Serbia duhet të kuptojë - Kosova ekziston si shtet

Serbia duhet të kuptojë - Kosova ekziston si shtet


Serbia
duhet të kuptojë, dhe jo të bindet nga të tjerët, se Kosova ekziston si
shtet, ka thënë Giuliano Amato, ish-kryeministër i Italisë dhe kryesues
i Komisionit Ndërkombëtar për Ballkanin.




Amato, i cili para
katër vjetësh kishte dalë me propozimin që Kosova të kalojë nëpër katër
faza të pavarësisë së mbikëqyrur, në një intervistë për gazetën
“Politika” ka thënë se as sot nuk e ka ndërruar mendjen për këtë
çështje.

I pyetur nëse rrethanat kanë ndërruar ndërkohë, Amato ka thënë: “Po,
megjithatë ndodhi të vijmë deri te njohja e pavarësisë së Kosovës,
ndërsa Serbia ende të mendojë njësoj. Kjo e bëri të gjithë procesin
shumë të komplikuar dhe vetëm Gjykata Ndërkombëtare e Drejtësisë në
Hagë mund të sjellë një vendim që do të na ndihmonte”.

Sa i përket mundësisë që vendimi i GJND-së të ndryshojë ndonjë gjë,
Amato ka thënë se kjo do të varet se çfarë do të jetë vendimi. Ai ka
kujtuar se Serbia ka marrë pozicion që të tregohet e përmbajtur ndaj
çfarëdo vendimi tjetër që nuk do të jetë refuzues ndaj pavarësisë së
Kosovës – ndërsa ka shtuar se, edhe nëse Gjyqi do të merrte një vendim
që në një formë do ta kthente Kosovën në kuadër të Serbisë, kjo nuk do
të ishte e pranueshme.
“Edhe po të merrej një vendim i tillë, me kushte dhe kufizime të
caktuara, kjo do ta çonte diskutimin në një drejtim krejt tjetër”,
konsideron Amato.
I pyetur ndërkaq, se pse ky drejtim nuk mund të ndërrohet, Amato ka
thënë: “Duhet të jemi real – Serbia ka hequr dorë nga Kosova si pjesë e
përgjegjësisë së saj qysh para disa vjetësh, kur Koshtunica kishte
marrë vendim të pranonte një lloj të përgjegjësisë ndërkombëtare për
Kosovën. Pyes nëse dikush në atë kohë kishte pritur që Kosova do të
mund të kthehej në statusin e mëparshëm. Teorikisht kjo është e mundur,
por jo edhe e pritur”.

Sa i përket mundësisë për bisedime të reja, ish-kryeministri italian ka
thënë se, edhe kjo gjë do të varet nga vendimi i GJND-së. “Ndoshta po
gaboj, mirëpo nuk pres që statusi i Kosovës të jetë para një sfidë
radikale. Gjyqi ndoshta do të konsiderojë se, megjithatë, do të jetë i
nevojshëm një aranzhman me Serbinë”, tha ai.
Ndërsa, lidhur me mos pajtueshmërinë e Serbisë me statusin e
Kosovës, por edhe të disa vendeve të BE-së dhe atyre të bashkësisë
ndërkombëtare, Amato ka thënë se Serbia nuk ka nevojë të pajtohet e as
të bëjë ndonjë gjë për shkak të dikujt tjetër. Mirëpo, vijoi ai, mendja
e shëndoshë thotë se ky shtet i vogël (Kosova) ka lindur dhe nuk mund
të mendohet për një kthim 10 vjet prapa.

”Bëhet fjalë për faktin se, Serbia duhet të kuptojë këtë gjë dhe jo të
bindet nga dikush tjetër. Për këtë gjë nevojitet kohë”, ka shtuar ai.

Ndërkaq, duke folur për shtetet që nuk e kanë njohur pavarësinë e
Kosovës, Amato ka thënë se, pa një lloj marrëveshjeje Rusia vështirë se
do ta pranojë ekzistimin e Kosovës si shtet. “Megjithatë, të mos
harrojmë se Rusia e ka shfrytëzuar shembullin e Kosovës për çështjen e
saj të dy republikave të Gjeorgjisë. Spanja ka vështirësi të mëdha të
pranojë Kosovën – mirëpo çështja e Kosovës nuk i intereson fare Spanjës
– ajo ka probleme vetjake”, ka thënë Amato.

Sidoqoftë, ai ka thënë se pesha e problemit nuk qëndron aty – por,
sipas tij, më e rëndësishme është që Serbia të ketë një qeveri,
orientimi kryesor politik i së cilës do të ishte ardhmëria. “A mendoni
se mund të shikohet kah ardhmëria dhe njëkohësisht të parashtrohen
pyetjet për sovranitetin e pjesës së territorit, e cila që 10 vjet
është jashtë shtetit - pjesë e së cilit ishte dikur?”, ka pyetur Amato.