EBU dërgon letër të hapur deputeteve te Parlamentit te Kosoves

nga elbasi.. Thu Dec 03, 2009 9:44 am

Po ju shkruaj në lidhje me propozimin për rishikimin e Ligjit mbi RTK-në, shërbimin e transmetuesit publik të Kosovës, në themelimin e të cilit, organizata ime- Unioni Evropian i Transmetuesve ( EBU), ka pasur një rol të rëndësishëm....

Unë dëshiroj t’ju jap një shtytje për miratimin e Ligjit të ripërpunuar, sa më shpejt që të jetë e mundur. Kjo gjë do të garantonte financim të pavarur dhe të qëndrueshëm për transmetuesin publik të Kosovës, që do të ishte në përputhje me praktikat më të mira evropiane dhe standardeve ligjore.

Në shumicën e vendeve evropiane, shërbimi i transmetuesit publik financohet kryesisht përmes parapagimit. Kjo vendos një lidhje të rëndësishme dhe të qartë ndërmjet transmetuesit dhe publikut të cilit i shërben ai.

Sido që të jetë është e rëndësishme të kihet parasysh se, ashtu sikurse posedimi i rrugëve, spitaleve dhe shkollave, edhe posedimi i një programi të balancuar e të larmishëm në një transmetues publik, është e rëndësishme në secilën shoqëri demokratike, madje edhe për qytetarët të cilët nuk i qasen atij shërbimi në mënyrë rutinore.

Shpresoj shumë që miratimi i shpejtë i propozimit për rishikimin e Ligjit mbi RTK-në do të sinjalizojë fillimin e një të ardhme të re për transmetuesin publik të Kosovës, jo vetëm në pikëpamjen e financimit të qëndrueshëm, por gjithashtu edhe në lirinë e mos-ndërhyrjeve politike.

Kjo është një gjë jetike për Kosovën, në kohën kur vendi kërkon më shumë njohje përbrenda komunitetit evropian të kombeve.

Më 26 tetor, i shkrova kryeministrit Thaçi për t’i shprehur shqetësimin tim lidhur me presionin politik dhe financiar që po ushtrohej ndaj RTK-së. (Marr guximin që letrën në fjalë t’ia bashkëngjis këtij dokumenti, pasi që përmbajtja e saj është ende relevante).

Pas një muaji, në Gjenevë takova Kryetarin e ri të Bordit të Drejtorëve të RTK-së, Rrahman Paçarizi dhe UD Drejtorin e përgjithshëm Antonio Gashi. Në takim potencova rëndësinë e raportimit të balancuar nga ana e RTK-së dhe nevojën që RTK-së t’i sigurohej një financim i përshtatshëm dhe i qëndrueshëm. Gjithashtu përmenda se një transmetues publik i balancuar dhe i financuar në mënyrën e duhur, që përfaqëson të gjitha pikëpamjet politike dhe pakicat, është gjëja themelore për secilën shoqëri demokratike, dhe, posaçërisht e nevojshme për një demokraci të re dhe fragjile siç është ajo e Kosovës. (Bashkëngjitur keni komunikatën e lëshuar pas takimit tonë)

Momentalisht RTK përfiton nga një marrëveshje e posaçme me EBU-në, e cila përfshin programin në radio e televizion, sport, lajme, asistencën teknike dhe transmetimet. Sido që të jetë, ashtu edhe siç është thënë nga të dy palët në tekstin e bashkëngjitur, EBU mund të tërhiqet nga kjo marrëveshje, në rast se mendon që RTK nuk përkrahet nga standardet e duhura financiare, apo nëse “nuk ofron program të larmishëm dhe të balancuar për të gjithë popullatën”.

Derisa ofron një program të tillë, ne presim nga RTK që të jetë e pavarur nga ndikimet politike dhe të ushtrojë një politikë të pluralizmit editorial, e cila u jep hapësirë opinioneve të të gjitha rrymave dhe minoriteteve.

EBU beson që me financimin e duhur dhe të qëndrueshëm, i cili bazohet në parapagim, RTK do të konsolidohet në rrugën e saj drejt transmetuesve të tjerë publikë të bashkuar në Unionin tonë.