"Windows Cafe" në Paris

Microsoft ka paralajmëruar hapjen e lokalit të parë “Windows Cafe” në Paris në të cilin vizitorët do të mund të provojnë teknologjitë më të reja të kompanisë së bashku me filxhanin me kafe.

Windows Cafe do të duhej të hapej më 22 tetor, respektivisht në ditën kur edhe zyrtarisht fillon shitja e sistemit më të ri operativ Windows 7 nga kjo kompani.

Në Microsoft theksojnë se kjo iniciativë është fryt i dëshirës së tyre që publikun e gjerë ta njoftojnë me mundësitë e reja të Windows në kompjuterë, telefona celularë dhe internet. Kështu, vizitorët do të mund të provojnë mundësitë e reja të Windows 7, të telefonave celularë të bazuar në platformën Windows Mobile si dhe shërbimet e internetit Windows Live.

Përfaqësuesit e Microsoftit kanë theksuar se ky do të jetë lokali i vetëm Windows Cafe, respektivisht se nuk ka plane për hapjen e tjerëve në qytete tjera në mbarë botën.