E hanë buxhetin

nga *lissa* Fri Dec 18, 2009 10:20 am

Pak ditë para mbylljes së vitit fiskal, kryeministri Hashim Thaçi me një vendim të “çuditshëm” hedh poshtë vendimin e tij që e kishte marrë në fillim të vitit 2008 për kursimin e buxhetit të shtetit. Thaçi ka nënshkruar një vendim nëpërmjet të cilit i ka qerasur anëtarët e Kabinetit qeveritar dhe veten e tij me nga 16.800 euro përnjëherë, të cilat do t’i marrin së bashku me rrogat e dhjetorit, më 1 janar 2010.

E hanë buxhetin F.1218122335616_m

Nga 16.800 euro, siç bën të ditur e përditshmja “Lajm”, përveç Thaçit, sipas këtij vendimi do t’i marrin edhe vartësit e tij, të cilët janë edhe deputetë. Ndërsa, totali i shumës që do t’i marrin buxhetit të shtetit 13 anëtarët e kabinetit qeveritar është 218.400 euro.

“Lajm” ka siguruar faksimilet e vendimeve të kryeministrit Thaçi. Më 22 janar 2008 kryeministri kishte marrë vendimin me numër 02/3, i cili ua ndalonte anëtarëve të kabinetit të tij qeveritar marrjen e dy pagave nga Buxheti i Konsoliduar i Kosovës. Ndërsa, njëzet e tre muaj më vonë, kryeministri “i bie pishman” dhe ndryshon vendimin që e kishte marrë vetë, për ta kursyer buxhetin e Kosovës.

Në këtë mënyrë, vendimi i ri i nënshkruar nga kryeministri Thaçi, me numër 11/97, përnjëherë e hedh poshtë vendimin e vitit të kaluar dhe e dëmton buxhetin e shtetit për mbi 200 mijë euro, konstaton kjo e përditshme.

Sipas këtij vendimi, të gjithë të emëruarit politikë – kryeministri, zv/kryeministrat, ministrat dhe zv/ministrat, të cilët janë edhe deputetë do të marrin pagën e plotë, ndërsa për pozitën tjetër do të marrin 50% të pagës. “Pagesa prej 50% të pagës bëhet në mënyrë retroaktive nga data 01.01.2008”, thuhet në pikën 3 të vendimit të kryeministrit.

Në këtë vendim, kryeministri Thaçi e ngarkon Ministrinë e Ekonomisë dhe Financave që mjetet për këtë vendim t’i marrë menjëherë nga Fondi rezervë i Qeverisë.

Paga e një ministri të Qeverisë së Kosovës është 1.270.50 euro, ndërsa paga e zv/.ministrit 1.182.50 euro. Po ashtu edhe paga e një deputeti të Kuvendit të Kosovës në total është 1488 euro – dhe sipas një përllogaritjeje që e ka bërë kjo e përditshme – personat që përfitojnë nga vendimi i kryeministrit përfshi edhe veten e tij, do të marrin nga 700 euro shtesë përnjëherë për muajt që nga janari i vitit 2008 e deri tani, e që në total bëjnë 16.800 euro për secilin.

Kush përfiton nga vendimi i kryeministrit: Hashim Thaçi, Hajredin Kuçi, Ramë Manaj, Skendër Hyseni, Vlora Çitaku, Fehmi Mujota, Fatmir Limaj, Adem Grabovci, Arsim Bajrami, Enver Hoxhaj, Nekibe Kelmendi, Alush Gashi dhe Mahir Yagcilar.

Kush nuk përfiton nga vendimi i kryeministrit: Ministrat; Ahmet Shala, Justina Shiroka-Pula, Lutfi Zharku, Zenun Pajaziti, Sasha Rashiq, Idriz Vehapi, Sadri Ferati, Valton Beqiri, Nenat Rashiq dhe të githë zv/ministrat e Qeverisë që nuk janë edhe deputetë.