AKTUALE OSBE prezentoi raportin për mbrojtjen dhe promovimin e të drejtave të komuniteteve

nga elbasi.. Thu Dec 03, 2009 8:27 am

Ndonëse akoma nuk janë certifikuar rezultatet e zgjedhjeve të 15 nëntorit në Kosovë, për komunat në veri të vendit pritet që të merret vendim politik, që do të thotë se vota e qytetarëve në përzgjedhje të kryetarëve për Zveçan, Zubin Potok dhe Leposaviq mund të vihet në pikëpyetje..

Ministri i Pushtetit Lokal, Sadri Ferati, pranon se gjendja në këtë pjesë të Kosovës është në nivel të pa kënaqshëm, por kërkon nga mekanizmat ndërkombëtar që të kenë prezencë më të shtuar në veri, në mënyrë që të fillojnë investime edhe atje.
Këto komente i ka bërë ministri Ferati pas dëgjimit të raportit të OSBE-së për “mbrojtjen dhe promovimin e te drejtave të komuniteteve në Kosovë: mekanizmat pjesëmarrës në nivel lokal”. Ministri Ferati konsideron se në mes të komuniteteve ka humbur besimi për shkak të keqmenaxhimit.

Në këtë raport është rekomanduar që të vazhdojnë mekanizmat e detyrueshëm si: komiteti i komuniteteve, zëvendës/kryesuesi i kuvendit komunal dhe nënkryetari i komuniteteve.

“Pjesëmarrja efektive e komuniteteve jo-shumicë në jetën publike dhe në proceset e vendimmarrjes konsiderohen si elemente qenësore për ndërtimin e një shoqërie demokratike dhe vërtet shumetnike dhe gjithashtu për krijimin e kushteve për integrim pa asimilim të detyrueshëm”, ka thënë shef i OSBE-së për Kosovë, Werner Almhofer.

Në këtë raport OSBE këshillon Qeverinë dhe Kuvendin e Kosovës që të rivendosin një bazë ligjore për themelim dhe mbajtjen e zyrave komunale për komunitete. Por, në asnjë pjesë të raportit nuk përmenden shifra se sa është numri i qytetarëve minoritet që konsultojnë apo kërkojnë ndihmë në këto zyra, që janë të krijuara ekskluzivisht për ta. Kjo njëherësh i jep një frymë të jo transparencës këtij raporti.