Takat e këpucëve, jo më shumë se 3 cm

Takat e këpucëve, jo më shumë se 3 cm




Zgjedhja e këpucëve është shumë e rëndësishme për shëndetin e këmbëve. Për këmbën e cila mban gjithë peshën e trupit dhe është pika e fundit në kontakt me tokën duhet të zgjedhim këpucë të rehatshme dhe të sigurta.
Kur zgjedhim këpucët duhet të shohim me kujdes çdo veçori që nga numri, taka deri tek gjerësia dhe rehatia e këpucës. Pika më e rëndësishme në zgjedhjen e këpucës lidhur me shëndetin e këmbës është numri i këmbës. Asnjëherë nuk duhet të veshim këpucë më të ngushta dhe të vogla. Këpucët e vogla mund të shkaktojnë probleme në këmbë. Nuk këshillohet as veshja e këpucëve pa taka.

Këpucët ideale për femra janë këpucët e rehatshme takat e të cilave nuk duhet të kalojnë 3 cm. Femrave u pëlqejnë shumë këpucët me maja por ne nuk jua këshillojmë për shëndetin e këmbëve. Për të parandaluar deformimet në gishtin e madh të këmbës duhet të zgjidhni këpucë me majë më të gjerë të cilat janë më të rehatshme. Kriteret që duhet të plotësojnë këpucët për femra janë:
* taka jo më shumë se 3cm,
* të jenë me majë të gjerë në mënyrë që këmba të mbështetet mire,
* të merren në numrin e duhur madje mund të merren një gjysëm numri më i madh.

Femrat gjithmonë duan që këmbët e tyre të duken sa më të vogla, marrin këpucë me numër 37 ose 36, por kjo nuk është e përshtatshme për shëndetin e këmbëve.

Veshja e këpucëve të vogla mund të shkaktojë deformime të gishtit të madh të këmbës, shfaqjen e problemeve si kalloja. Tek të sëmurët me diabet mund të shkaktojë probleme shumë serioze. Sepse diabetikët kanë probleme ekstra me këmbët. Në përgjithësi diabetikët e ndjejnë më pak se të tjerët dhimbjen. Prandaj e kuptojnë më vonë shqetësimin që mund të kenë nga këpucët. Këmbët mund t’i përkeqësohen, mund të kenë gangrenë dhe mund të përballen me probleme serioze sepse plagët e krijuara mbyllen shumë vonë. Për të parandaluar këta shqetësime diabetikët duhet të përdorin këpucë me një lëkurë të butë e të veçantë dhe me një veshje të brendshme specifike për ta.

Edhe këpucët e fëmijëve duhet të merren një numër më i madh. Nuk mund ta zvogëloni këmbën. Nëse zgjidhni këpucën e gabuar, nuk bëni gjë tjetër vetëm se prishni formën e këmbës. Edhe me këpucët e sheshta nuk mund të ndryshoni formën e këmbës së fëmijës. Këmba mban gjithë peshën e trupit. Dhe ngushtimi dhe ndërhyrja në pikën më kritike ku realizohet kontakti me tokën sigurisht që do të hapë probleme.

Tek personat që punojnë ulur apo në udhëtimet e gjata shfaqet problemi i ënjtjes së këmbëve. Në raste të tilla këpucët duhet të hiqen në mënyrë që këmbët të pushojnë pak. Për të mundësuar kthimin e rrjedhjes së gjakut në nivel normal kur të ktheheni në shtëpi shtrihuni dhe ngrijini këmbët pak më lart se niveli i zemrës dhe pushoni.

*DOÇ. DR. YAKUP YILDIRIM, specialisti ortoped dhe traumatolog në spitalin Sema, Stamboll

Përgtatiti: Aisa Kaduku Kokiçi