O shpirt i bindur!

nga NoOrA Sun Mar 21, 2010 6:23 am

Mos u shqetëso shumë pse të tjerët nuk janë si ti! Ti je i mëshirshëm, sepse Zot e ke të Mëshirshmin, por ji i bindur plotësisht se, Allahu i Madhëruar vepron si të dojë, Ai është i Urti, Planifikuesi për gjithçka.

“O ti shpirt i bindur plotësisht! Kthehu te Zoti yt i vetëkënaqur e i pranuar!” – Kur’an, 89:27,28

O shpirt i bindur e i siguruar! Ti ke Zot, që të siguron! Gjithçka që të prek, është mëshirë. Allahu të mbikëqyrë, e përkujdeset për ty! Lum për ty! Prapë lum për ty!

O shpirt i bindur! O zemër me përkujtim të Allahut e qetësuar! Pse prej gjumit i errësuar e i vrenjtur zgjohesh! Çka të mundon. Çka të rëndon. Çka të paaftëson. Po sikur të mos kesh asgjë për të ngrënë, ke Zot që të ushqen. Çka të bën të ndjehesh i dobët. Kur ti ke zemër që ka gjetur qetësinë e vet. Ekziston dhe burimin e jetës e ka gjetur! Mos mendon se kanë jetë ata që zemrat ndaj Zotit të tyre i kanë të vdekura! Jo, mos u vrenjtëso, mos e errëso fytyrën, buzëqesh, ji i hareshëm, krenohu. Hape fytyrën, ecë i sigurt, e me shpirt i lartë nëpër tokë, je krijesë me dhunti, pasi ke udhëzimin e Krijuesit tënd.

Ti i pafajshëm je edhe pse të paudhët të fajësojnë, ty padrejtësi të bëjnë. Të janë ndërlikuar dhe t’u janë shtuar shqetësimet, por mjafton që je i vetëdijshëm dhe i bindur se kjo jetë nuk është vendbanim i përhershëm! Po edhe sikur të mos kesh as shtëpi, ke strehë qiellin e Allahut Furnizues e Mbrojtës! Mos u ndje i harruar, kur njerëzit të harrojnë, mos u ndje i fyer, kur njerëzit ndaj teje tregohen të pasjellshëm. A s’të mjafton ty Zoti që të krijoi, Gjykues, e Tubues për të gjithë!

Mos e vrit veten me kujtime, që vetëm plagë të shkaktojnë. Mos u zhyt në ujërat e problemeve, janë thjesht të imagjinuar. Nuk ekzistojnë. Nuk janë veçse të ngulitura në kujtesën tënde, të shkaktuara nga pavetëdija apo të tjerët të kanë shtyrë të mendosh se çdo gjë që ka të bëjë me ty, është e ndërlikuar, e pazgjidhshme. Jo, ti ndjehu i lirë në Tokën e Allahut, merr frymë i pavarur nga të tjerët, e mos lejo të tjerët të të detyrojnë si të ndjehesh!

E kush është më i mbrojtur se ti! E kush është më i pastër se ti; pesë herë brenda ditës e natës pastrohesh; e kush mund të jetë më i ngritur moralisht se ti, kur ti pesë herë brenda ditës e natës, i qetë Krijuesit të qiejve e të tokës ia shtron çështjet tua; e kush mund të jetë më i mbushur me shpresë e mbështetje se ti, kur ti ke një pjesë të natës të caktuar posaçërisht për ty, kur Zoti i çdo gjëje, për ty pyet nëse ke ndonjë kërkesë, nevojë e lutje, e që të ta plotësojë, e t’i përgjigjet! A nuk e sheh sa i veçantë je, sa i mëshiruar je, sa i Butë ndaj teje i Gjithëpushtetshmi është!

Jo, ti s’ke pse të ndjehesh i poshtëruar, as i dobët, kur të paudhët të vështrojnë me përçmim, me sy injorues! Ty të mjafton Dëshmitari, Llogarimarrësi, Ai që gjithçka është nën pushtetin e Tij; sado qofshin përpjekjet e njerëzve që ty të të njollosin me papastërtinë e panjerëzinë e tyre, ti përqendrohu në mësimet e Zotit tënd dhe të Dërguarit të Tij. Ti ke arsye të mos ndihesh i fyer, pasi ti je i nderuari, i zgjedhuri, i udhëzuari; e di pse jeton dhe je i vetëdijshëm se jeta e kësaj bote s’është veçse për t’u sprovuar.

Nëse të mundon familja e shoqëria e paudhëzuar, përkujto të Dërguarin e Allahut salAllahu alejhi ve selem në vitet e para të shpalljes; nëse të mundon varfëria, Furnizuesi, Allahu, mund të të bëjë prej njerëzve më të pasur, por ndjehu i sigurt se, Allahu është i Mëshirshëm e i Butë, e nuk ndëshkon robërit e Tij, porse ty të pret një jetë përplot lumturi, e lumturi e përhershme; nëse të mundon ndonjë sëmundje e rëndë, falëndero Zotin tënd, Ai është Shërues, por ty dëshiron të të pastrojë e ta lartësojë shkallën tënde në Xhennet; e nëse je sprovuar me dituri, me pasuri e me pushtet, mos kurse asgjë në rrugën e Zotit tënd, sepse ti je zgjedhur të dëshmosh mirësinë e bujarinë, prej Mirësisë e Bujarisë së Zotit tënd!

Nuk ke pse të bësh atë që bëjnë të paudhët. Kur ata flasin, ti mallëngjehu për Fjalët e Zotit tënd; e kur ata dëgjojnë inspirimet e të keqit, ti dëgjo Kur’an; kur ata ngarendin, ti ngadalëso të ecurit; kur ata garojnë ndaj bukurive mashtruese të kësaj jete, ti falëndero Zotin tënd që të përudhi; kur ata dalldisen e pasojnë epshin, ti Zotit tënd përulju e vetëm Atë adhuroje! Ti mund të jesh prej atyre që do ta trashëgojnë përjetshëm Xhennetin Firdevs, që hije ka Arshin e të Gjithëmëshirshmit, Allahut të Lartmadhëruar!

Mos u shqetëso shumë pse të tjerët nuk janë si ti! Ti je i mëshirshëm, sepse Zot e ke të Mëshirshmin, por ji i bindur plotësisht se, Allahu i Madhëruar vepron si të dojë, Ai është i Urti, Planifikuesi për gjithçka. Ti qetëso shpirtin e zemrën tënde duke e përkujtuar Allahun e Madhëruar, e qetëso zemrën duke lexuar Kur’an, e jeto me të Dërguarin e Allahut salAllahu alejhi ve selem, në kujtimet tua; jeto me njerëzit që dëshmuan devotshmërinë!

O shpirt i siguruar e i bindur plotësisht! Ti ke Zot, që të siguron! Gjithçka që të prek, është mëshirë. Allahu të mbikëqyrë, e përkujdeset për ty! Lum për ty! Prapë lum për ty! Kë Zot ke! Allahun dhu-l-xhelal ve-l-ikram!

Ve-l-hamdu lilahi rabbi-l-alemin, ve kefa biha niëmeten!

Shkruan: Avni Tafili