Buxheti i Kosovës u miratua pa opozitën

nga Beli Tue Dec 29, 2009 12:21 pm

Kuvendi i Kosovës të martën ka miratuar buxhetin për vitin 2010 në
leximin e dytë, ndonëse pa prezencën e opozitës në seancë. Shefi i
Grupit Parlamentar të Aleancës për Ardhmërinë e Kosovës, Ibrahim
Makolli, ka kërkuar qysh në fillim të seancës që ky projektligj të
hiqet nga diskutimi, pasi që ai nuk u i ishte dhënë deputetëve me kohë
për ta shqyrtuar. Si pasojë e mospërfilljes së kësaj kërkese nga
Kuvendi, deputetët e të tri grupeve parlamentare opozitare, Aleancës
për Ardhmërinë e Kosovës, Aleancës Kosova e Re dhe të Lidhjes
Demokratike të Dardanisë lëshuan seancën. Megjithatë buxheti është
miratuar nga partnerët e koalicionit, Partia Demokratike e Kosovës dhe
Lidhja Demokratike e Kosovës me 66 vota për, 4 kundër dhe asnjë
abstenim. Buxheti është miratuar së bashku me 39 amendamente shtesë dhe
me rekomandimet e Komisionit për Buxhet dhe Financa, i cili për vitin
2010 ka marrë parasysh pjesën më të madhe të kërkesave për ndryshimin e
buxhetit, përfshirë këtu edhe blerjen e veturave luksoze për
Presidencën e Kosovës.
Buxheti i vitit 2010 është vlerësuar me nota pozitive nga pozita, sipas
së cilës ky buxhet është 5 për qind më i madh sesa në vitin e kaluar.
Kryetari i Komisionit për Buxhet dhe Financa, Gani Koci, ka thënë se
komisioni, të cilin e drejton ai, nuk ka bërë ndryshime të mëdha në
projektbuxhetin e hartuar nga Qeveria e Kosovës.
“Kemi bërë përpjekje t’i përmirësojmë disa pika të ndarjeve buxhetore
dhe të bëhet një shpërndarje sa më e drejtë”, ka thënë me këtë rast
Koci.
Buxheti për vitin e ardhshëm është paraparë të jetë 1 miliard e 461
milionë euro. Në anën tjetër partitë e opozitës buxhetin e vitit 2010 e
kanë quajtur buxhet të paplanifikuar mirë dhe të pamjaftueshëm për të
luftuar varfërinë në Kosovë. Në një konferencë për shtyp, të mbajtur të
njëjtën ditë kur në Kuvend po shqyrtonte buxhetin, shefi i Grupit
Parlamentar të Lidhjes Demokratike të Dardanisë, Lulëzim Zeneli, ka
vlerësuar se projektbuxheti i Kosovës për vitin 2010 paraqet buxhet te
stagnimit dhe është shprehje e mungesës së aftësive planifikuese të
Qeverisë së Kosovës.
”Përfundimisht ky projektbuxhet, përveç tjerash, përligj, legjitimon
paaftësinë planifikuese dhe menaxhuese të kësaj qeverie, por edhe
involvimin e saj kryekëput në konflikte interesash, në korrupsion dhe
në klientelizëm. Qeveria e Kosovës duhet të jep përgjigje para
pensionistit, punëtorit shëndetësor, para policëve, shërbyesve civilë,
për mos mbajtjen e premtimeve dhe për qindra miliona të premtuara gjatë
fushatës elektorale dhe kjo nuk mund të jetë ndryshe përpos mashtrim
dhe manipulim me qytetarët e varfër të Kosovës”, është shprehur Zeneli.