ADK: KQZ-ja ia “vodhi” votat Osmanit

nga *lissa* Sat Dec 19, 2009 8:22 am

Alternativa Demokratike të Kosovës ka reaguar ndaj
certifikimin të kandidatëve për anëtarë të Asamblesë Komunale të
Prishtinës nga KQZ-ja, e cila ka lënë jashtë Asamblesë kandidatin e
kësaj partie për të parin e kryeqytetit, njëkohësisht edhe bartësin e
listës, Rexhep Osmanin.

ADK pretendon se kandidati i saj ka fituar vota të mjaftueshme për të
qenë delegat në Asamblenë Komunale të Prishtinës. ADK, siç thuhet në
komunikatë, në bazë të materialeve zgjedhore ka fituar 1.23 % të votave
ose një vend (ulëse), gjë që sipas kësaj partie është dëshmuar edhe me
rastin e shpalljes zyrtare të rezultateve nga KQZ-ja për partitë që
kanë fituar vende në Asamblenë Komunale të Prishtinës, ku ADK-në e
konstaton si fituese me 783 vota ose 1.23 % përkatësisht me një vend
(ulëse) – dhe me rastin e shpalljes së rezultateve përfundimtare nga
qendra e numërimit për kandidatë nëpër komuna (lista totale e
kandidatëve), ku KQZ-ja përsëri ADK-në e konstaton se është fituese me
z. Rexhep Osmani me 783 vota si bartës i listës për Prishtinë, si dhe
me rastin e shpalljes së rezultateve përfundimtare dhe të listës
përfundimtare të kandidatëve fitues për vendet e ndara në Asamblenë
Komunale të Prishtinës kandidatin e ADK-së, ku KQZ-ja Rexhep Osmanin e
shpall fitues po ashtu me 783 vota”.

“ADK është e shokuar për ndryshimet e rezultateve të zgjedhjeve të
shpallura zyrtarisht në faqen zyrtare të internetit të KQZ-së me ç’rast
ADK-së i hiqet një vend i fituar në Asamblenë Komunale të Prishtinës.
Për Alternativen Demokratike të Kosovës është e habitshme dhe
skandaloze kur Komisioni Qendror Zgjedhor me rastin e certifikimit të
rezultateve përfundimtare ka ndryshuar numrin e votave në dëm të
ADK-së. Kështu KQZ-ja ka pakësuar numrin e votave nga 783 në 409. Hiç
me pak se 374 vota janë eliminuar në dëm të ADK-së’, theksohet në
reagimin e kësaj partie.

ADK nuk ka asnjë informacion zyrtar për eliminimin e vendit të fituar
për Asamblenë Komunale të Prishtinës. ADK konstaton se në qoftë se në
KZAP ka pasur ankesë konkrete lidhur me numrin e votave të ADK-së ky
organ i lartë i pavarur është dashur të respektojë nenin 118, pikë 2 ku
KZAP ka qenë i obliguar që një kopje të vendimeve të tij me shkrim të
ofrojë ADK-së si palë e përfshirë edhe atë brenda 2 ditëve, meqë
ndryshimi i sasisë së votave ka ndikuar në certifikimin e rezultatit të
zgjedhjeve ku ADK ka “humb” vendin e fituar.

“Grabitja e votave tona, të ADK-së për të eliminuar një vend për
Asamblenë Komunale të Prishtinës në momentin e fundit vetëm pak qaste
para certifikimit të rezultateve përfundimtare e vlerësojmë se është
bërë me qëllim, që të na pamundësohet ankesa e jonë në organet tjera
kompetente. Por, ne vlerësojmë se certifikimi i rezultateve
përfundimtare të zgjedhjeve bëhet vetëm pasi që të jenë përfunduar të
gjitha procedurat ... (shih nenin 106, ligji për zgjedhjet lokale)”,
thekson kjo pari.

“ADK është e vendosur në zbardhjen e ndërhyrjeve të kundërligjshme,
arbitrare që janë bërë me rastin e certifikimit të kandidatëve për
Asamblenë Komunale të Prishtinës në mënyrë të veçantë për vendin e
partisë sonë. ADK në mbështetje të fakteve dhe të materialit zgjedhor
dyshon se KQZ përmes Sekretariatit të tij, si organ i pavarur i
zgjedhjeve ka bërë shkelje serioze të ligjit si pasojë e ndërhyrjeve
politike ose korruptive”, theksohet më tej në reagim.