Haradinaj nderon dëshmorët

Haradinaj nderon dëshmorët
Në prag të dy vjetorit të shpalljes së pavarësisë së Kosovës, kryetari i Aleancës për Ardhmërinë e Kosovës Ramush Haradinaj me bashkëpunëtorë, ka nisur rrugëtimin e homazheve tradicional që kjo parti bën çdo vjet tek varrezat dhe shtatorët e dëshmorëve të kombit dhe të figurave politike që kontribuan për lirinë dhe pavarësinë e Kosovës.
Pasi ka bërë homazhe tek varri i ish presidentit të Kosovës, Ibrahim Rugova, Haradinaj ka bërë homazhe para shtatores së komandantit të UÇK-së, Zahir Pajaziti në sheshin “Nëna Terezë”.

Ai ka thënë se këto homazhe për AAK-në tani janë tradicionale, përmes së cilave dërgohet mesazhi i nderimit për të gjithë ata që sakrifikuan për pavarësinë e Kosovës.

Kreu i AAK-së, i shoqëruar nga nënkryetari Blerim Shala, nga këshilltari i tij Steven Schook dhe bashkëpunëtorë të tjerë kanë bërë homazhe edhe tek shtatorja e profesorit Fehmi Aganit, para Fakultetit të Filologjisë si dhe ka bërë vizitë në familjen Agani.

Haradinaj do ta vazhdojë rrugëtimin e tij për në Prekazin e komandantit legjendar të Ushtrisë Çlirimtare të Kosovës Adem Jashari, për të bërë homazhe tek Jasharajt, ndërkaq më pas do të niset për të bërë homazhe në Deçan.