Pozita dhe opozita po përfitojnë nga mjerimi i qytetarëve

nga *lissa* Thu Dec 31, 2009 8:19 am

Aktivistët e Lëvizjes “Vetëvendosje” të veshur me rroba
babadimri dhe nën sloganin “Babadimri nuk pati dhurata, ato i morën
politikanët”, gjatë aksionit të fundit për këtë vit kanë shpërndarë për
qytetarë kuti dhuratash, pa dhurata, brenda të cilave ishin vendosur
fletushka me po këtë slogan.

Përmes këtij aksioni simbolik “Vetëvendosje” ka paraqitur mënyrën se si
jeta e qytetarit të Kosovës, njësoj sikurse ato kuti pa dhurata, po
bëhet e zbrazët dhe pa kuptim.

Sipas tyre jeta e qytetarëve vazhdon të bëhet gjithnjë e më shumë më e
zbrazët, sepse jeta e politikanëve po mbushet përherë e më shumë me
pasuri e luks.

“Viti 2010 nuk do t’i gjejë punëtorët e shëndetësisë e as ata të
arsimit me paga më të larta; pensionistët që me punën e tyre në të
kaluarën, e ndërtuan këtë vend, do të vazhdojnë të marrin pensione
nënçmuese; nuk do të ketë vende të reja të punës për qytetarët e papunë
e as arsim më të mirë për të rinjtë e këtij vendi”, vlerësuan
aktivistët.

Sipas tyre, politikanët e Kosovës, pa dallim pozitë-opozitë, po
përfitojnë shumë nga mjerimi i qytetarëve dhe jetën e këtyre të fundit
vazhdimisht po e zbrazin.

Aktivistët e “Vetëvendosjes” thanë se nuk do të ketë jetë të mirë për
aq sa na udhëheqin njerëz të korruptuar që mund të jenë në shërbim të
kujtdo tjetër përveç qytetarëve.