Fol: Të pavërtetat dhe të vërtetat e zyrtarëve të vendit

nga *lissa* Sat Jan 30, 2010 9:09 am

Lëvizja Fol ka vazhduar me publikimin e raportit javor – Matësi
i së vërtetës – ku analizohet saktësia e deklaratave të zyrtarëve të
vendit.

Kështu, këtë javë Lëvizja Fol ka paraqitur në raport
deklaratën e kryeministrit Hashim Thaçi për energjinë elektrike dhe atë
për strategjinë për veriun e vendit, deklaratën e ministrit të
Brendshëm Zenun Pajaziti për liberalizimin e vizave, deklaratën e
kryekuvendarit Jakup Krasniqi për mosangazhimin e duhur të komisioneve
të Kuvendit, deklaratën e presidentit Fatmir Sejdiu për luftën kundër
korrupsionit...
Matësi i së vërtetës - Raporti II
“PDK-ja premton se në rast të jetësimit të planit të vet, nuk do
të ketë më kategori ABC, por do të ketë konsumatorë që paguajnë rrymë
dhe atë që nuk e paguajnë”, Hashim Thaçi – kryetar i PDK-së, Ferizaj,
30 tetor 2007
Vlerësimi: E pavërtetë
1. Gjendja e furnizimit me energji elektrike është përmirësuar, por reduktimet vazhdojnë sidomos në zonat jashtë Prishtinës.
2. Edhe në janar 2010, më shumë se 2 vjet pas dhënies së këtij premtimi
paraelektoral të atëherë, kryetarit të PDK-së, Hashim Thaçi, KEK
vazhdon ta praktikojë orarin e reduktimit ABC
3. Në planet e KEK-ut për furnizimin për janar 2010, aty detajizohet
plani ABC, sipas të cilit kategoria A furnizohet 24:0, kategoria B
24/0, ose 5:1, dhe kategoria C 5:1, ose 4:2
4. Kjo qeveri i ka dhënë KEK-ut miliona Euro për t’u rimëkëmbur, për të
sanuar dëmet e vazhdueshme në pajisjet e saj, që asnjëherë nuk kanë
rezultuar me sukses
5. Ndërtimin e Termocentralit “Kosova e Re”, projekt ky shumë i
diskutueshëm, qeveria e sheh si mundësi për furnizim të pandërprerë me
energji elektrike, dhe madje edhe eksportim të saj
"Nëse Kosova i përmbush me sukses kriteret teknike brenda këtij
viti, atëherë viti i ardhshëm do të mund të llogaritej si vit potencial
për përfshirje në këtë proces",
Zenun Pajaziti, ministër i Brendshëm, 27 janar 2010
Vlerësimi: E pavërtetë
1. Raportuesja e Parlamentit Evropian për Kosovën, Ulrike Lunachek
ka thënë se Kosovës do t’i duhen 3-5 vjet për t’u përfshirë në listën
Shëngen, që e bën të pavërtetë deklaratën e ministrit Pajaziti.
2. Shqipëria ka nisur në fillim të vitit 2008 negociatat me BE-në për
liberalizimin e vizave. Gjasat që ajo të përfshihet në Listën e bardhë
Shëngen janë në korrik 2010, që do të thotë se procesi ka zgjatur 2
vjet e gjysmë
3. Një takim në Prishtinë mes zyrtarëve të BE-së dhe atyre të Qeverisë
së Kosovës, nga kjo e fundit është interpretuar si nisje e negociatave
për liberalizim, por është hedhur poshtë si tillë nga Bashkimi Evropian
4. Përveç kritereve të gjithmbarshme, Kosova do të përballet edhe me
pengesat e 5 shteteve të BE-së që nuk e kanë njohur pavarësinë e saj.
“Beogradi nuk do të jetë partner dhe as nuk do të pyetet sa i
përket zbatimit të strategjisë së Qeverisë dhe mekanizmave
ndërkombëtarë për veriun e Kosovës”, kryeministri Hashim Thaçi, 17
janar 2010.
Vlerësimi: Gjysmë e vërtetë
- Strategjia për veriun nuk është dokument i hartuar ekskluzivisht nga Qeveria e Kosovës
- Strategjia është përpiluar e ndihmuar nga Zyra Ndërkombëtare Civile në Prishtinë e përfaqësuar nga Pieter Feith
- Shefi i ICO-së, Pieter Feith, ka deklaruar se rreth Strategjisë për
integrimin e pjesës Veriore të Kosovës në sistemin kosovar do të
konsultohet me Beogradin
- Ndërkombëtarët e shohin të rëndësishëm rolin e Serbisë, që nën
presionin e BE-së, do të mund të ndikonte tek serbët që ta pranojnë
sistemin e Kosovës
“Krasniqi ka kërkuar angazhim më të madh të komisioneve për
përshpejtimin e shqyrtimit dhe amendamentimit të projektligjeve në
procedurë. Ai vlerësoi se një numër i drejtuesve dhe anëtarëve të
komisioneve, nuk manifestojnë përgjegjësinë e nevojshme. Në këtë
vështrim është apostrofuar Komisioni për Interesat e Komuniteteve dhe
Kthim”, komunikatë e Kuvendit të Kosovës, 21 janar 2010.
Vlerësimi: E vërtetë
1. Kryeparlamentari Jakup Krasniqi ka kritikuar me vend komisionet
kuvendare, për zvarritjet që ato bëjnë në procedimin e ligjeve
2. Nga monitorimi i punës së komisioneve del se ato tejkalojnë shpesh
afatet ligjore për procedimin e Ligjeve në seancat e Kuvendit të Kosovës
3. Edhe Progres Raporti i vitit 2009, në pjesën kur flet për punën e Kuvendit vë në pah mosefikasitetin e komisioneve kuvendare
4. “Komisionet e Kuvendit duhet që të forcojnë kapacitetet teknike dhe
administrative për të shqyrtuar me kujdes të madh legjislacionin”,
thuhet në një pjesë të raportit
5. Raporti i Komisionit Evropian gjithashtu bënte thirrje për ngritjen
e kapaciteteve financiare e administrative të Komisionit për Integrime
Evropiane, gjë që e bën krejtësisht të vërtetë deklaratën e
kryeparlamentarit Krasniqi
“Është borxh i politikës që të luftohet korrupsioni”, presidenti Fatmir Sejdiu, 27 janar 2010, Oda Ekonomike Amerikane
Vlerësimi: Gjysmë e vërtetë
1. Duhet vullnet politik për ta luftuar korrupsionin, dhe pikërisht kjo ka munguar gjatë gjithë këtyre viteve
2. Ka qenë ndërhyrja e vazhdueshme e politikës në gjyqësor që ka penguar luftimin e kësaj dukurie në Kosovë
3. Partitë politike ende nuk bëjnë të ditur prejardhjen dhe financat e
tyre (duke përfshirë edhe partinë ku presidenti është kryetar), kështu
që është borxh në kuptimin e asaj që politika në Kosovë e ka lejuar
këtë situatë të krijohet
4. Partitë politike, ato që janë në pushtet dhe ato që janë në opozitë,
e kanë qenë në pushtet, e kanë humbur kredibilitetin e luftuesve të
korrupsionit.