Rriten pagat e policëve të Kosovës - ndërpritet greva

Rriten pagat e policëve të Kosovës - ndërpritet greva
Pas mesnatës të gjithë zyrtarët policorë të Departamentit të Njësive të Specializuara, të cilët ishin tubuar në Qendrën e Trajnimit në Kishnicë për të shprehur pakënaqësitë e tyre lidhur me sistemin e ri të pagave, pas takimit me ministrin e Punëve të Brendshme Zenun Pajaziti dhe menaxhmentin e Policisë së Kosovës, janë kthyer në të gjitha rajonet dhe stacionet policore. Puna policore dhe angazhimet e tyre në detyra ditore ka vazhduar dhe çdo gjë i është kthyer normalitetit, theksohet në një njoftim zyrtar të Policisë së Kosovës.
Në këtë takim, zyrtarët policorë u njoftuan me vendimin sa vijon: Do të rishikohen dhe korrigjohen të gjitha gabimet që janë shfaqur në sistemin aktual të pagave nga një grup punues, përfshirë edhe komponzimin në mënyrë retroaktive; sistemi i pagave do të rishikohet dhe do të bëhet implementimi i ngritjes se pagës (bruto) në këtë mënyrë: Zyrtarët policorë patrullues do të marrin nga 355 euro, plus ndërrimi i natës; zyrtarët policorë në administratë nga 320 euro; zyrtarët policorë në hetime nga 395 euro; njësitet speciale operative - 395 euro; njësitë e specializuara - 415 euro; njësiti special intervenues 430 euro.

Të gjithë zyrtarët policorë pavarësisht gradës do të marrin rritjen në pagë varësisht nga njësitë ku punojnë. "Ne presim zbatimin praktik në mënyrë që të kemi personel policor më të motivuar dhe kjo në mënyrë të drejtpërdrejtë ndikon në ngritjen e efikasitetit të policisë. Synimi i menaxhmentit të lartë të Policisë së Kosovës është që në kuadër të kornizave ligjore dhe në bashkëpunim me të gjitha rajonet, stacionet, njësitë dhe departamentet të vazhdohet me përmirësimin e kushteve të punës të zyrtarëve policor", thuhet në fund të këtij njoftimi.