Lushta: Qëndrimi i vetëm valid është ai që merr KQZ

Vendimet e KQZ-së të bëra publike mbrëmë për rivotim në Prizren dhe Lipjan dhe për hetim e rinumërim në Gjilan mbeten të njëjta, pavarësisht qëndrimeve dhe mospajtimeve nga jashtë KQZ-së- tha sot kryetarja e KQZ-së, Nesrin Lushta.
Ndërsa duke iu referuar qëndrimit të ambasadorit amerikan në Kosovë Cristopher Dell, për përsëritjen e zgjedhjeve edhe në Gjilan, kryetarja e KQZ thotë se qëndrimi i vetëm valid është ai që merr KQZ.

Kjo deklaratë e shefes së KQZ-së vjen pas deklaratës së ambasadorit amerikan Cristopher Dell, “se Komisioni Qendror i Zgjedhjeve do të njohë në tërësi obligimin e vet, të respektojë vendimin e KZAP-it për të përsëritur zgjedhjet edhe në Gjilan”, e cila u publikua sot nga Ambasada e Shteteve të Bashkuara në Prishtinë, pas takimit që Lushta zhvilloi me ambasadorin amerikan Dell.

Në një mbledhje të mbajtur në orët e mbrëmjes KQZ nuk ka arritur ende të vendosë për datën e mbajtjes së zgjedhjeve në Prizren dhe Lipjan, ndërkohë që si datë e mundshme është përmendur 24 janari i vitit të ardhshëm.

KQZ do të vendosë se a do të ketë fushate paraelektorale apo jo, ndërsa certifikimi i rezultateve përveç Prizrenit, Lipjanit dhe Gjilanit do të vazhdojë në të gjitha komunat e tjera.