Clinton: Politikë pragmatike për të drejtat e njeriut në botë

Clinton: Politikë pragmatike për të drejtat e njeriut në botë


Fjalimi
i sekretares së Shtetit, Hillary Clinton në Universitetin Georgetown në
Washington ishe ndoshta mesazhi më i detajuar deri më sot i politikës
së qeverisë amerikane mbi të drejtat e njeriut. Ajo premtoi angazhimin
për të avancuar të drejtat e njeriut në botë duke i cilësuar përpjekjet
si të zgjuara, strategjike, të palëkundura dhe afatgjata.



Clinton tha se angazhimi i administratës së presidentit Obama për të
drejtat e njeriut fillon tek standardet universale dhe me mbajtjen
përgjegjëse të të gjitha vendeve rreth këtyre standardeve, përfshi
Shtetet e Bashkuara. Ajo theksoi urdhrat ekzekutivë të presidentit
Obama në ditën e tij të dytë në Shtëpinë e Bardhë duke ndaluar torturën
nga zyrtarët amerikanë dhe mandatuar mbylljen e burgut në Guantanamo,
në Kubë.

Duke theksuar nevojën për fleksibilitet në shtimin e rezultateve,
Clinton tha se kritika publike është shpesh mënyra më e mirë si në
rastin e grushtit të shtetit në muajin qershor në Honduras dhe dhuna
kundër protestuesve në Guine. Por ajo tha se negociata të
drejtpërdrejta dhe të forta me dyer të mbyllura kanë më shumë shanse
për të shënuar përparime të drejtave të njeriut në shtete si Kina dhe
Rusia vende me të cilat Shtetet e Bashkuara kanë një agjendë komplekse.


“Në Kinë, ne bëjmë thirrje për mbrojtjen e të drejtave të minoriteteve
në Tibet dhe Xinjiang, për lirinë e shprehjes dhe besimit, për
shoqërinë civile dhe organizatat fetare që ato kryejnë veprimtaritë e
tyre brenda kornizës ligjore. Ne besojmë se ata që mbështesin në rrugë
paqësore reformimin brenda kushtetutës nuk duhet të dënohen. Kur flitet
për Rusinë, ne hidhërohemi për vrasjen e gazetarëve dhe aktivistëve dhe
mbështesim individët kurajozë që punojnë për demokracinë në rreziqe të
mëdha.”

Clinton tha se supozimi që Shtetet e Bashkuara duhet të mbështesin ose
të drejtat e njeriut ose interesin kombëtar në marrëdhëniet me dy
vendet e tjera, është i gabuar. Po ashtu gabim është edhe supozimi që
vetëm izolimi dhe shtrëngimi janë mjete efektive për të ndikuar në
ndryshimet demokratike. Ajo tha se me Iranin, administrata e
presidentit Obama ka ofruar që të negociojë direkt me Teheranin për
programin e tij bërthamor, ndërkohë që ka shprehur solidaritet në të
njëjtën kohë me njerëzit brenda Iranit që po luftojnë për ndryshime
demokratike.

Në një seancë me pyetje përgjigje me studentët pas fjalimit të saj,
Clinton pranoi se politika me Iranin është një akt i balancuar...duke u
munduar të sigurojë që mbështetja Amerikane për lëvizjen pro
demokratike nuk nënvlerëson legjitimitetin e vet protestave.

“Është shembull i mirë i një vendimi të vështirë. Pas zgjedhjeve dhe
reagimit të menjëhershëm nga populli që u ndjenë se zgjedhjet ishin
manipuluar, ne morën në konsiderata serioze mënyrën që ne do të
mbështesnim ata që po rrezikonin jetën me protestat në rrugë. Ne deshëm
të shprehnim një mbështetje të qartë. Por nuk deshëm të zhvendosnim
vëmendjen nga shqetësimet legjitime në Shtetet e Bashkuara sepse ne nuk
kishim të bënim me reagimet spontane që u shtuan kundër veprimeve të
qeverisë iraniane.”

Clinton përsëriti theksin e administratës në luftën kundër trafikut
njerëzor dhe abuzimin e të drejtave të tjera që ndikojnë thellësisht
tek gratë. Ajo përmendi vizitën e saj në muajin gusht në pjesën lindore
të Republikës Demokratike të Kongos, të cilën e quajti skenë e
llahtarshme të dhunës seksuale dhe gjinore kundër grave të zhvendosura
nga konflikti atje.

Ajo tha gjithashtu se administrata ka shtuar veprimtarinë për sa i
përket të drejtave të njeriut për homoseksualët, duke përmendur
opozitën e fortë të Shteteve të Bashkuara ndaj projekt rezolutave në
Uganda që jo vetëm do të quanin krim të qenurit homoseksual por do të
vendosnin dënimin me vdekje ndaj tyre. /VOA/