PDK reagon ashpër ndaj akuzave të dëshmitarit Bllaca

nga elbasi.. Mon Nov 30, 2009 2:25 am

Përmes një komunikate Partia Demokratike e Kosovës ka reaguar ndaj akuzave të “dëshmitarit” Nazim Bllaca, duke i cilësuar ato tendenca për të inkriminuar përpjekjet për shtet ligjor dhe për t’i kthyer ato në anarki, urrejtje dhe vëllavrasje. PDK do të kërkojë zyrtarisht nga EULEX-i shqyrtim të plotë e të shpejtë të këtyre akuzave të përfolura dhe vënien e drejtësisë në vend, thuhet në komunikatë

Vendi dhe populli ynë ka dhënë shumë për të ngritur shtetin dhe institucionet e veta demokratike. Liria, siguria dhe shteti ligjor janë kualitete themelore të demokracisë dhe të vendit tonë.

Të nderuar qytetarë, ditëve të fundit jemi dëshmitarë të akuzave dhe fyerjeve që bëhen në rrugë joligjore dhe me motive elektorale. Ka tendenca nga individë të inkriminuar që përpjekjet tona për shtet ligjor t’i kthejnë në anarki, urrejtje dhe vëllavrasje.

Ftojmë tërë opinionin e gjerë politik, intelektual dhe moral të vendit tonë që t’i japin përgjigjen e merituar tendencave të tilla nga individë të kriminalizuar me vendosmëri jo anarkisë, jo krimit dhe jo vëllavrasjes.

I thërrasim dhe u japim përkrahje të plotë organeve të drejtësisë në zbardhjen e së vërtetës dhe t’i japin fund tendencave për shkatërrim dhe denigrim të sistemit tonë të drejtësisë me qëllim të zhdukjes të së vërtetës dhe mbulimit të krimit.

Partia Demokratike e Kosovës do të kërkojë zyrtarisht nga EULEX-i angazhim maksimal dhe shqyrtim të plotë e të shpejtë të këtyre akuzave të përfolura dhe vënien e drejtësisë në vend.

Partia Demokratike e Kosovës fton qytetarët të besojnë në organet vendore dhe ndërkombëtare të drejtësisë dhe të mos bien pre e akuzave të ulëta e të pabaza me prapavijë elektorale, thuhet në komunikatën e PDK-së.

Stavileci: Me këtë rast duhet të merren organet kompetente

Ndërkohë edhe zëdhënësi i Partisë Demokratike të Kosovës, Blerand Stavileci, gjatë një konference për media rreth CD së shumëpërfolur ka thënë se me këtë rast duhet të merren organet kompetente. Ne do të pozicionohemi si gjithmonë në mënyrë të përgjegjshme, në mënyrë të drejtë, të arsyeshme, korrekte dhe normalisht që do t’i përkrahim secilin vendim që merret, që ka bazë, së pari bazë ligjore në Republikën e Kosovës dhe që të gjitha këto raste i ndriçon”, ka thënë Stavileci.