Rama: Dialog, kur të hapen kutitë dhe tërhiqen shpifjet

Nga Vlora dhe me pas nga Fieri Kryetari i Partisë
Socialiste deklaroi se mazhoranca ta harrojë dialogun me opozitën pa
tërhequr mbrapsht akuzat, të cilat Edi Rama i quajti të turpshme dhe
shpifje monstruoze. Në protestat e zhvilluara në këto 2 qytete të
premten, Rama theksoi se nuk mund të ketë dialog pa hapur kutitë e 28
qershorit.



"Prandaj hap kutitë ose largohu Sali Berisha, sepse nuk mund të mbash
me forcë të fshehur në ato kuti vendimin e shqiptarëve për çlirimin e
tregjeve nga monopolet që ka ngritur pushteti yt familjar, dhe klanor.
Shpifjet e përbindshme ndaj opozitës, të etiketuara si mafioze, e
presin Sali Berishën në gjykatë dhe prokurori, ku janë depozituar me
dhjetëra padi. Le të bëhet njëherë burrë ky gojëpërdalë, që ka 20 vjet
që e turpëron këtë vend dhe këtë shoqëri me fjalorin e tij, me shpifjet
dhe gënjeshtrat e tij dhe le të shkojë në gjykatë dhe prokurori të
përballet me të gjitha ato që paturpërisht ka thënë ky pinok që u plak,
po nga gënjeshtrat dore nuk hoqi", tha Edi Rama.

Kryetari i Partisë Socialiste theksoi se nuk mund të ketë dialog
politik vetëm për të kthyer opozitën në Parlament, ndërsa qeveria nuk
do të ndërpresë betejën e saj me institucionet e pavarura dhe abuzimet
me pushtetin. Ndaj ai tha se protestat e opozitës nuk do të ndalen, dhe
se kur një vit po ikën dhe një tjetër po vjen, populli opozitar nuk do
të jetë në festë.