Kryeministri Thaçi premton mbështetje për banorët e lagjes Kroi i Vitakut

nga elbasi.. Fri Dec 04, 2009 8:30 am

Kryeministri Hashim Thaçi iu bëri thirrje sot banorëve shqiptarë të kthehen në lagjen Kroi i Vitakut në Mitrovicë, duke iu premtuar mbështetjen e plotë të qeverisë. Kryeministri vizitoi sot familjen e Fatmir Behramit, që tashmë është kthyer në pronën e vet në lagjen “Kroi i Vitakut”.

Kreu i ekzekutivit ka qëndruar sot në familjen Behrami në lagjen Kroi i Vitakut, në veri të Mitrovicës, për të ndarë gëzimin me këtë familje që sot u kthye në shtëpinë e ndërtuar nga mjetet e Qeverisë së Kosovës.

Kryeministri është zotuar se nuk do të kursehet asgjë vetëm e vetëm që të krijohen kushte të mira për kthimin e të gjithëve në pronat dhe shtëpitë e tyre. Ai u zotua se qeveria e drejtuar prej tij do të vazhdojë me investime në këtë pjesë të Kosovës, në mënyrë që përveç ndërtimit të shtëpive të krijohet edhe infrastruktura tjetër e nevojshme për banorët që kthehen.

Pronari i shtëpisë së rindërtuar, Fatmir Behrami, nuk e ka fshehur gëzimin që pas 10 viteve po kthehet për të jetuar në shtëpinë e re. Ai e ka falënderuar Qeverinë e Kosovës që i ka mundësuar të kthehet në pronën e tij.