Programi danez “Danida” mbështetë 4 shkolla, në 4 komuna të Kosovës

nga elbasi.. Thu Dec 03, 2009 8:34 am

Programi danez “Përmirësimi i Punësimit përmes Biznesit dhe Zhvillimit të Shkathtësive”, i cili vepron në Kosovë nga dhjetori i vitit 2008, po mbështet 4 shkolla bujqësore me qëllim të mundësimit të kushteve për realizimin e punës praktike, e cila është e rëndësishme për aftësimin profesional.

Shkolla e Bujqësisë “Zenel Hajdini”, në komunën e Ferizajt prej fillimit të muajit nëntor kanë objekt shkollorë të pajisur me të gjitha pajisjet praktike, falë programit danez “Përmirësimi i Punësimit përmes Biznesit dhe Zhvillimit të Shkathtësive”, në bashkëpunim me Ministrinë e Arsimit dhe kuvendit komunal të kësaj komune. Ky program ka komponentë mjaftë të rëndësishëm si ai në mbështetje të agrobiznesit, mundësisë së punësimit të të rinjve dhe vet-menaxhimit të institucioneve arsimore.

Shkollës bujqësore “Zenel Hajdini” do t`i ndahet edhe 5 deri 6 hektarë tokë për prodhime bujqësore, që do të ti`u shërbejë nxënësve në pjesën praktike, dhe për mirëmbajtjen e kësaj hapësire donacionet do të jepen nga programi danez “Danida”. Në shkollën e Bujqësisë në Ferizaj vijojnë mësimin rreth 1 mijë e 300 nxënës në dy ndërrime, në profile të ndryshme.

Ndërsa, nxënësit thonë se tani çdo gjë është më e lehtë dhe më e kuptueshme për ta sepse në kuadër të mësimit teorik mësohet edhe ai praktik.

Programi danez “Danida” është si rezultat I zbatimit të marrëveshjes në mes të Qeverisë së Kosovës dhe Ministrisë së Punëve të Jashtme të Danimarkës.

Ky program fillimisht është duke mbështetur 4 shkolla në 4 komuna të Kosovës, në mënyrë që të mundësohen kushte për realizimin e punës praktike, e cila është e rëndësishme për aftësimin profesional.

Programi danez, i cili po aplikohet në kuadër të 4 shkollave, ka përzgjedhur 4 profile - atë të teknologjisë ushqimore, hortikulturën, lavërtarinë në perimtari dhe pemëtaria në vreshtari. Shumë shpejt këto shkolla do të pajisen edhe me makineri bujqësore në vlerë prej 40 mijë euro.