Respektimi i të drejtave të njeriut në Kosovë është larg standardeve ndërkombëtare

nga elbasi.. Thu Dec 10, 2009 9:04 am

Në Kosovë ka ende shkelje të rënda të të drejtave të njeriut, vlerësojnë në ditën ndërkombëtare të drejtave të njeriut, organizata që merren me këtë çështje. Sipas tyre, shkelësit më të mëdhenj janë vetë institucionet, prandaj duhet të ndërmerren masa për përmirësimin e gjendjes.

Respektimi i të drejtave të njeriut në Kosovë është larg standardeve ndërkombëtare. Kështu vlerëson kryetari i Këshillit për Mbrojtjen e të Drejtave dhe Lirive të njeriut, Behxhat Shala. Ai tha se qytetarët nuk e kanë një adresë ku mund të kërkojnë realizimin e të drejtave të tyre dhe të kërkojnë përgjegjësi për ata që ua shkelin këto të drejta. Sipas tij institucionet janë shkelësit më të mëdhenj të të drejtave të njeriut.

“Shkelësit më të mëdhenj të të drejtave të njeriut ne Kosovë janë : Administrata ndërkombëtare UNMIK, EULEX, Institucionet e Republikës së Kosovës dhe Qeveria e Serbisë, përmes institucioneve paralele në Kosovë. UNMIK dhe EULEX përmes trysnisë që iu bëjnë institucioneve të Kosovës ndikojnë në vendimmarrje që mund të jenë dhe janë kundër interesave të qytetarëve të Kosovës”, ka thënë Shala.

Shala tha se shkelen të drejtat e fëmijëve që për shkak të gjendjes së rëndë materiale janë të detyruar të punojnë punë të rënda fizike dhe ta ndërpresin shkollimin. Iu shkelen të drejtat e pensionistëve, familjarëve të të pagjeturve, personave me aftësi të kufizuar, ish të burgosurve politik, dhe femrave me dhunën që ushtrohet ndaj tyre.

Ndërsa sekretari i përgjithshëm i OKB-së Ban Ki Moon, në mesazhin e tij për këtë ditë thotë se asnjë vend nuk është i lirë nga diskriminimi, i cili haset kudo dhe në shumë forma dhe i cili prekë të gjitha grupet vajzat dhe gratë, të varfrit, imigrantët, minoritetet e te tjerë.

“Këta njerëz në nevojë, në mënyrë të vazhdueshme përjashtohen nga pjesëmarrja në jetën ekonomike, politike, kulturore dhe sociale të komuniteteve të tyre. Paragjykimet që i stigmatizojnë dhe i përjashtojnë ata mund të shfrytëzohen nga ekstremistët. Në shumë vende ne jemi dëshmitarë të rritjes së politikave të reja ksenofobike. Por këto viktima të diskriminimit nuk janë të vetmuara. Kombet e Bashkuara janë me ta, të zotuara për të mbrojtur të drejtat e të gjithëve, dhe, në veçanti të atyre më në nevojë. Ky është identiteti dhe misioni ynë”, ka deklaruar sekretari i përgjithshëm i OKB-së Ban Ki Moon.

Ban Ki Moon në adresimin e tij për ditën ndërkombëtare të të drejtave të njeriut tha se zotimet nuk janë të mjaftueshme, dhe shtoi se Kombet e Bashkuara do të vazhdojnë përballjen me pabarazinë dhe jotolerancën kudo që mund të shfaqet. Ai ka ftuar të gjithë njerëzit në botë për të luftuar kundër diskriminimit.