Kosova, pjesë e pandarë e procesit të integrimit

nga *lissa* Mon Dec 21, 2009 10:37 am

Kryeministri Hashim Thaçi ka pritur të hënën presidentin
e Republikës së Sllovenisë, Danilo Turk. Në takim është diskutuar për
zhvillimet aktuale politike në Kosovë, për thellimin e bashkëpunimit
mes Republikës së Kosovës dhe Republikës së Sllovenisë dhe për
mbështetjen e shtetit slloven dhënë Kosovës në procesin e integrimeve
euro-atlantike.

Kryeministri Thaçi falënderoi presidentin slloven për ndihmën e
gjithanshme që Sllovenia po i jep Kosovës. “Kosova dhe Sllovenia kanë
një historik të suksesshëm të marrëdhënieve bilaterale. Raportet mes
shteteve tona do të njohin vetëm përparim”, u shpreh kryeministri
Thaçi.

Duke shprehur mirënjohjen për mbështetjen që po i jep Republika e
Sllovenisë, Republikës së Kosovës në procesin e integrimeve
euroatlantike, kryeministri Thaçi theksoi se “Kosova është pjesë e
pandarë e procesit të integrimit të Ballkanit Perëndimor në BE. Ne do
të përmbushim të gjitha obligimet tona, në mënyrë që integrimi të jetë
sa më i afërt“.

Kryeministri Hashim Thaçi gjatë takimit me presidentin slloven, Danilo
Turk, u përqendrua edhe në investimet sllovene në Kosovë. “Investitorët
sllovenë kanë dhënë një shembull të mirë edhe për investitorët e
vendeve tjera. Kosova është një vend i mundësive për investime dhe
zhvillim, si në infrastrukturë, energjetike, turizëm dhe bujqësi.
Investitorët sllovenë janë të mirëseardhur “, potencoi Thaçi.

Nga ana e tij, presidenti Turk përgëzoi kryeministrin Thaçi për
progresin e jashtëzakonshëm që ka bërë Kosova në këto dy vite të pas
pavarësisë. Ai e siguroi kryeministrin kosovar që Sllovenia do të
vazhdojë të mbetet partnere dhe mbështetëse e Kosovës në procesin e
anëtarësimit në Bashkimin Evropian.