SHBA: Obama (ende) nuk është Mandela apo Nëna Terezë

nga elbasi.. Thu Dec 10, 2009 9:02 am

New York, 10 dhjetor. Dhënia në tetor dhe dorëzimi sot i Çmimit Nobel për Paqe presidentit të SHBA, Barack Obama, ka qenë këtu në Amerikë një befasi si për median, për qarqet politike amerikane, ashtu edhe për vetë Shtëpinë e Bardhë. Vetë presidenti Obama pati deklaruar se “nuk e shihte këtë si një mirënjohje e arritjeve të tij, por si një afirmim i udhëheqjes amerikane dhe si një thirrje për veprim”.

Edhe Shtëpia e Bardhë, dje përmes zëdhënësit, tha se presidenti Obama e
kuptonte që ai “nuk i takonte një kategorie të njerëzve siç janë Nelson Mandela dhe Nëna Tereze”, po ashtu fitues të çmimit Nobel për Paqë.

Mirëpo, nëse nuk është një çmim për të arriturat, gjithsesi do të jetë një çmim për pritshmërinë për një botë pa luftëra, pa armë bërthamore, një botë që do të avancojë paqen dhe mirëqenien globale, sepse siç u shpreh Komiteti norvegjez, udhëheqësi amerikan ka “pushtuar vëmendjen e botës”.

Obama është presidenti i katërt amerikan që nderohet me çmimin më të
lart për paqe: para tij me te janë nderuar Theodore Roosevelt më 1906,
Woodrow Wilson më 1919, gjithsesi për përpjekjet e tij paqësore në Paqën e Versajës, që e bën aq të nderuar dhe të dashur për shqiptarët edhe për konfirmimin e pavarësisë së Shqipërisë, dhe Jimmy Carter më 2002.

Vetë dhënia e çmimit e vlerëson presidentin amerikan, për të cilin thuhet se mishëron frymën e re të dialogut dhe të angazhimit në problemet më të mëdha të botës.