Çështja e gjykatave në veri të zgjidhet me dialog

nga *lissa* Thu Jan 07, 2010 9:14 am

Zyrtarë të misionit evropian për polici dhe drejtësi
EULEX thonë se emërimi i gjyqtarëve serbë në gjykatat në Kosovë nga
qeveria e Beogradit është një vendim politik, për të cilin duhet
diskutuar me urgjencë.

Këshilli i Lartë Gjyqësor i Serbisë ditë më parë emëroi gjykatësit
dhe prokurorët serbë për Kosovën. Ky këshill parasheh shpërndarjen
territoriale të gjykatave dhe prokurorive në tërë territorin e Kosovës.
Zëdhënësja e misionit EULEX, Christina Herodes, i tha Radios
Deutsche Welle, se në asnjë vend të Evropës nuk ka dy sisteme juridike
të cilat mund të funksionojnë në të njëjtën kohë. Prandaj, sipas saj
edhe në Kosovë duhet të ketë vetëm një sistem unik juridik.
“Ne e kemi parë vendimin e Beogradit për emërimin e gjyqtarëve në
gjykatat serbe në Kosovë. Ky është një vendim politik të cilin duhet ta
diskutojmë me urgjencë. Muajt e fundit EULEX-i ka filluar që të
riinstalojë një drejtësi funksionale në veri të Mitrovicës, duke
rihapur Gjykatën në këtë pjesë dhe ka mbajtur disa procese gjyqësore",
tha Herodes.
Zyrtarë të qeverisë së Kosovës, kanë vlerësuar se emërimi i
gjykatësve serbë në Kosovë nga Qeveria e Beogradit është një veprim i
jashtëligjshëm dhe ndërhyrje në punët e brendshme të Kosovës.
Presidenti i Kosovës, Fatmir Sejdiu madje ka kërkuar aktivizimin e
policisë për të pamundësuar funksionimin e strukturave paralele serbe
dhe gjykatat në veri. Mirëpo zyrtarët e misionit EULEX, të cilët janë
përgjegjës për policinë dhe drejtësinë në Kosovë, thonë se ata nuk do
të përdorin forcën për të shpërbërë strukturat paralele serbe,
përfshirë edhe gjykatat paralele.
Ata thonë se për të zgjidhur këtë problem rruga më e mirë është ajo
e bisedimeve. Në këtë linjë ata paralajmërojnë debate me autoritet e
Beogradit, në mënyrë që gjykatat në veri të Kosovës të mund të
funksionojnë në një sistem unik juridik të Kosovës.
Gjykatat në veri të Kosovës, pjesë kjo e banuar me shumicë serbe, u
vunë nën kontroll nga serbët lokalë menjëherë pas shpalljes së
pavarësisë së Kosovës me 17 shkurt të vitit 2008. Policia e UNMIK-ut
ndërhyri për të larguar serbët nga gjykatat dhe në përleshje me serbët,
një polic ndërkombëtar nga Ukraina u vra dhe dhjetëra të tjerë u
plagosën.
Punonjësit shqiptarë të gjykatave në veri tash e gati dy vjet nuk
lejohen të shkojnë në vendet e tyre të punës, për shkak se atyre nuk
mund t’u garantohet siguria.