Meta: Kosova e aftë të japë kontribut për sigurinë në rajon

nga elbasi.. Wed Dec 02, 2009 3:13 pm

Shefi i diplomacisë shqiptare Ilir Meta në takimin minesterial të OSBE-së në Athinë, tha se "kurrë më parë në historinë e tij të trazuar, Ballkani Perëndimor nuk ka patur një mjedis gjeopolitik aq paqësor dhe të qëndrueshëm"

Ai theksoi se Shqipëria i përshëndet këto zhvillime dhe ripërsëritë mbështetjen e saj të fuqishme për perspektivën Evropiane të gjithë rajonit. Në këtë takim Meta përgëzoi Qeverinë e Kosovës për organizimin e zgjedhjeve të lira e të ndershme vendore, për të cilat tha se ishin të parat zgjedhje pas shpalljes së pavarësisë, të drejtuara tërësisht nga autoritetet vendore. "Shqipëria i vlerëson këto zgjedhje si një shembull tjetër i rritjes së shkallës së pjekurisë së popullit të Kosovës dhe përfaqësuesve të tij politikë. Ato rikonfirmojnë më tej se Kosova e pavarur është plotësisht e aftë të japë një kontribut të prekshëm për sigurinë në Ballkanin Perëndimor". Meta shprehu kënaqësinë e tij për nivelin inkurajues të pjesëmarrjes së komunitetit vendor serb në këto zgjedhje. "Pjesëmarrja e tyre në institucionet demokratike dhe legjitime të Kosovës së pavarur janë ndihmesa më e mirë që ata mund të japin për të ardhmen e tyre, e cila është sigurisht dhe pashmangërisht e lidhur me një Kosovë të stabilizuar, të begatë dhe europiane", theksoi Meta.