Shtohet numri i aksidenteve në trafik

Shtohet numri i aksidenteve në trafik


Numri i
aksidenteve fatale në nëntëmujorin e këtij viti (janar-shtator) është
rritur për 36% më shumë se një vit më parë. Sivjet kanë ndodhur 112
aksidente fatale, nga të cilat jetën e kanë humbur 128 persona. Ndërsa,
një vit më parë, në të njëjtën periudhë kohore, nga aksidentet kishin
vdekur 93 persona.



Përveç rritjes së aksidenteve fatale,
rritje të theksuar vërehet edhe në aksidentet me lëndime të njerëzve
dhe në aksidentet me dëme materiale. Nga aksidentet sivjet janë lënduar
rëndë e lehtë afro 6.000 persona, ndërsa vitin e kaluar numri i të
lënduarve ishte shumë më i vogël, rreth 4.500 persona.

Ndër më të rrezikuarit në trafik, pa dyshim se janë këmbësorët.
Statistikat e policisë së trafikut tregojnë se në këtë vit kanë vdekur
41 këmbësorë, në mesin e tyre 24 fëmijë, ndërsa një vit më parë kishin
vdekur 33 persona.

Kohë më parë, Policia e Kosovës e ka prezantuar projektin e përbashkët
me OSBE-në, i quajtur “Siguria nënkupton jetë”, që ka për qëllim
ngritjen e vetëdijesimi të shoferëve dhe fëmijëve në komunikacion.
Qëllimi kryesor i kësaj fushate është zvogëlimi i aksidenteve rrugore
dhe rritja e sigurisë në trafik. /Infopress