Largohu nga këto!

nga NoOrA Tue Feb 09, 2010 11:29 am

Feja islame është fe e plotë, e drejtë, e vërtetë, e cila me vete ka ndalesa, urdhëresa, këshilla etj. Në këtë temë modeste do të cekim disa nga ndalesat, haramet, të ligat që kanë zënë vend te populli ynë. Duke pasur parasysh dënimin dhe fundin e keq që kanë këto ndalesa, Allahu i Lartësuar ka thënë: "Kush e kundërshton Allahun dhe të Dërguarin e Tij dhe i kalon kufijtë e Tij, Ai do ta futë atë në zjarr përgjithmonë dhe do të ketë dënim poshtërues." (En-Nisa, 14)

Këto janë disa prej ndalesave të argumentuara me Kuran dhe Hadith, duke u nisur nga fjala e Allahut, që të shërbejë si kujtim për veten dhe të gjithë lexuesit e faqes tonë.

1. Shirku, të bërit shok Allahut, është harami më i madh

Thotë Pejgamberi alejhi selam duke iu drejtuar shokëve të tij: "A dëshironi t'ju tregoj për haramet më të mëdha (tri herë)?” Thanë: “Po, o i Dërguar.” Tha: “T'i bësh shok Allahut..." Çdo mëkat Allahu i Lartësuar e fal pos shirkut, ky mëkat kërkon për një pendim të posaçëm. Thotë Allahu i Lartësuar: "Pa dyshim që Allahu nuk falë që Atij t'i përshkruhen shokë në adhurim, por Ai fal pos kësaj atij që do vetë." (En-Nisa, 48)

2. Të betuarit jo në emër të Allahut të Madhëruar

Tregon Ibën Omeri, Allahu qoftë i kënaqur me të, se Pejgamberi alejhi selam ka thënë: "Kush betohet në dikë tjetër pos Allahut, ai i ka përshkruar Allahut shok." Po ashtu nga i njëjti transmetohet: "Vërtet Allahu ju ndalon që të betoheni në emër të prindërve tuaj, e ai që betohet le të betohet në emër të Allahut ose le te heshtë."

3. Kryerja e ibadeteve sa për sy e faqe (rija)

Allahu i Lartësuar thotë: "Hipokritët mundohen ta mashtrojnë Allahun, por Allahu në realitet është mashtrues i tyre. Ata edhe kur falen, falen me përtaci sa për t'u dukur te njerëzit dhe fare pak e përmendin Allahun." (En-Nisa, 142)

Tregon Ibën Abasi, Allahu qoftë i kënaqur me të, se Pejgamberi alejhi selam ka thënë: "Kush bën një vepër sa për t'u dëgjuar, do t'ia mundësojë Allahu atë dhe ai që bën vepër sa për t'u dukur, Allahu do t'ia mundësojë atë (por shpërblim nuk do të ketë për ato vepra)." E në një hadith kudsij thuhet: "Unë jam më i panevojshmi për ortak e kush bën ndonjë vepër duke më përshkruar shok, e lë atë dhe shirkun e tij."

4. Ulja me mëkatarë dhe hipokritë

Ka thënë Allahu i Lartësuar: "... e nëse ju shprehni kënaqësi ndaj tyre, dijeni se Allahu nuk kënaqet me popullin mëkatarë." (Teube, 96) Gjithashtu ka thënë: "Kur sheh se ata tallen me çështjet tona, largohu prej tyre derisa të kalojnë në bisedë tjetër. Nëse shejtani bën që ti të harrosh (e te rrish aty), pasi të bie ndërmend, mos rri me popullin zullumqar." (El-En'am, 68)

5. Shpifja

Ka thënë Allahu i Lartësuar: "... pra largohuni nga ndytësitë e idhujve dhe largohuni fjalës shpifëse. Duke qenë të sinqertë në besim ndaj Allahut dhe duke mos i përshkruar shok..." (El-Haxhxh, 30-31) Pejgamberi alejhi selam ka thënë: "A doni t'ju tregoj mëkatet më të mëdha?” (tri herë) Tha: “Shirku, mosrespektimi i prindërve.” Ishte i mbështetur, u ul dhe tha: “Po ashtu edhe shpifja.” Dhe i përsëriti aq shumë këto fjalë, saqë thamë: “Ah sikur të kishte heshtur!"

6. Gibeti (përgojimi)

Allahu i Lartësuar thotë: "...dhe mos t'a përgojojë askush njëri tjetrin, a ka dëshirë dikush që të han mishin e vdekur të vëllait të vet a ju këtë e urreni." (El-Huxhurat, 12). Këtë e sqaroi Pejgamberi alejhi selam kështu: "A e dini ç'është gibeti?” Thanë: “Allahu dhe i Dërguari i Tij e dinë.” Tha: “Të flasësh për vëllanë tënd atë që ai e urren.” Dikush tha: “E nëse ajo që thamë është e vërtetë?!” Tha: “Nëse është e vërtetë ajo që thua për të, ajo është gibet, e nëse nuk është e vërtetë, atëherë ti ke bërë shpifje."

7. Nxitja në grindje mes njerëzve

Allahu i Lartësuar thotë: "Mos e respekto askënd që betohet shumë dhe është i poshtër, që është përgojues dhe nxit grindje mes njerëzve." (El-Kalem, 10-11) Tregon Ibën Abbasi, Allahu qoftë i kënaqur me të, se Pejgamberi alejhi selam kaloi një herë pranë varreve dhe dëgjoi zërin e dy njerëzve, të cilët dënoheshin në varr dhe tha i Dërguari alejhi selam: "Ata dy dënohen dhe nuk janë dukë u dënuar për diçka të madhe (në një transmetim: por ajo është e madhe), njëri është duke u dënuar ngase nuk u ruante gjatë urinës e tjetri ngase ishte nxitës i grindjeve mes njerëzve..."

8. Mallkimi i besimtarëve

Kjo sepse Pejgamberi alejhi selam ka thënë: "Kush e mallkon ndonjë besimtar është sikurse ta kishte vrarë."

9. Rrahja në fytyrë dhe tetovimi

Nga hadithi që e transmeton Xhabir Ibn Abdilahu, Allahu qoftë i kënaqur me të, se ka dëgjuar Pejgamberin alejhi selam që ka ndaluar nga rrahja në fytyrë dhe nga tetovimi në fytyrë.

10. Vajtimi

Ka thënë Pejgamberi alejhi selam: "Nuk është prej nesh ai i cili i flakaresh faqet e veta (nga hidhërimi), i shqyen rrobat dhe lutet me lutje të kohës së injorancës."

11. Marrja e kamatës

Thotë Allahu i Lartësuar: "O ju që besuat, keni frikë Allahun dhe nëse jeni besimtarë, largohuni nga ajo që ka mbetur prej kamatës. E në qoftë se nuk largoheni, atëherë jeni në luftë me Allahun dhe të Dërguarin e Tij..." (El-Bekare, 278-279)
Pejgamberi alejhi selam ka mallkuar atë që merr kamatën, atë prej të cilit merret (me dëshirë), atë që e shkruan këtë akt dhe dëshmitarët e këtij akti. Në fund ka thënë: "Ata të gjithë janë njësoj."

12. Bixhozi dhe vera

Thotë Allahu i Lartësuar: "...s'ka dyshim se vera, bixhozi, idhujt dhe hedhja e shigjetës (për fall) janë vepra të ndyta nga shejtani. Pra, largohuni prej tyre nëse doni që të shpëtoni." (el-Maide 90)

13. Vjedhja
Thotë Allahu i Lartësuar: "Vjedhësit dhe vjedhëses ua preni duart, si shpagim i veprës që e bënë, si dënim nga Allahu. Allahu është i Fuqishëm dhe i Urtë." (El-Maide, 38)

14. Grabitja e tokës
Tregon Ibën Omeri, Allahu qoftë i kënaqur me të, se Pejgamberi alejhi selam ka thënë: "Kush merr diçka prej tokës pa të drejtë, ai Ditën e Kiametit do të gjuhet ndër shtatë shtresat e Tokës."

15. Zinaja (prostitucioni)

Allahu i Lartësuar thotë: "Mos iu afroni zinasë sepse ajo është vepër e shëmtuar dhe rrugë e keqe." (Isra' 32)

16. Dëgjimi i muzikës
Allahu i Lartësuar thotë: "Ka nga njerëzit të cilët blejnë tregime boshe që t'i largojnë njerëzit nga rruga e Allahut..." (Lukman, 6), Ibën Mesudi, Allahu qoftë i kënaqur me të, betohej se qëllimi në këtë ajet është muzika.
Pejgamberi alejhi selam ka thënë: "Do të ketë njerëz në umetin tim të cilët do ta lejojnë prostitucionin, mëndafshin, alkoolin dhe instrumentet muzikore."