Sllovenia i jep mbështetje të fuqishme Kosovës

nga *lissa* Mon Dec 21, 2009 10:35 am

President i Republikës së Kosovës, Fatmir Sejdiu priti
të hënën presidentin e Sllovenisë, Danilo Turk, me të cilin bisedoi për
bashkëpunimin e deritashëm shumë të mirë në mes të dy vendeve, si dhe
planet për zgjerimin e këtij bashkëpunimi në të ardhmen.

Presidenti Sejdiu falënderoi presidentin Turk dhe shtetin slloven për
përkrahjen e vazhdueshme të Republikës së Kosovës, për njohjen e
shpejtë të pavarësisë së saj, për shkëmbimin e ambasadorëve dhe sidomos
për përkrahjen në skenën ndërkombëtare, ku Sllovenia luan një rol të
rëndësishëm në argumentimin e pavarësisë së Kosovës, po edhe në
ndikimin e njohjes së mëtejme të saj.

Republika e Sllovenisë, sipas Sejdiut, është angazhuar fuqishëm në
aspektin edhe të sqarimit të arsyeve të mëvetësisë së Kosovës edhe në
institucionet ndërkombëtare, për të sqaruar mirë arsyet se mëvetësia e
Kosovës është garanci e paqes dhe stabilitet në rajon por edhe më
gjerë.

Presidenti Turk, nga ana e tij, ka folur për marrëdhëniet shumë të mira
mes Kosovës dhe Sllovenisë në të gjitha fushat. Ai ka përmendur
prezencën në Kosovë të ushtarëve sllovenë në kuadër të KFOR-it, si dhe
investimet e mëdha të ndërmarrjeve sllovene në vendin tonë.

Ai gjithashtu ka lavdëruar organizimin e zgjedhjeve lokale nga
institucionet e Republikës së Kosovës, si dhe e ka quajtur të arritur
të madhe faktin që Republika e Kosovës është anëtare e Fondit Monetar
Ndërkombëtar dhe Bankës Botërore, anëtarësim ky që do të ndihmojë në
zhvillimin e mëtejmë ekonomik të vendit.

Turk tha se vendi i tij do të vazhdojë me mbështetjen për Kosovën
nëpërmjet pranisë ushtarake e civile, dhe në kuadër të politikave
integruese evropiane. Njëherësh ai tha se mbështet Kosovën dhe vendet e
tjera të rajonit në ambiciet e tyre integruese evropiane dhe në
liberalizimin e vizave.