KDI reagon për shtyrjen e seancës së sotme të Kuvendit, në mungesë kuorumi

nga elbasi.. Sat Dec 05, 2009 11:22 am

Përmes një komunikate për media Instituti Demokratik i Kosovës (KDI) reagon për shkak të shtyrjes së seancës së sotme plenare për arsye të mungesës së kuorumit të domosdoshëm ( Rregulla 31.pika 2 e Rregullores së Punës së Kuvendit). KDI këtë veprim të deputetëve të Kuvendit të Kosovës për të mos qenë të pranishëm në seancë plenare e sheh si papërgjegjshmëri të tyre në kryerjen e obligimeve para qytetarëve të Kosovës.

KDI konsideron se Kuvendi i Kosovës është larg së realizuari Programit të Punës së tij për vitin 2009, andaj dhe dështimi i seancave plenare dhe i disa mbledhjeve të komisioneve gjatë kësaj periudhe do të sjell edhe prolongimin e çështjeve dhe projektligjeve që kanë qenë në agjendë për miratim gjatë këtij viti.

KDI vlerëson se zgjedhjet e nivelit lokal përfshirë fushatën elektorale dhe situatat tjera të krijuara ditëve të fundit në Kosovë assesi nuk do duhej të reflektonin në funksionimin normal të institucioneve qendrore e në këtë rast Kuvendit të Kosovës në kryerjen e obligimeve kushtetuese që ka në procesin ligjbërës, thuhet në komunikatën e KDI.

Ndryshe, Kuvendi i Kosovës i ka ndërprerë punimet sot për ta shtyrë seancën për javën e ardhshme, për mungesë kuorumi. Në seancën e sotme pritej të shqyrtohej projektligji për klasifikimin e informatave dhe verifikimin e sigurisë si dhe në shqyrtim të dytë Projektligji për masat antidamping. Në rend ditë ishte edhe shqyrtimi i rekomandimit të Komisionit për Shërbime Publike, administratë Lokale dhe Media lidhur me vendimin e Gjykatës Kushtetuese për masën e përkohshme të parapagimit të RTK-së.