Zidanet i ofrohet posti i seleksionuesit të Algjerisë

nga Mc-LiNdY Wed Mar 10, 2010 8:34 am

Madrid, 10 mars - Legjenda e futbollit francez dhe botëror, Zinedine Zidane, ka mundësi të emërohet seleksionues i ardhshëm i Përfaqësueses së Algjerisë. Lajmin e ka bërë të ditur të martën gazeta franceze "L'Equipe".
Nëse Zidane 37-vjeçar nëse do të pajtohej me këtë detyrë, ai do të emërohej seleksionues i Algjerisë në fund të kampionatit botëror "Afrika e Jugut", kur edhe do t'i skadojë kontrata seleksionuesit aktual, Rabah Saadane.
Postin e seleksionuesit, Zidanet ia ka ofruar presidenti i Algjerisë, Abdelaziz Bouteflika, gjatë një vizite që ish-lojtari ia ka bërë vendit të origjinës javë më parë. Sipas burimeve të afërta me presidentin algjerian, Zidane ka kërkuar kohë të shqyrtojë ofertën.
"Zidane ka kërkuar kohë nga presidenti, pasi i duhet të shqyrtojë mirë ofertën dhe vetëm më pas t'ia kthejë përgjigjen përfundimtare", kanë thënë burime të gazetës franceze "L'Equipe". "Të gjithë jemi optimistë se pas përfundimit të kampionatit botëror Zidane do të jetë seleksionuesi i ardhshëm i Algjerisë".
Algjeria do të jetë pjesëmarrëse e Botërorit 2010 dhe do të bëjë gara në një grup bashkë me SHBA-në, Anglinë dhe Slloveninë.
Zidane aktualisht është i punësuar te skuadra e Real Madridit si këshilltar i presidentit Florentino Perez. Zidane në vitin 2006 është larguar nga futbolli aktiv.
Ai llogaritet ndër futbollistët më të mëdhenj që ka pasur bota. Ka fituar gati gjithçka që mund të fitohet me klube, me Përfaqësuesen e Francës dhe në konkurrencën individuale.
Gjatë karrierës ka luajtur për Canesin, Bordeauxin, Juventusin dhe Real Madridin.
Zidane ka lindur në qytetin Marseille, ndërsa prejardhjen e ka nga Algjeria. Ai me Përfaqësuesen e Francës ka zhvilluar 108 ndeshje dhe ka shënuar 31 gola. Më 1998 ka fituar titullin e botës, ndërsa më 2000 atë të Evropës.