GJILAN

GJILAN - Batalioni i Forcës Operacionale Rezervë ka mbajtur sot një ushtrim përmbyllës në bashkëpunim me policinë e EULEX-it, me qëllim që t’i trajnojë këta të fundit në lidhje me direktivat e Komandantit të KFOR-it, si dhe me procedurat e përbashkëta operacionale KFOR/EULEX. Stërvitja është organizuar në kampin “Montieth” në Gjilan dhe është monitoruar gjatë gjithë kohës nga numri një i KFOR-it, gjenerali Markus Bentler. I kënaqur me përgatitjen e trupave që ai drejton, Gjenerali pohoi se forcat e tij janë të gatshme të përballen me çdo sfidë. Me këtë rast ai siguroi qytetarët e Kosovës se situata në Kosovë është e sigurt dhe kjo është vetëm një stërvitje. Sikurse në ushtrimet e zhvilluara gjatë viteve të mëparshme, ky ushtrim dërgon mesazhin e qartë që NATO mbetet e përkushtuar ndaj paqes dhe stabilitetit në rajonin e Ballkanit.