MSI paraqet laptopin X-Slim X610

Laptopi 15.6 inçësh nga kompania MSI pos procesorëve të Intel tani e tutje do të mund të blihet edhe me procesorët Athlon Neo të kompanisë AMD.
MSI edhe zyrtarisht ka paraqitur laptopin me emrin X-Slim X610. Trashësia e kompjuterit është dy centimetra e gjysmë, derisa peshon rreth dy kilogramë.

Laptopi bazohet në platformën e AMD-së me procesorin Athlon Neo falë së cilës shpenzon edhe deri në 60% më pak energji sesa laptopët e ngjashëm me të. Po ashtu, është integruar mënyra ECO e punës e cila mundëson rregullimin e shpenzimit në bazë të punës të cilën e kryen kompjuteri.

Është integruar edhe ekrani 15.6 inçësh me rezolucion prej 1.366 x 768 pikselash dhe ndriçim LED të prapavijës, derisa grafika është ATI Mobility Radeon HD 4330 me 512 MB memorie.

Laptopi vjen me 2 apo 4 GB RAM, me disk në kapacitet prej 320, 500 apo 640 GB, e në vend të DVD-së në ofertë është Blu-ray. Në mënyrë standarde, laptopi vjen i pajisur me Wi-Fi, Bluetooth, kamerë uebi, lexues të kartelave të memories dhe qasje HDMI.

Çmimi i laptopit nuk është bërë i njohur, mirëpo pritet që në tregun evropian të jetë rreth 700 euro.