Sejdiu: Dilni në zgjedhje

nga *lissa* Fri Nov 13, 2009 10:27 am

Presidenti Fatmir Sejdiu u është drejtuar të premten qytetarëve të Republikës së Kosovës, duke kërkuar prej tyre të dalin në zgjedhjet lokale të 15 nëntorit në mënyrë masive, dhe të përcaktojnë vetë se kush do t’iu prijë në qytetet e tyre gjatë katër vjetëve të ardhshëm.

Sejdiu: Dilni në zgjedhje F.1113142834472_m

Sejdiu: Dilni në zgjedhje F.1113142834472_m

Sejdiu, njëkohësisht i ka falënderuar qytetarët për kulturën e treguar gjatë fushatës zgjedhore, ndërsa i ka vlerësuar këto zgjedhje si një test të madh të demokracisë për të gjithë ne.

“Dua t’ju falënderoj për kulturën dhe qytetarinë që keni treguar gjatë një muaji sa zgjati fushata e parë parazgjedhore që pas shpalljes së pavarësisë së vendit. Po kështu, ju shpreh mirënjohjen time edhe partive politike dhe kandidatëve të pavarur për kryetarë dhe të këshilltarë komunalë, të cilët zhvilluan një garë dinamike dhe korrekte. Ndonjë incident sporadik që ka ndodhur ditëve të fundit assesi nuk e zbeh përshtypjen e mirë që është krijuar tashmë për ecurinë e deritanishme të kësaj fushate”, thuhet në mesazhin e presidentit Sejdiu.

Zgjedhjet lokale të 15 nëntorit - sipas kreut të Shtetit - janë një test i madh i demokracisë për të gjithë ne, “ndaj ju thërras sërish që këtë të diel, në mënyrë masive, të dilni në vendvotime dhe të përcaktoni vetë se kush do t’ju prijë në qytetet tuaja gjatë katër vjetëve të ardhshëm”.

Mosdalja në zgjedhje, sipas presidentit Sejdiu, automatikisht na e heq të drejtën e kërkimit të llogaridhënies nga ata që do të marrin mandatin për të qeverisur komunat tona, andaj ai i ftoi qytetarët të marrin pjesë aktive në këtë proces të rëndësishëm dhe me anë të votës së lirë të japin kontribut të drejtpërdrejtë për mënyrën dhe cilësinë e qeverisjes në komunën e tyre.

“Këto zgjedhje janë me rëndësi jetike për të ardhmen e vendit tonë. Ato janë një test i rëndësishëm edhe për proceset e mëtejme të integrimit në Bashkimin Evropian, në NATO dhe në institucionet e tjera ndërkombëtare. Kjo e diel duhet t’i dëshmojë botës se Kosova është vend stabil, se ajo krijon paqe e stabilitet në rajon dhe shërben si model i gatishmërisë për bashkëpunim të mirë reciprok me fqinjët e vet dhe me të gjitha vendet e tjera demokratike”, ka shtuar ai.

“Institucionet lokale e qendrore të vendit mbase nuk i kanë përmbushur në tërësi pritjet dhe kërkesat tuaja, por zgjedhjet janë rasti më i mirë që ju t’i votoni kandidatët më të përgatitur dhe më të ndershëm për t’i drejtuar komunat tona në periudhën e ardhshme katërvjeçare. Prandaj, dilni në zgjedhje dhe shndërrojeni 15 nëntorin 2009 në ditë feste për komunën tuaj dhe për tërë Kosovën”.

“Në fund, ftoj edhe një herë partitë politike, kandidatët e pavarur dhe veçmas Komisionin Qendror Zgjedhor dhe mekanizmat e tij që ta kryejnë detyrën e vet me dinjitet dhe me profesionalizëm, duke e zbatuar në tërësi Kushtetutën dhe ligjet e Republikës së Kosovës.
Le të jetë, pra, 15 nëntori një ditë e dëshmimit të shtetit tonë të lirë e demokratik”, përfundon mesazhi i presidentit Sejdiu