Sejdiu dekoroi personalitetet e shquara të historisë sonë

nga *lissa* Tue Feb 16, 2010 9:42 am

Sejdiu dekoroi personalitetet e shquara të historisë sonë

Në bazë të Kushtetutës së Republikës së Kosovës, si dhe në
bazë të Rregullores mbi dekoratat, urdhrat dhe titujt e nderit të
Kosovës që i jep presidenti i Republikës së Kosovës dhe procedurat e
dhënies së tyre, presidenti Fatmir Sejdiu, në kuadër të kompetencave të
tij, me rastin e dyvjetorit të Pavarësisë së Kosovës, ka dekoruar
personalitetet e shquara të historisë sonë.

Për kontribut të veçantë dhënë për lirinë dhe pavarësinë e shqiptarëve
dhe të Kosovës, presidenti Sejdiu ka dekoruar me Urdhrin Hero i Kosovës
personalitetet e shquara të historisë sonë: Ymer Prizreni, Haxhi Zeka,
Hasan Prishtina, Bajram Curri, Isa Boletini, Shotë Galica dhe Azem
Galica.

Me motivacion: Kontributi i Ymer Prizrenit, Haxhi Zekës, Hasan
Prishtinës, Bajram Currit, Isa Boletinit, Shotë Galicës dhe Azem Galicës
për lirinë dhe pavarësinë e shqiptarëve dhe të Kosovës mbetet i një
rëndësie të pashembullt. Duke ia kushtuar tërë jetën luftës së drejtë,
ata dhanë shembullin më të mirë të udhëheqësve me vizion për një të
ardhme të dinjitetshme të kombit dhe vendit tonë.

“Vlerësimi për sakrificën dhe kontributin e tyre është edhe vlerësim i
popullit, i cili me veprën dhe personalitetin e tyre është frymëzuar
përgjatë deceniesh, deri në realizimin e plotë të lirisë dhe pavarësisë
së Kosovës”.