Institucionet serbe në Kosovë kanë probleme të brendshme

nga *lissa* Thu Jan 07, 2010 9:21 am

Koordinatori i Forumit për Marrëdhënie Etnike, Dusan
Janjic pohon se nuk do të ketë ndërhyrje të dhunshme ndaj strukturave
paralele të Serbisë në Kosovë, sepse institucionet serbe në Kosovë,
sipas tij, kanë probleme të shumta të brendshme.

“Dobësimi i Beogradit e bën të pakuptimtë ndërhyrjen e bashkësisë
ndërkombëtare dhe Prishtinës, të cilat nuk kanë nevojë të rrezikojnë
ashpërsimin e situatës. Konfliktet ushtarake apo demonstratat e mëdha
politike do të dëshmonin se bashkësia ndërkombëtare nuk është në
gjendje ta udhëheqë Kosovën”, ka vlerësuar Janjic, në një prononcim për
Radion Deutsche Ëelle.
Beogradi kohë më parë bëri emërimin e gjykatësve dhe prokurorëve
serbë në gjykatën në veri të Mitrovicës, veprim që nxiti reagime të
ashpra në Prishtinë, ku nuk është përjashtuar as përdorimi i forcës për
t’i shuar strukturat e tilla, jolegale. Megjithatë, përfaqësues të
mekanizmave ndërkombëtarë kanë thënë se forca nuk është mjet që mund të
zgjidhë këtë problem.
Janjic është i mendimit se zhvillimet e fundit në vendbanimet serbe
dëshmojnë se atje është transferuar lufta e brendshme e partive
politike në Serbi, që sipas tij, është më e rëndësishme se vetë Kosova.
“E quaj të mundur që ata, të cilët udhëheqin strukturat paralele në
veri, e madje edhe në pjesën qendrore të Kosovës, tani flasin për gjoja
cenimin e serbëve dhe mund të bëjnë përpjekje që përmes ndonjë
konflikti, për shembull në Shtërpce, Novobërdë apo në Mitrovicë, të
justifikojnë ekzistencën e tyre”, tha ai.