Berisha: Loboj për njohjen e pavarësisë së Kosovës

Kryeministri i Shqipërisë, Sali Berisha, gjatë takimeve
dypalëshe të zhvilluara me liderë nga vende të ndryshme të botës, në
Samitin për Klimën në Kopenhagë të Danimarkës, tha se vend kryesor në
këto takime zuri çështja e Kosovës.



“Këtu një qëllim më madhor është që të loboj për njohjen e pavarësisë
së Kosovës”, tha Berisha, duke theksuar se në këtë aktivitet ka takuar
presidentë dhe kryeministra nga katërmbëdhjetë vendeve të Afrikës dhe
Azisë, ku siç tha, është përpjekur të paraqesë “çështjen e njohjes së
pavarësisë së Kosovës si një kontribut real të këtyre vendeve për
stabilitetin dhe paqen në rajonin tonë”.

“Mund të them me përgjegjësi të plotë se situata nga shtatori, kur u
zhvillua Samiti i OKB e deri më sot, për Kosovën është shumë më e
favorshme”, tha Berisha.

Ai bëri të ditur të ketë marrë “premtime të sigurta” për shqyrtimin e
çështjes së Kosovës me përparësi. Në tërësi, tha ai, është rritur
vetëdija për rolin e rëndësishëm të Kosovës për paqen dhe stabilitetin.


“Unë do ta shfrytëzoj të gjithë kohën që më jepet këtu për çështjen e
Kosovës dhe për marrëdhëniet bilateral mes Shqipërisë dhe vendeve mike
në të katër kontinentet”, theksoi Berisha.

Ai u shpreh optimist se do të ketë njohje të reja për Kosovën. “Pati
përfaqësues të këtyre vendeve që më siguruan se ata janë të gatshëm të
vendosin menjëherë kontaktet me autoritetet më të larta të Kosovës,
pati të tjerë të cilët më thanë se ata do ta shqyrtonin dosjen sapo të
ktheheshin në vendet e tyre, dhe ky ishte një zhvillim pozitiv, nga
shatori në dhjetor unë e gjej çështjen pavarësisë së Kosovës në një
zhvillim më të madh pozitiv”, nënvizoi kryeministri Berisha.