Kosovë, nis punën laboratori për gripin "H1N1

nga jetaaa Wed Sep 30, 2009 3:43 pm

Që nga dita e sotme kosovarët nuk duhet të presin me ditë të tëra analizat laboratorike në rast dyshimi për infektim me gripin H1N1. Kosova është bërë me një laborator të diagnostikimit të infeksioneve të tilla falë një investimi rreth 400 mijë euro nga Ministria e Shëndetësisë dhe Banka Botërore, hap i cili është përshëndetur nga krerët e institucioneve të Kosovës në ditën e përurimit.
“Është nga qendrat më të mira në rajon. Unë besoj se me ekipet që ka Instituti Kombëtar i Shëndetësisë dhe me mbështetjen që do të japë Qeveria- Ministria e Shëndetësisë, por edhe Banka Botërore, do të ketë një ecje të mëtejme në kualitet”, deklaroi Fatmir Sejdiu, president i Kosovës.
Duke komentuar inaugurimin e këtij laboratori, kryeministri Hashim Thaçi ka dhënë një lajm të gëzueshëm për punëtorët e shëndetësisë në Kosovë.
“Është një projekt shumë modern që përputhet në rast nevoje me nevojat e qytetarëve të Kosovës. Përveç rritjes së pagave nga 1 janari 2010 me 30 për qind apo më shumë, duhet të përkushtohemi edhe në investimin e projekteve që të ndërtojmë shëndetësi sipas standardeve të Bashkimit Evropian dhe standardeve më të larta bashkëkohore”, u shpreh Hashim Thaçi, kryeministër i Kosovës.
“Është një laborator i kualitetit të lartë që përmbush standardet e OBSH-së. Shpresojmë se kjo do t’i adresojë të gjitha infeksionet e reja dhe emergjente si për kafshët ashtu edhe për njerëzit”, tha Ranjit Nayak, përfaqësues i Bankës Botërore në Kosovë.
Që nga paraqitja e pandemisë së Gripit AH1N1, në Kosovë janë konfirmuar 6 persona të prekur nga ky virus përderisa janë trajtuar si të dyshuar 14 raste.
Deri më tani, analizat për raste të dyshuara si të prekur me të ashtuquajturin grip i derrave nga Kosova janë bërë në laboratorët e Beogradit dhe të Shkupit.