Adem Salihaj thotë se ka dhënë dëshmi para autoriteteve të EULEX-it

nga elbasi.. Thu Dec 03, 2009 8:29 am

Nënkryetari i Lidhjes Demokratike të Dardanisë, Adem Salihaj, njoftoi, se sot në mëngjes ka dhënë dëshmi para autoriteteve të EULEX-it në lidhje me deklaratat e ditëve të fundit të Nazim Bllacës, se ai kishte qenë në listën e njerëzve që duhet vrarë.

Nënkryetari dhe deputeti i Lidhjes Demokratike të Dardanisë Adem Salihaj, tha para gazetarëve se dëshmia e tij në EULEX po bëhet në cilësinë e dëshmitarit dhe viktimës, pas publikimit dhe deklaratave në media të Nazim Bllacës, lidhur me rrezikimin e jetës së tij. Dëshmia e dhënë e Salihajt vjen vetëm dy ditë pasi Nazim Bllacës iu caktua arrest shtëpiak prej 30 ditësh.

“Sot kam qenë në prokurorinë speciale të EULEX-it dhe kam dhënë dëshminë time për një tentim atentati. Procedura po vazhdon atje, do të vazhdojë sërish, sepse nuk është kryer dëshmia ime në tërësi. Kjo është ajo që po zhvillohet lidhur me rastin e dëshmive të Nazim Bllacës”, ka deklaruar Adem Salihaj.

Deputeti Salihaj njoftoi se që nga dita e parë e daljes në opinion të Nazim Bllacës me deklaratat e tija, atij i është siguruar mbrojtja nga policia në shtëpinë e tij. Por për shkak se ndihet i rrezikuar Salihaj kërkoi nga policia t’i sigurohet edhe mbrojtja e afërt, pasi thotë se ndihet i rrezikuar nga ish strukturat e SHIK-ut.

“ Nuk ka pasur një kërcënim të drejtpërdrejt, por kërcënimi është permanent, sepse dihen arsyet e gjithë kësaj dhe dihen efektet e gjithë këtyre dëshmive. Prandaj jam njëri prej atyre që mund të ndihem i rrezikuar vazhdimisht. Po, jam i rrezikuar prej strukturave të njëjta të SHIK-kut, sepse nuk ka kush tjetër të më rrezikojë”, ka theksuar Adem Salihaj.

Deputeti Adem Salihaj është i pari që bashkë me kolegun e tij Gani Geci, para Kuvendit të Kosovës kanë bërë publike se ekzistojnë dëshmi për disa vrasje që janë bërë pas luftës, por edhe ekzistimin e një liste me emra të politikanëve që do të duhej vrarë.