Strategjia për veriun përkrahet në mënyrë të heshtur

nga *lissa* Sat Jan 30, 2010 9:08 am

NATO e Bashkimi Evropian përkrahin heshtur Strategjinë për
veriun. Sipas burimeve diplomatike nga Brukseli, në të cilat thirret e
përditshmja Koha Ditore, edhe pse formalisht NATO-ja dhe BE-ja nuk
prononcohen për strategjinë për veriun, askush nuk e kundërshton
zbatimin e kësaj strategjie, ndërsa shumë shtete e shohin si urgjente
zbatimin e saj, “sepse situata e tillë në veri nuk mund të tolerohet
më”.

Shefi i EULEX-it, Yves de Kermabon, dhe përfaqësuesi i
posaçëm i BE-së për Kosovën, Peter Feith, kanë folur të premten në
Bruksel në një mbledhje joformale të Këshillit të NATO-s dhe të vendeve
që kontribuojnë në misionin e KFOR-it në Kosovë e që nuk janë anëtare
të Aleancës.
Për shkak të natyrës joformale të takimit, nga zyrtarë të NATO-s nuk
është dhënë ndonjë deklaratë publike, pos që është konfirmuar se takimi
ka ndodhur dhe se "është biseduar për situatën në Kosovë dhe për
bashkëpunimin në mes të KFOR-it dhe pranisë së BE-së në Kosovë, i cili
bashkëpunim është i shkëlqyeshëm", njofton kjo e përditshme.
Në këtë takim, sipas këtyre burimeve, më së shumti është folur për
situatën në veri të Kosovës dhe për nevojën që sa më parë të zbatohet
strategjia për veriun e Kosovës.