Kosova dhe Maqedonia nënshkruan marrëveshjen për bashkëpunim policor

nga elbasi.. Thu Dec 03, 2009 8:31 am

Ministritë e brendshme të Kosovës dhe Maqedonisë nënshkruan sot në Prishtinë marrëveshjen për bashkëpunim policor, përmes së cilës janë përcaktuar se do të luftojnë krimin e organizuar, terrorizmin dhe do të ndihmohen në procesin e integrimit në BE. Marrëveshja u nënshkrua nga ministrat Zenun Pajaziti dhe Gordana Jankullovska

Marrëveshja e parë për bashkëpunim ndërshtetëror që është nënshkruar mes Qeverisë së Kosovës dhe asaj të Maqedonisë pas vendosjes së marrëdhënieve diplomatike, është ajo për fushën e sigurisë. Ajo u nënshkrua sot nga Ministri i Punëve të Brendshme i Kosovës Zenun Pajaziti dhe ministrja e Brendshme e Maqedonisë, Gordana Jankullovska.

Ministri Zenun Pajaziti tha me këtë rast se Kosova dhe Maqedonia dëshmuan sot edhe një dozë forcimi marrëdhënieve dhe bashkëpunimit ndër fqinjësor.

Ndërsa ministrja e Brendshme maqedonase Gordana Jankullovska tha se lufta kundër krimit të organizuar dhe terrorizmit është një prej obligimeve kryesore që kanë të dyja shtetet në rrugën e tyre të integrimit në Bashkimin e Evropian.

“Marrëveshja e bërë sot është një hap tjetër i forcimit të marrëdhënieve tona dhe ne kemi trasuar një rrugë në luftën kundër krimit dhe terrorizmit, që është një prej kritereve që duhet përmbushur në kuadër të procesit të liberalizmit të vizave”, tha Jankullovska.

Ministrat Pajaziti dhe Jankullovska thanë se të dyja vendet do ta ndihmojnë njëri tjetrin në rrugën e përmbushjes së kritereve për integrim në BE. Zotimet e tyre vijnë një muaj pasi dy shtetet kanë përmbyllur problemin rreth kufirit dhe kanë vendosur marrëdhëniet diplomatike.