duke e ulur në 120 mijë trupa numrin e forcave amerikane në vend.
Gjenerali Raymond T. Odierno pritet ta shpallë tërheqjen në paraqitjen para Komitetit për Forcat e Armatosura në Dhomën Përfaqësuese.

Lajmi u bë i ditur nga agjencitë që siguruan një kopje të shënimeve të Odiernos për komitetin. /REL/