Tensione në marrëdhëniet me partnerët

Parregullsitë e paraqitura në gati gjysmën e komunave
nga 21, ku është zhvilluar rrethi i dytë i zgjedhjeve, kanë krijuar një
situatë të tensionuar në marrëdhëniet mes partnerëve të koalicionit
qeverisës.



Të dyja partitë, LDK dhe PDK, kanë vazhduar të këmbëngulin në fitoren
në disa qendra të Kosovës, përfshirë edhe Prizrenin dhe Gjilanin duke e
akuzuar njëra-tjetrën për manipulim të votës.

Partia Demokratike i ka bërë thirrje presidentit të Kosovës, Fatmir
Sejdiu, që në cilësinë e kryetarit të Lidhjes Demokratike të Kosovës,
të ndikojë në parti që ajo ta pranojë rezultatin e zgjedhjeve komunale.


Por Sejdiu, në përgjigjen e tij tha se posti i tij partiak është i
ngrirë dhe se ai ka rolin e një faktori bashkues në vend. Në marrjen e
detyrës së tij si president i Kosovës, disa vjet më parë Sejdiu pati
ngrirë postin e kryetarit të partisë, megjithëse roli i tij në LDK
vazhdon të jetë i pacenueshëm.

Ndalet numërimi
Një numër ankesash të partive politike të dërguara në Komisionin
Zgjedhor për Ankesa dhe Parashtresa, kanë “bllokuar”, procesin e
numërimit të votave me kusht për të paktën 10 komuna.

Votat me kusht thuhet se mund të përmbysin rezultatin zgjedhor, jo
vetëm në Prizren, por edhe në Gjilan e Lipjan, ku Lidhja Demokratike e
Kosovës pretendon të jetë manipuluar vota.

Por zyrtarë të Partisë Demokratike të Kosovës thonë se deklarimet e
partnerit të koalicionit, të paktën për qytetin e Gjilanit, janë
përpjekje për destabilizim të situatës politike në qytete dhe nuk kanë
të bëjnë fare me manipulim votash.

Kryetarja e KQZ-së, Nesrin Lushta ka pranuar se ka patur parregullsi
edhe në përpilimin e procesverbaleve që përmbajnë rezultatet dhe
prandaj ka vendosur që të anulojë votimet në 9 vendvotime, prej të
cilave 600 vota janë në Prizren. Kjo nënkupton që rezultati në këtë
komunë edhe mund të përmbyset për njërën ose partinë tjetër.

Procesi i numërimit të votave me kusht ndërkaq thuhet të ketë filluar
në 11 komuna nga 21 sosh, por vetëm aty ku nuk janë vërejtur
parregullsi.

Rezultati final larg

Ndërkohë që Komisioni Qendror i Zgjedhjeve thotë se për të paktën 10
komuna, ku vlerësohet të ketë patur parregullsi, numërimi i votave me
kusht do të shtyhet deri në marrjen e një vendimi për ankesat e partive
politike.

Ndërkohë, autoritetet e vendit dhe ato ndërkombëtare kanë bërë thirrje
për qetësi duke kërkuar përmbylljen e procesit zgjedhor pa ndonjë
problem.

Presidenti Fatmir Sejdiu bëri thirrje që të mos keqpërdoren votat e
qytetarëve, të cilët të dielën shprehën vullnetin e tyre për zgjedhjen
e kryetarëve në 21 komuna të Kosovës, në rrethin e dytë të zgjedhjeve.

Ambasadori i SHBA-së në Kosovë, Christopher Dell, e ka vlerësuar
procesin zgjedhor në Kosovë dhe ka vënë në dukje se rishikimi në
vazhdimësi i numërimit të votave është diçka pozitive, në mënyrë që siç
tha ai “askush të mos ketë mundësinë e ndryshimit të vullnetit të
popullit të shprehur përmes zgjedhjeve”.

“Po flasim për probleme në nëntë vendvotime, nga mbi 2400 syresh, kjo
është shumë më pak se 1 për qind e vendvotimeve. Dhe të thuash se ka
pasur probleme në më pak se 1 për qind të vendvotimeve, nuk mund të
thuash se ka pasur mashtrim masiv, ose se kjo e zhvleftëson procesin.
Ky është një hiperbolizim”, ka thënë Dell.

Sido që të jetë, procesi zgjedhor në Kosovë megjithatë duket të jetë
larg nga përmbyllja. Votat me kusht, numërimi i të cilave për një pjesë
të komunave vështirë se mund të përfundojë së shpejti, besohet se mund
të zjgidhin një pjesë të dilemave. Por mbetet ende për t’u vlerësuar
nëse i gjithë procesi ishte i drejtë dhe transparent.

Mbi të gjitha, përplasjet e partnerëve të koalicionit do të mund të shndërrohen në probleme të qeverisjes me vendin.