Krasniqi & Dimitrenko, sërish në ring

Mediat gjermane raportojnë se Luan Krasniqi dhe Alexander Dimitrenko, do të përballen në mes vete edhe një herë. “Der Hamburger Universe Boxing” ka konfirmuar se boksieri kosovar dhe ai ukrainas do t’i kryqëzojnë dorëzat sërish, me 28 nëntor në Arena Oberhausen, në luftën për titull interkontinental të kategorisë WBO, njofton tabloidi gjerman Bild.

Duelin e parë ndërmjet këtyre dy boksierëve e pati fituar Dimitrenko, me nokaut në rundin e tretë. 38 vjeçari Krasniqi, i cili gjatë karrierës së tij ka arritur 30 fitore nga 35 meçe, premton se kësaj radhe nuk do të dorëzohet lehtë. “Kësaj radhe, njerëzit që vijnë ta shohin meçin, do të shohin më shumë runde”, u shpreh boksieri kosovar.

Kurse, 27 vjeçari ukrainas beson se do ta përsëritë triumfin e vitit të kaluar, kur e kishte mposhtur Krasniqin pas një goditjeje fatale në pleksus. “Luanin e kam mposhtur në luftën e parë. Këtë herë do të provoj ta përsëris atë luftë”, theksoi Dimitrenko, që ka fituar 29 meçe nga 30 të zhvilluara.

Ndërkohë, Luan Krasniqi po vazhdon përgatitjet me mikun e tij dhe shokun e skuadrës, Firat Arslan dhe me bashkëpunëtorin e tij, Christopher White. Boksieri më i madh në histori të shqiptarisë ndihet mjaft mirë fizikisht, mentalisht dhe i gatshëm për sfidën me ukrainasin Dimitrenko. “Ishte një punë e shkëlqyer, edhe pse ishte paksa e lodhshme”, theksoi Krasniqi në uebfaqen e vet zyrtare.

Pas humbjes nga Dimitrenko, Luan Krasniqi mendonte seriozisht që ta linte përfundimisht boksin aktiv. Mirëpo, pasi ishte konsultuar me familjen e tij, boksieri kosovar do ta sprovojë veten sërish në boksin profesionist. Fitorja eventuale do t’ia rriste apetitet për të synuar më lart, ndërsa humbja sipas të gjitha gjasave do të thoshte fund i karrierës së tij të bujshme.

u dorzu Luani ende pa fillu shitja e biletave, Luan Krasniqi ka pas nje lendim, te njejtit ju kane dashur plot 1 jave per pushime, dhe nuk mund te boksoj ne fund te Nentorit siq eshte parapar.