Edhe në Gjilan koalicioni LDK-AAK

Edhe në Gjilan koalicioni LDK-AAK


Pas Prizrenit
dhe Sharrit, Lidhja Demokratike e Kosovës dhe Aleanca për Ardhmërinë e
Kosovës, kanë nënshkruar të shtunën marrëveshjen e koalicionit edhe për
Gjilan, ndërkohë që kanë paralajmëruar se në parim edhe subjektet tjera
si LDD, AKR dhe partitë më të vogla, janë pro marrëveshjes dhe se javën
e ardhshme pritet zyrtarizimi i koalicionit edhe me to. Në
ambient të hapur, para Teatrit të Qytetit të Gjilanit, marrëveshjen mes
LDK-së e AAK-së, e kanë nënshkruar Fatmir Rexhepi, kandidat i LDK-së
për kryetar të komunës së Gjilanit, i cili do të garojë në garën e
balotazhit dhe Ahmet Isufi, kryetar i degës së AAK-së.

Rexhepi e ka cilësuar këtë akt si një ngjarje të madhe, duke thënë se
me këtë marrëveshje po fillon një fazë e re për Gjilanin. Ai tha se kjo
është një marrëveshje politike për bashkëpunim dhe për ndërtimin e
institucioneve demokratike të Gjilanit, të qeverisë për Gjilanin.

Sipas Rexhepit, pos me AAK-në, një marrëveshje e LDK-së pritet të bëhet
edhe me subjektet të tjera, të cilat sot nuk ishin prezent, por sipas
tij, në parim e kanë përkrah koalicionin për Gjilanin dhe javën e
ardhshme do të ndodhë zyrtarizimi i marrëveshjes.

Ai tha se në parim ka pajtueshmëri për koalicion edhe me LDD, po ashtu
ka mbetur hapur çështja edhe me AKR-në, si dhe me partitë të tjera që
janë më të vogla, andaj kjo çështje pritet të përmbyllet javën e
ardhshme.

Ndërsa, Ahmet Isufi, kryetari i degës së AAK-së në Gjilan, tha se e
kanë nënshkruar këtë marrëveshje në bazë të parimeve të demokracisë për
një mbështetje të fuqishme që do të japin si AAK, për Fatmir Rexhepin
në garën e balotazhit.

Ai ka ftuar edhe qytetarët ta ofrojnë votën e tyre për Fatmir Rexhepin,
sepse siç u shpreh ai “ kështu e thellojmë edhe demokracinë, kështu i
japim kuptim jetës politike në komunën e Gjilanit”.

Duke i uruar suksese Fatmir Rexhepit, kandidatit të LDK-së për kryetar
komune, Isufi tha se Rexhepi do ta ketë mbështetjen e plotë të AAK-së,
duke konsideruar se me këtë akt po bëhet një punë e mirë për shkak se
Gjilani do të ketë një kryetar të zgjedhur me votën e lirë të qytetarëve