VIP

Ami: Portokallia më solli fat në dashuri
Imazhi i "Portokallisë", Amarda Toska, thotë se veç tjerash, spektakli humoristik i solli edhe fat në dashuri.
Pikërisht në ambientet e “Portokallisë”, Ami u njoftua me të fejuarin e saj, Ermal Mamaqin, dhe në momentin kur menduan se lidhja e tyre ishte serioze, ata vendosën të shkonin një hap përpara, ndërsa vitin e ardhshëm pritet që ta kurorëzojnë historinë e tyre me martesë.

E pyetur nga Top-Channel se çfarë i dhuron Ermali, Ami është përgjigjur: “Shumë humor, por ajo që vlerësoj më tepër nga Ermali është energjia që më transmeton".

Johansson nuk do të luajë në Broadway
Aktorja hollivudiane Scarlett Johansson ka mohuar thashethemet kinse ka vendosur të jetë pjesë e mjuziklit të Broadwayt, “Promiese, Promises”, duke thënë se asaj nuk i është ofruar një rol i këtillë.
Mediat elektronike kanë spekuluar se Johanson ishte në garë me Anne Hathaway dhe Zooey Deschanel pë rolin e një kameriereje e cila bie në dashuri me një biznesmen.

Mirëpo, një zëdhënës i aktores ka thënë se këto janë spekulime dhe nuk ka asgjë të vërtetë nga këto që thuhen, sepse aktores nuk i është ofruar ai rol.

Gjykimi i Lil Wayne fillon në mars
Reperi Lil Wayne do të paraqitet në një gjykatë në marsin e ardhshëm për t’u përballur me akuzat për posedim droge.
Hitbërësi i këngës “Lollipop”, në janar të vitit 2008 u arrestua në Yuma të Arizonas, kur policia kufitare kishte gjetur kokainë, ekstazis dhe marihuanë në autobusin e tij.

Dwayne Carter, Jr. (emri i vërettë i reperit) u padit për posedim droge dhe për mbajtje armësh, mirëpo akuza e fundit u tërhoq pasi që u zbulua se arma e gjetur në autobus kishte qenë e regjistruar në Florida.

Si do që të jetë, Lil Wayne do të paraqitet në gjykatën e Yumas pranverën që vjen, ndërkohë ai përballet edhe me akuzën: mbajtje armësh pa leje edhe në New York.

Perry ‘viktima’ e radhës e Brand?
Spekulohet se ylli i muzikës pop, Katy Perry, ka shkuar në një udhëtim romantik në Tajlandë me komikun britanik Russell Brand.
Është thënë se dyshja ka filluar lidhjen muajin e kaluar gjatë ceremonisë MTV Video Music Awards në New York, ndërsa tani “The Sun” shkruan se lidhja e tyre ka vazhduar.

Një burim ka thënë se Brand e ka admiruar Katyn qe një kohë të gjatë, ndërsa kjo e fundit edhe pse e njeh reputacionin e tij prej donzhuani, nuk ka mundur t’i rezistojë.

Do të xhirohet filmi “Indian Summer”
Filmi i ri i Cate Blanchett për aferën e zonjës Edwina Mountbatten me kryeministrin e parë të Indisë, Jawaharlal Nehru, është lejuar të xhirohet pas një shqyrtimi të skenarit nga autoritetet e Indisë.
Autoritet e filmit në Indi kishin pasur frikë që filmi me titull “Indian Summer” nuk do ta paraqiste anën e mirë të Nehru, prandaj kishin kërkuar që ta analizojnë projektin, para se t’i lejonte producentët që të siguronin vendxhirimet.

WENN njofton se pas shqyrtimit, autoritet e filmit në Indi kanë dhënë dritën e gjelbër për xhirimet e filmit mbi aferën e kryeministrin e parë të Indisë dhe gruas së nënmbretit të fundit britanik në Indi.

Downey Jr. dhe Foxx në një tjetër film të përbashkët
Dy bashkaktorët e filmit "The Soloist", Robert Downey, Jr. dhe Jamie Foxx, do të bashkohen sërish për të realizuar një komedi.
Ylli i filmit “The Hangover”, Zach Galifianakis, po ashtu edhe regjisori i këtij filmi, Todd Phillips, do të jenë pjesë e komedisë që titullohet “Due Date”.

“Entertainment Weekly” njofton se Downey, Jr., do të luajë rolin e një babai i cili mundohet të kthehet në Los Angeles për të qenë i pranishëm në lindjen e fëmijës së parë të tij.

Ndërsa Foxx do ta luajë karakterin e një miku, i cili i ndihmon karakterit të Downey, Jr. dhe shoqëruesit të tij (Galifianakis) gjatë kthimit.

Mariah përgatit befasi për fansat
Mariah Carey është duke përgatitur diçka të veçantë për fansat e saj.
Këngët e Careyt të incizuara bashkë me Timbaland dhe Jermaine Dupri nuk shfaqen në albumin e këngëtares “Memoirs of an Imperfect Angel”, pasi që ajo ka planifikuar diçka speciale.

“Ato (këngët) nuk janë në album, mirëpo ne kemi planifikuar diçka të veçantë, që do ta nevrikoste producentin ekzekutiv të studios L.A. Reid po ta diskutoja tani këtë gjë. Mirëpo, për fansat do të ketë më shumë se një këngë nga Timbaland dhe së paku një këngë nga J.D.”, ka thënë Mariah.

Ozzy pendohet për shoun The Osbournes
Ozzy Osbourne është penduar që ka qenë pjesë e shout televiziv "The Osbournes", pasi që e ka pasur të vështirë të përballet me interesimin e medias.
Rokeri ka shitur më shumë se 100 milionë kopje me grupin e tij të dikurshëm “Black Sabbath”, mirëpo ai thotë se shou real i familjes së tij i transmetuar nga MTV gjatë viteve 2002-2005, e ka rritur së tepërmi famën e tij.

Osbourne e konsideron shoun e tij si “një eksperiment i cili kishte dalë nga kontrolli”, duke shtuar se asnjëherë nuk do ta përsëritë një eksperiencë të tillë, edhe pse gruaja e tij Sharon e dëshiron një gjë të tillë.

Jones nuk e ka në plan të pensionohet
Këngëtari veteran Tom Jones është i lumtur që në vitin e ardhshëm do t’i mbushë 70 vjet, ndërsa nuk e ka në plan që të heqë dorë nga këndimi.
Legjenda uellsiane në qershor të vitit 2010 do të mbushë 70 vjet, mirëpo në vend se të mendojë për pensionim, ai vazhdon të kënaqet me suksesin në karrierën e tij.

“Jam shumë i lumtur që kam arritur deri këtu. Vitin tjetër do të mbush 70 vjet. Mendoj se është diçka e jashtëzakonshme”, thotë këngëtari.