Rugova: Rritja e pagave të deputetëve është turp

nga *lissa* Sat Dec 19, 2009 8:23 am

Deputeti Naser Rugova, nëpërmjet një deklarate për
opinion, ka kundërshtuar nismën për rritjen e pagave të deputetëve të
Kuvendit të Kosovës, duke vlerësuar se rendi dhe ligji në vendin tonë
nuk funksionojnë dhe nuk respektohen nga vet përfaqësuesit e
institucioneve tona.

Në deklaratën e tij ndër të tjera theksohet se, mandati i Kuvendit dhe
i deputetëve të tij është që të hartojnë legjislacion cilësor dhe
adekuat për funksionimin e ligjit në Kosovë, ndërsa deputetët së pari
nuk kanë ligj për vetveten.

Rugova vlerëson se, pa nevojë është stopuar ligji për të drejtat dhe
përgjegjësitë e deputetit. “Ka afro dy vite të lindjes së shtetit dhe
ne ende nuk kemi ligj për qeverinë, nuk kemi ligj për pagat e të
zgjedhurve politikë dhe shërbyesve civilë. Kemi vetëm ligjin për
Kryetarin e shtetit, dhe atë madje të votuar me procedura të shpejta si
pasojë e shantazheve të partnerëve të koalicionit! Ku do na shpie kjo
sjellje e papërgjegjshme institucionale?” – pyet Rugova.

Propozimi për rritjen e pagave të deputetëve, pa ligj i cili duhet që
të rregullojë këtë fushë, sipas Rugovës, është edhe një nga dobësitë e
shumta tona flagrante të institucioneve të brishta të Kosovës.
“Prandaj, ndjehem i prekur thellësisht dhe madje i turpëruar nga nisma
për rritjen e pagave të deputetëve të Kuvendit”, thotë ai.

“Secili njeri në botë, përfshirë edhe unë personalisht, ka dëshirë që
të fitojë sa më shumë, mirëpo, në rrethanat aktuale tejet të rëndë
ekonomike dhe sociale në të cilën gjendet populli i Kosovës, populli
për fat të keq më i varfër jo vetëm në rajonin e Ballkanit Perëndimor,
por edhe në tërë kontinentin evropian, rritja e pagave tona është
krejtësisht një nismë e pavend”, shprehet Rugova, duke mos hezituar që
këtë propozim ta quajë turp.

“Ata të cilët e kanë propozuar këtë ide, duhet që të skuqen nga turpi
para krejt qytetarëve të Kosovës e duhet që të kërkojnë falje publike
para fëmijëve më të varfër në kontinentin e Evropës, të cilët ende nuk
janë duke e shijuar si duhet lirinë e fituar 10 vjeçare të Kosovës”,
thekson Rugova, duke treguar hapur se do të votojë kundër këtij
propozimi – të cilin e quan të paligjshëm.