A/H1N1 në Kosovë: 810 raste të dyshuara

A/H1N1 në Kosovë: 810 raste të dyshuara

Zyrtarë nga Ministria e Shëndetësisë thonë se deri më tash në Kosovë janë raportuar 810 raste me grip të derrave, 252 prej të cilave janë diagnostikuar si pozitive. Ndërkaq, përfaqësuesit e OBSH-së thonë se rastet e raportuara nuk janë statistikë reale e numrit të mundshëm të të infektuarve me virusin A/H1N1 dhe se mund të ketë mijëra të infektuar.



Faik Hoti, zëdhënës i Ministrisë së Shëndetësisë, ka deklaruar për “Radion Evropa e Lirë” se që nga muaji korrik e deri më tash, në Kosovë janë konfirmuar 10 raste të vdekjes nga virusi i ri pandemik. “Deri më sot, në Kosovë janë raportuar zyrtarisht 10 raste të vdekjes nga virusi i ri pandemik. Gjatë ditës së djeshme, 95 mostra të rasteve të konfirmuara si pozitive me këtë grip, janë dërguar për analiza shtesë në një laborator në Londër”, tha Hoti.

Hoti shtoi se dërgimi i mostrave për analiza në Londër është bërë për t'i hequr dyshimet lidhur me rastet që kanë përfunduar me fatalitet nga gripi i derrave dhe për të verifikuar nëse virusi ka pësuar ndryshime.

Skënder Syla, drejtor i zyrës së Organizatës Botërore të Shëndetësisë për Kosovë, vlerëson se vendi ynë tashmë ka përjetuar valën e parë të pandemisë së gripit të derrave. Por, sipas tij, ende nuk mund të flitet për një statistikë të saktë lidhur me numrin e mundshëm të të infektuarve me virusin A/H1N1 në Kosovë, ndonëse dyshohet se numri është i madh.

Aktualisht në Kosovë është duke qëndruar një ekip i ekspertëve të Organizatës Botërore të Shëndetësisë, i cili po i viziton disa nga institucionet shëndetësore në rajone të ndryshme të Kosovës, për të inspektuar mënyrat e menaxhimit klinik të rasteve të rënda, të prekura nga gripi i derrave.

“Në përfundim të këtij misioni, ne do t’i japim rekomandimet se si duhet të riorganizohet shërbimi shëndetësor, në mënyrë që të shkarkohet Qendra Klinike Universitare, sepse kanë edhe pacientë të tjerë, mirëpo edhe si duhet të bëhet referimi me kohë i të gjitha rasteve të dyshimta të gripit, të cilat mund të komplikohen”, thekson Syla.

Përveç kësaj, shton Syla, Organizata Botërore e Shëndetësisë është në proces e sipër të sjelljes në Kosovë të 200 mijë vaksinave, të cilat sipas tij, do të ndikojnë dukshëm në vaksinimin e, së paku, 10 për qind të popullatës.

Sidoqoftë, zyrtarët e Ministrisë së Shëndetësisë kanë theksuar se 5000 doza të vaksinës kundër gripit të derrave, të cilat ishin donacion nga Turqia, nuk janë shpenzuar ende dhe se përveç mundësisë së përdorimit të tyre nga kategoria e personelit mjekësor, që nga java e kaluar, ato kanë qenë në dispozicion edhe për vaksinimin e qytetarëve.